السمك المستهدف قشر البياض و البياض دول اكتر نوعين مهاجمين للاسماك خاصة قشر البياض

اماكن تواجد قشر البياض

• فى الاماكن العميقة
• فى الاماكن اللى فيها تيار مياة قوى
• بالقرب من محطات المياة

دى الاماكن المفروض يتواجد فيها ولاكن ممكن تجرب فى اى مكان عادى الموضوع عايز تجارب واستمرارية يعنى لو جربت مره او اتنين او اكتر وماتوفقتش ماتيأسش وتقول مش هاينفع

• اقرأ : طرق الصيد بالجيجنج || الكاستنج || الترقيد || البوبنج

طريقة الكاست

كاست من البر ويكون اللم للمكنه منتظم غالبا مع الثبات أحجامها من صغير لمتوسط حوالى من ٥ ك الى ٦ك المعتاد فى أكبر من كدا بكتير فى مناطق معينه ودائما بطعم حى

الكلاب تحتاج لم سريع غير منتظم ويفضل تركيب سلك واير لان أسنانها تقطع اى خيط لو السمار شكم من جوه

موسم الساموس يبدا من شهر ٤ حتي نهاية يونيو…

أفضل مناطق صيدة هي منطقة جرف حسين.. حوالي ٧٠ ك من السد

عن نفسى جربت كتير جدا على ماربنا كرمنى بسمك ..

بيكتر نشاطه من اول شهر 5 لحد شهر 10 والايام الحر فى شهر 11 و 12

الربلات المستخدمه :

ياريت تكون بتغطس 2 او 3 متر او لحد 5 متر حسب المكان انا استخدمت رابلة جر ! يازورى 12 سم وكانت كويسة

بالنسبة لسمكة كلب الملوحة او التيجر فيش يفضل استخدام المعالق ذات اللمعة العالية وبتكاست بسرعة لانها سمكة مهاجمة بسرعة عالية

الالوان:

خليك فى الالوان الفاتحة زى الفضى والدهبى و الاصفر والبرتقالى و الاخضر

وينفع برده الجارينجو او الجيلى المقاسات الصغيرة منه تنفع للبياض 5 و 7 سم

والكبيرة تنفع مع القشر 12 او 15سم

العود

ياريت يكون كاربون او اى عود خفيف الكاست C.W من ٢٠ الى ٦٠

الطول 2.4 او 3 متر او 4.20

الماكينة

ياريت ماتكونش تقيلة يعنى مقاس 4000 او 6000 معقول اوى وياريت تكون الفرامل مظبوطه لان القشر بياض قوى جدا

الخيط

ياريت يكون بريدد 30 ليبره 0.28مم مع ليدر 40 او 45 مم

او خيط مونو نايليون عادى 40 او 45 يكون نوع نضيف انا بفضل البريدد على شان رفيع وقوى وسهل فى الحدف

The post الكاستنج في المياه العذبة || صيد سمك قشر البياض appeared first on ملوك الصيد.

أماكن صيد التسقيط في الإسكندرية

اولا :  ابوقير

كان (طبعا زى كل حاجه حلوه ) في الماضي من احسن اماكن الصيد و الأكثر حصيله من كل الأماكن وكانت أبو قير في الشتاء هى جنة الدنيس بالنسبة للصياد

اما اللآن و بسبب تلوث المياه و لأسباب أخري كتير اصبحت الحصيله ضعيفة إلا لو كنت مع بحار متمرس فى أوقات معينه فقط من السنه

مثلا في شهر 11 و 12 تجد الدنيس في ارض الخمسين او الحصوة او الوعرة التي يقابلها من خلف جزيرة نيلسون من ناحية البحر المفتوح

وقد يدخل عليك اسراب الشاخورة البلدي الكبيرة والتي تدخل بكميات هائلة

اما الموسم الثاني فهو تقريبا من اواخر شهر 3 الى اواخر 5 بيكون في الغرق موجود خير كتير زى الشراغيش الرشيدي والكحله و و التيوس بأحجام معقوله

• ملاحظة مهمة :

يجب ثم يجب ان تحضر الجمبري العقر الطازج لكي لا تندم وخاصة مع الدنيس فهو دواء العقر الطازج وخاصة في الأعماق

مع العلم ان الدود ليس له اي قيمة في صيد التسقيط وعن تجربة

الجمبري النطاط او البلانس يستطيع ان يخرج الوقار والعضاض من جحره ويحضره اليك على السنارة على طبق من فضة .

ثانيا : بحري

اعتقد ان بحري لا زالت تحتفظ بخيراتها وخاصة في الوعر او صيد الأثر من شهر 7 الى شهر 11

و يكون الصيد على الأثر وبصراحة هو موسم جيد جدا للشراغيش والحلابيش (صغار الوقار)

• ولكن هل تتحمل الحر ؟؟؟

هنا السؤال المهم لأن الجو يكون صعب جدا جدا في شهر 7 و 8 لذلك انا افضل النزول في شهر 9 الى شهر 4 فا من شهر 10 الى شهر 11 في بحري انا اسميه شهر الغلطات او السمك الذي نحلم به .. عضاضة كبيرة وقارة كبيرة فهو فعلا شهر ممتاز للصيد بالطرق غير التقليدية

بالسمكة الحية تأتي بسمكة حية شرغوش او موزة وتضرب السنار في لحمها بدون ان يلامس عمودها الفقري لتظل حية

وتأتي بخيط مقاس 100 او 80 ورصاصة 10 وتربط خيط السلاح بطول 2 او 3 متر حتى يصل السنار قبل الرصاصة بنصف متر

وتلقي بالسمكة الحية بشرط ان تكون جالس على اخر المركب لكي لا يتعقد خيطك مع من بجوارك فالصيد ادب واحترام

وتتوكل على الله وتسمي بأسم الله .

ثالثا : المكس

الصيد هناك على العايم غزيلة و أفضل أوقاته من نصف شهر 11 الى اواخر 5 والعمق هناك لا يقل عن 60 متر

لذلك الرصاصة او الثقل لا يقل عن 150 جرام ولا يوجد ظل والشمس تكون مباشرة على رأسك طوال الوقت

لذلك لابد أنا يكون لديك كاب للحمايه

لكن السمك هناك بأحجام وفيرة ولكني لا أستطيع ان اتكلم عن ما لم اجربه .

اما فيكون الصيد على الغزيلة او المرجان كما شرحت سابقا ولا تنسوا العقر الطازج وسوف اشرح فيما بعد طريقة تحضيره وتخزينه ليظل طازج وخاصة في الغزيلة.

The post تبسيط صيد التسقيط || صيد التسقيط في الإسكندرية || 2 appeared first on ملوك الصيد.

1. اولا .. نزفر جيدا تحت المركب
2. ثانياً .. نختار شعر مناسب لايقل عن 60 ونربط فيه رصاصه ثقيله 200 .. ونرمى الرصاصه بالشعر فى الميه بدون سلاح او جلب وننزل لحد الأرض ونرفع حوالى مترين .
3. ثالثاً .. نحضر مدور كبير صلب بمشبك ونربط المشبك حر فى الشعر من اعلى .
   فى الطرف الثانى من المدور عند الحلقه نربط شعر لايقل عن 50 بطول حوالى متر وفى نهايته نركب الجلب او السلاح المناسب .
4. رابعاً نشك فى الجلب سمكه حيه من اعلى ذيلها بعيد عن السلسله الفقريه .
5. خامساً .. نرمى السمكه فى المياه .. ستتحرك السمكه الى اسفل والى أعلى و فى حركة دورانيه حول الشعر مع مشبك المدور بجريه تامه ولكنها محكومه تحت المركب فوق الزفر بفعل ثقل الرصاصه .
6. والباقى بقى ده الرزق بتاع ربنا

طرق شك السمك (حي _ ميت)

شك السمك , يختلف من سمكة الي سمكة آخرى حيث بعض السمك يشك من تحت الفم وهذي الطريقة تستعمل اكثر في مجال صيد الهامور … والسنار يكون من رقم 8 و7 و 6 وانت نازل

اما لصيد االدراك فيوجد شك مختلف وهذي طريقة من بعض الطرق (الشك من الأنف) وتختلف بختلاف نوع السمك المشكوك … فيه 😃

من الفم = من العين

مافيهاش فرق وتستخدم دائما مع الثقل سواء اللعف حي ام ميت
والسمكه اللي تقرب منه مضمونه 90% بإذن الله

من البطن

للعف الميت طبعا اما مع الاذن
ونتيجتها مضمونه 90% بإذن الله مع الثقل وبدونه (سباحي))

واما مع الذيل من خلف السره

وتستخدم غالبا بدون الثقل (سباحي) ويكون اللعف اخذ الراحه التامه في الحركه ونتيجتها مضمونه 90% بإذن الله

من الظهر

نادر الاستخدام .. وسردتها من حيث الافضل والاكثر استخداما

ملحوظه هامه
يجب عدم المساس بالعظام والبطن عند شك الأسماك الحيه لضمان بقائها حيه اطول فتره ممكنه

The post طريقة التسقيط بسمكه حيه appeared first on ملوك الصيد.

صيد الجيجنج

صيد الجيجنج هو طريقة صيد رأسي من علي مركب او بارجات بترول وهو يحتاج الأتي :

اولا

مكنة حديثة قوية انتي ريفرس يكون وزنها خفيف وقوية ونحط عليها بريد حوالي ٣٠٠ متر وفي نهايته حوالي ٢ متر ليدر مقاس ٨٠ او ٧٠ اصلي علشان يساعد علي عمل سوستة اثناء شد السمكة

ثانيا

علشان لون النايلون مايلفتش نظر السمكة نيجي بقي للجيجات اللي هي اساس الصيد بتبقي الجيجاية وزنها من ١٠٠ جرام الي ٣٠٠ جرام وممكن اكثر وبتتربط ربطة معينة بحلقات مخصصة ليها وبيبقي نازل من عند راسها سلاحين مقاس 0/9 مثلا او اصغر بطريقة معينة

بنربط الحلقة اعلي الجيجاية في نهاية طرف الليدر وبندأ الصيد بنسقط الجيجاية لاسفل القاع ونلم بطريقة معينة ننتش ونسيب وطبعا بنكون فاتحين الدراج بتاع المكنة علي حسب قوة البوصة والبريد ونفضل ننتش ونلم بحيث تكون حركة الجيجاية زي سمكة طالعة من القاع الي اعلي

اول مانحس بأننا مسكنا في سمكة نبدأ نتعامل معاها بطريقة صحيحة وده طبعا شرح اولي ومبسط وفيه خبرا في الجيج كتير ممكن يوضحوا زيادة عني

صيد الكاستنج

الكاستنج هو المخايلة واتسمي مخايلة لان شغل الكاستنج كله بيعتمد علي مخايلة السمك ولفت انتباهه لحركة اللور

الكاستنج وهو طريقة صيد بالسمك الصناعي بطريقة افقية

بمعني اولا يكون معاك بوصة خفيفة وقوية طولها من ٣متر الي ٤ونص وممكن ٥ حسب المرمي والبلوكات اللي انت واقف عليها

المكنة تكون قوية وخفيفة مقاس ٤٠٠٠ او اقل او اكثر المهم تكون خفيفة وعليها بريد من مقاس ١٨ الي مقاس ٢٨ حسب موسم السمك

في نهاية البريد بيبقي فيه ليدر حوالي متر ونص وفي نهايته مدور مشبك لسهولة تعليق اللور وتغييره

نبدا نرمي لابعد مسافة ونلم بطريقة مناسبة للكاستنج بحيث حركة اللور تشابه حركة الاسماك وطبعا مقاس اللور بيبقي من ٥سم حسب نوع السمك

لو قاروص صغير يبقي اللور ٥سم و٧و٩و١١سم

لو موسم مياس صغير يبقي من٩سم الي ١١سم

لو مياس كبير يبقي اللور من ١١سم الي ١٨سم

لو المكان اللي بنصطاد في عميق بتستخدم رباللات غاطسة

لو المكان مش عميق بنستخد رباللات عايمة

طبعا الشرح بيطول اكتر من كدة بكتير سواء في طرق الجيج او طرق الكاستنج ولكني اختصرت الكلام

صيد الترقيد

الترقيد ده ممكن يبقي في البحر وممكن يبقي في العزب والنيل لان كلمة ترقيد يعني برمي الطعم وبسيبه يعمي ارقده لحد مايشده سمك

طبعا ده بيعتمد علي عود قوي جدا مش مهم وزنه لاني كدة كدة برقده ومكنة قوية كبيرة عليها خيط من ٥٠ الي ٨٠ حسب نوع وحجم السمك المستهدف

لو السمك اسنانه حامية زي المياس بنحط بعد الثقل ٢٥سم واير مربوط فيه سلاح مناسب لحجم السمك مقاس من 0/4 الي 0/9

ونطعم سمك ممكن حية وممكن ميتة وساعات بيسموه تسليك علشان كان زمان بدل الواير سلك صلب بيتربط فيه السلاح ولو في النيل ممكن كركور حي او بلطية او كتكتوت حسب المكان والسمك المستهدف

الصيد بالبوبنج

البوبنج أيضا صيد افقي ولكن شكل اللور بيختلف بيبقي اللور اوزان مختلفة من ١٠ جرام الي ٦٠ جرام مقاسات من ٧سم الي ٣٠سم حسب نوع السمك المستهدف

شكل البوبرات بيختلف عن الرباللات وبيبقي كله عايم

يعتمد صيد البوبنج علي لفت انتباه السمك الهجام بالطرطشة علي الماء مع اكشن حركة البوبرات زي السمكة الدايخة بالضبط

بيحتاج مكنة تكون خفيفة وقوية وعليها بريد مقاس من ٢٥ الي ٤٠

الجير ريشيو بتاعها يكون اعلي من مكنة الكاست علشان تكون سريعة وعود يكون طول من ٢٧٠سم متر الي ٣٦٠سم ويكون قوي وخفيف

نختار مكان للصيد بالبوبرات عالاسماك العايمة مثل المياس والقاروص وجرم البياض والتونة وغيرهم من الاسماك العايمة

غالبا بيكون جنب جزيرة او صخور عالية وفيها رغوة وتقليب موج ونبدأ نرمي ونلم بدون توقف لحد ماتتمسك البوبراية وابدا اعشق الهوكات فيها بطريقة النتش بالعود

و اسف عالاطالة ويارب اكون وصلت للسائلين المعلومات المستعلم عنها

The post معني طرق الصيد بالجيجنج || الكاستنج || الترقيد || البوبنج appeared first on ملوك الصيد.

الصيد فى البحر الاحمر خصوصا الشاطىء مختلف بشكل كبير جدا عن البحر المتوسط من حيث العده المستخدمه وشكل الترميل و السمك المستهدف وان كان قريب بعض الشىء من البحر المتوسط فى انواع الطعوم

اولا :- العده المستخدمه

قبل ما نتكلم عن العده المستخدمه لازم ناخد بالنا من نقطه مهمه جدا وهى طبيعه المكان اللى هقف اصطاد منه هل هى شعب مرجانيه ولا صخور ولا ارض رمليه …

طيب كده احنا اتكلمنا عن شكل القاع

برضه لازم نعرف هل معامل المد والجزر بياثر بشكل مباشر على المكان اللى انا واقف فيه ولا لا لان فيه بعض المناطق بنلاقى ارتفاع البحر فى المد عند الشاطىء متر ونص مثلا واثناء الجزر بنلاقى قاع الارض ظهر قدامنا على مسافه ممكن تصل ل 300 متر

طيب انا كده استفدت ايه ؟؟؟؟؟

اقولك انا ..نستفيد ان لو المد و الجزر بياثر بشكل مباشر وان العمق متساوى لمسافه 300 متر مثلا حوه البحر يبقا لما اشوح على بعد 50 هىهى زى لما اشوح 200 متر لانه نفس العمق …اذا طول العود ممكن يقصر شويه ويبقا 360 متر مثلا..

اما لو الغرق قريب من الشاطىء وكل خطوه لجوه هتفرق فى العمق يبقا اشتغل باطول عود اقدر اتعامل معاه ونقول مثلا 450 متر لان ال 5 متر السيطره عليه بتبقا صعبه شويه اثناء التشويح

بالنسبه لشكل القاع بيفرق معايا اذا كان صخور او شعب او رملى فى شكل وقوه المكنه المستخدمه وطبعا ما يليها اللى هو الخيط والرصاص

طيب نقدر بعد الكلام الكتير ده كله ان العده بتكون 

ارض عمقها قليل وقاعها وعر:-

عود 360 مثلا كاست ويت من 30-80 جرام لاننا منقدر نزود وزن رصاص اكتر من كده عشان الوعر وكل ما الوعر يبقا كتير كل ما بضطر اقلل وزن الرصاصه وبستخدم رصاص بلحه رفيع عشان نسبه وعره قليله
مكنه سبيننج حله طويله ومش شرط تكون حجمها كبير لانك بتتكلم عن عمق اسر يعنى مش كبير

خيط من 30-40 اساسي ويفضل يكون مضاد للاحتكاك anti abrasion

طبعا السن حسب السمك المستهدف لكن انا عن نفسي بفضل مقاسات بين ال 5-8
شكل القرمه سهل جدا وهو رصاصه حره وتحتها مدور وخيط رمال اقل فى التخانه طبعا طوله 70 سم والسن

او مدور ثلاثى ونركب عين فى الخيط الاساسي وليكن 40 مم وعين نركب فيها رمال طوله 30 سم ويكون اقل من الاساسي 25 مم ويركب فيه الرصاصه والعين الاخيره للمدور نركب فيها رمال طوله 70 سم ويكون 30 مم للسن

والفكره هنا ان معظم التوعير بيكون سببه الرصاصه ولو صادف ووعرت منك وانت معاك سمكه لو شديت بزياده اول حاجه هتقطع هو خيط الرصاصه بحكم انه كده اضعفهم وبكده السمكه مش هتروح منك

واخر فكره دى قصتها طويله شويه واننا بنعمل قرمه عاديه جدا زى الاولى لكن بنركب سوسته قبل الرصاصه بحيث لو الرصاصه وعرت نعمل ايه .. نشد الخيط شده بسيطه ونسيب هنلاقى السوسته بعدت الرصاصه لوحدها عن الوعر

طيب ولو ارض عمقها كبير وقاعها وعر :-

كده ممكن نزود فى طول العود شويه عشان نقدر نوصل لاقصى عمق ممكن ونزود حجم المكنه لان السمك المستهدف هيبقا احجامه اكبر

ممكن نعمل اى قرمه من اللى شرحناهم وهنزود عليهم شكل اخير وهو اننا نركب الدور زى ما الصيادين المخضرمين بيقولو … طيب ازاى ؟؟

نركب فله حجمها كبير شويتين وتحتها مباشرة رصاصه 30 جرام مثلا او اكبر حسب ما الفله تقدر تشيل ونشوف العمق قد ايه ولو هو مثلا 5 متر نعمل وش تحت الرصاصه 4 متر مثلا بالسن بتاعنا بحيث لو اى سمكه اكلت نلاحظ احنا من الفله قبل هى ما تلحق تاخد الطعم وتدخل الوعر

احب اضيف اننا فى البحر الاحمر ممكن جدا نستخدم البريد فى التشويح لسببين هما ان البحر الاحمر تياراته وامواجه اقل بكتير من المتوسط والسبب التانى ان الريح بتكون اقل سرعه عن البحر المتوسط وبالتالى نسبة الكعبله للبريد او wind knots اقل

وبكده قدرنا نطلع بمعلومه مهمه جدا وهى ان الكاست ويت للعود مختلف تماما عن المستخدم فى البحر المتوسط بحكم ان البحر الاحمر معروف بكثرة الوعر والشعب المرجانيه

وان المكنه مش لازم تكون حجمها ضخم فى المقاس وان اهم شىء انها تكون قويه لان الله اعلم طبعا حجم السمك اللى ممكن يطلع

انواع الطعوم فى البحر الاحمر متشابهه بشكل كبير مع البحر المتوسط لكن بيزيد عليها ان الكاليمارى وهو ملك الطعوم فى البحر الاحمر وبيستخدم فى البحر المتوسط كطعم لكن ملوش شعبيه البحر الاحمر بين الاسماك

• بقلم كابتن / Eslam Aiop

The post معدات صيد الشاطئ في البحر الأحمر appeared first on ملوك الصيد.

وجود تجمع كبير من السمك ونوع السمك ده بياكل بشراهه وفي مجموعات واحنا عايزين نجيب منه اكبر عدد في اقل وقت

وكمان نكون بنرمي على اعماق كبيرة (زي ما بيحصل مع الغزيلة) والسمك موجود باعداد فبنكون محتاجين اننا نحاول نوقع عدد اكبر من الاسماك لتوفير المجهود المبذول في كل رمية على هذا العمق الكبير

طيب لو بنرمي من الشاطئ بالماكينة بيكون الهدف منها هو نفس الهدف لاننا بنرمي مثلا على مرمار او غلانفيش وده بيدخل على شكل مجموعات كبيرة وبياخد لفه في المكان ويروح وبعد شوية يرجع تاني وهكذا فبالتالي بنحاول اننا نصطاد منه على قد مانقدر في كل لفة من لفاته

طيب لو بالبوصة والفلة او حساس بتكون لنفس الاسباب مع اضافة انها بتغطي معظم عمق المية تحت منك وده لاننا بالبوصة اليد بنرمي على اعماق صغيرة وبكده لو السمكة على اي عمق حتاكل معاك

ومن الاهداف المهمة للسبحة عموما انها مش بتحتاج انك تزفر المكان لانها تعتبر اداه لتجميع السمك وده لوجود عدد كبير من السنار وبالتالي فيه عدد كبير من الطعم

• طيب انا عمال ارغي ولسة ماقلتش اللي انا عايز اقوله ..اللي هو
  

ان نوعية الاسماك اللي بتدخل على شكل مجموعات بتكون احجامها اصغر بكتير من الاسماك اللي بتكون بشكل فردي وبالتالي اذا اكل معاك سمكتين او تلاتة او حتى السبحة كاملة ده لا يمثل اي مشكلة مع الصياد المتمرس لان في المجمل بيكون مجموع الاوزان لا يتعدى الاتنين كيلو

لكن تخيل ان سمكتين الواحدة فيهم 3 كيلو دخلوا على السبحة الموقف يكون ايه؟؟؟؟؟؟

وللسبب ده لما تحب ترمي على حلبوش او قرفص او وقارة مش بترمي بسبحة لكذا سبب

اولهم واهمهم

ان السمك ده من ساكني الوعر فبنحاول اننا نقلل فرص التوعير لاقل درجة
فلو رميت بسبحة فرصة التوعير بتكون اكبر بكتير

ثانيا :

لو رميت على السمك التقيل ده غالبا بترمي بحية على الارض لو سمك كبير فعلا وبكده مش بتحتاج سبحة لان كل اللي بتحتاجه سلاح واحد وحية واحدة وبترقد للزبون

وفين الواير من الكلام ده كله .. الواير امتى بنستخدمه ؟؟؟؟

بنستخدمه لما بنرمي على سمك بسنان
وزي ما قال قبل كده استاذي الباشريس (سامح ابو مصطفى) ربنا يديله الصحه
السمك ده زي المياس او الدراك وفي البحر الاحمر البراكوده

وخليني اتكلم على اللي اعرفه وهو البحر المتوسط

لو بنرمي على سمكة بسنان بنرمي عليها ازاي
يا اما تسويح (حية على العايم)
او ترقيد (حية على الارض او بين الميتين)
ومعروف ان السمك ده بيدخل فرداني او سمكتين

يبقى حنحتاج السبحة في ايه
اعتقد ان الهدف من استخدام السبحة منعدم ؟؟؟

ثالثاً ..

نفترض اننا بنرمي بسلاحين او تلاته
وضرب عليك سمكتين مع بعض من الاوزان المحترمة
وواحدة منهم فرغت وطبعا ده بعد ما يكون السلاح شكها
في الحالة دي شبه مستحيل ان السمكة اللي اتشكت وفرغت دي تدخل عليك تاني

ده غير انها بتفزع اي سمكة موجوده عن طريق صرختها في المية
يبقى احنا كده فقدنا احتمال اننا نجيب سمك تقيل تاني من نفس المكان

لكن لو انت شغال بسلاح واحد
وركزت على سمكة واحدة في التعامل معاها لغاية وصولها للمركب بفضل الله
حتقدر ترمي تاني علشان اختها اللي موجوده تحت

رابعاً

معظم السمك اللي بسنان سمك بيجري
اول ما تشكمه تلاقيه بيصرخ يمين او شمال
فتخيل ان معاك سمكتين من النوع اللي مش بيتفاهم واحده منهم قفلت معاها انها تروح يمين والتانية راسها والف سيف انها تروح شمال
حتسايس اي واحده فيهم
انا بقول ان احتمال ضياع السمكتين في الحالة دي ممكن يوصل ل 90 %

خامساً

طريقة الصيد نفسها وهي ان لما بترمي على سمك بسنان بتعمل الليدر واير وقبله شعر عادي بطول 5 متر او اقل بحاجة بسيطة
طيب حنعملها ازاي في السبحة ؟؟؟؟؟؟؟؟؟

اما بخصوص لون الشعر وتاثيره فرأيي الشخصي ان السمكة لو جعانة حتدخل على الطعماية ولو رامي بحبل غسيل

لكن لو مش جعانه بنحتاج اننا نتحايل عليها عن طريق الشعر الفلوروكربون او الشعر الخفيف وبيعتمد على خبرة الصياد في التعامل مع السمكة

فيه عوامل ليها تأثير على لون الشعر المستخدم اهمها
هل الصيد بالنهار او بالليل – لون المية – حالة البحر – حالة القمر
على سبيل المثال لا الحصر

انا عن نفسي باهتم جدا بلون وحجم الليدر لكن الشعر الاساسي فاهميته اقل

الخلاصة من وجهة نظري اللي بتحتمل الصواب

لازم نحدد الهدف من استخدام طريقة الصيد عن طريق العوامل اللي بتستدعي استخدامها (نوع السمك المستهدف – اسلوب السمك في الدخول على الطعم – عمق المية – طبيعة الارض – الاوزان المتوقعة في المكان وده بييجي من خبرة الريس وخبرة الصياد نفسه في نفس المكان)

ملحوظة:

برجاء عدم ذكر سمك القراض على انه من الاسماك المستهدفة في الصيد لان ممكن يكون فيه صيادين مش عارفينه وبالتالي ممكن يعتبروه من الاسماك اللي ممكن يطلع عليها

انا اسف اني طولت جدا في عرض وجهة نظري الشخصية
التي تحتمل الصواب او الخطأ واي تعديل عليها على الرحب والسعة

•  ازاى تعمل سبحة جر ..

The post تبسيط صيد التسقيط ||تفسير المعاني .. عن السبحة الأسكندراني appeared first on ملوك الصيد.

تعتمد هذه الطريقة على الصيد من المركب بالطعم الطبيعى سواء الحي أو الميت و ترك المركب تسير حسب التيار و الطعم فى الماء

وهذه الطريقة لأنواع معينه من الأسماك سواء اسماك السطح أو الأعماق

و من أهم مميزات هذه الطريقة هى إننا نقوم بمسح مساحة كبيرة فى البحر و بالتالى تزداد فرص الصيد و أيضا حركة الطعم المستمرة تعتبر من أهم عوامل جذب كثير من أنواع الأسماك.

الخلاصه

بالنسبة للتسويح أو (الصابى) وهو الصيد من على المركب بدون ان تكون مربوطة وماشية مع التيار .

2- التشويح

تعتبر هذه الطريقة من أوسع الطرق انتشارا فى العالم و تمارس أحيانا من المركب و غالبا من البر

و من أهم عوامل اختيار هذه الطريقة للصيد هى طبيعة المنطقة المحيطة و أنواع الأسماك الموجودة .

يستعمل فى هذه الطريقة الطعم الطبيعى و الصناعى فى مناطق معينه .

الخلاصه ..

الوش ده على العوارى (كتل مرجانيه أو صخور متفرقه قريبه جداً من سطح الماء) برصاصه خفيفه ولازم يكون فى تيار وعلشان كده الوش فى نزول الميه على الكوشر (الهامور)

كما ان الشعور (الشعري) بنصيده بنفس الطريقه فى الغزير (العمق) وبراعى فى تيار مناسب على حسب العمق

The post الفرق بين طريقة التسويح .. والتوشيح !! appeared first on ملوك الصيد.

طبعا في احجام اكبر بكتير ممكن توصل 200 كيلو بس مشوفتش حد طلع الحجم دة كاستنج

الاسماك المستهدفة بالكاستنج :

• الساموس (قشر البياض )
• التايجر فيش (كلب الملوحة)
• البياض

اماكن تواجد الاسماك المهاجمة :

1- بحيرة ناصر:

نبذة مختصرة بس عشان الناس تفهم البحيرة

هي بحيرة صناعية فهي عبارة عن مياه ارتفعت منسوبها في غطت اماكن كتيرة حواليها حتي انها غطت جبال وخلتها جزر وغطت اماكن فيها صخور ضخمة بقت عاملة زي البلوكات اللي في اسكندرية وصلت لاماكن بعيدة بقت عاملة زي البحيرات الصغيرة الهادئة اللي مفيهاش حركة ف المية تماما عندنا في الصعيد بنسميها اخوار

السمك متواجد في جميع الاماكن في البحيرة دون تحديد لانه متواجد بكثرة

لكن افضل اماكن بيتكون تحت الصخور الكبيرة الغرقانة والاشجار الغرقانة ودا بيبقي موجود السمك المتوطن في المكان

و اماكن المياه المفتوحة والجارية اللي مفتوحة علي مجري النيل الاصلي دة بيبقي فيه السمك الغير متوطن ودة ممكن تلاقي فيها احجام ضخمة جدا بس مش دايما لانها بتبقي بتتنقل من مكان لمكان

2- النيل و الترع :

بيتواجد في اماكن تيار المياه القوية واغلبها عند مداخل ومخارج القناطر والهويس والسدود ومواتير دفع المياه في الترع بس لازم تكون سرعة المياة وشدتها واحدة متتغيرش لان اي تغير في شدة المياه عن طريق اغلاق منفذ من منافذ الميه في القناطر بيأثر جدا علي اكل السمك وممكن يطفش من المكان

اللورز المستخدمة في الكاستنج:

1-رابلات :

اغلبها تشتغل بجميع الوانها ومقاساتها بس الافضل للالوان اللامعة زي السيلفر والدهبي والفاتحة زي الاصفر والبرتقالي والاخضر والابيض والريد هيد بردو وانواع الكرانك بيت والاستيك بيت و المينو …الخ

2-السوفت :

ودة اقوي من الرابلات مع الساموس وبردو بيوقع كلاب وتحتاج طريقة لم اقل بطئ من الرابلات وبرده جميع الالوان بس اقواهم الي شبه الYellow Perch

3-المعالق :

ودي الاقوي مع التايجر فيش لانه بيجري ورا اي حاجة بتلمع وبرده بتوقع ساموس

4- عين كلب السمك :

ودي غريبة لناس كتير بس دي اقوي طريقة لصيد كلب السمك عن طريق اخراج عين كلب السمك بادخال صباعك من الخياشيم والضغط عالعين من جوة من غير ما تفقعها لازم تكون سليمة وتشكها في السن من الجلدة اللي خلف العين وتحدف وادعيلي

التوقيت الكاستنج :

تشتغل في جميع الاوقات نهار او ليل بس افضل وقت لنشاط السمك المهاجم من بعد العصر لحد ما الشمس تغيب والصبح من وقت الشروق لحد ما الشمس تعلي وتسخن يعني حوالي 8 صباحا

موسم الكاستنج

يبدأ من شهر مايو الي اخر شهر اكتوبر وممكن في الايام الحر في الشتاء

العدة المستخدمة في الكاستنج :

الماكينة :

ماكينة قوية وخفيفة مقاس 4000 او 5000 او 6000 بس تكون تروس قوية و دراج عالي مش اقل من 4 ك دراج

العود :

يكون قوي ومتين وخفيف يتحمل لشد السمك الغبي طول مش اقل من 240سم ومش اكتر من 350سم

الخيط :

بريد ميقلش عن 30 ليبرة و الليدر ميقلش عن 50مل او واير لان اسنان السمك ممكن تقطع الخيط

لكن انا مش بحبذ الواير لانه مكشوف وممكن استخدام المونو بس مش اقل من 50 او 60 مل علي المكنة بس البريد طبعا افضل

• اقرأ : الكاستنج في المياه العذبة || صيد سمك قشر البياض

The post الكاستنج في المياه العذبة (بحيرة ناصر) appeared first on ملوك الصيد.

بخصوص عدة التسقيط في اسكندرية كالآتي:

1- البوصة

• من 1.50 / 1.80 / 2.10 …لبلوب طري (كورسا أو دايوا )
• ال 1.50 لصيد أسماك الوعر (شرغوش.. كحلة ..سبارس..موزة )
• البوصة مقاس 1.80 /2.10 للغوزيلة (علشان تعرف تعمل قرمة بها 15 سنارة

2- الشعر

40 أو 45 على ماكينة قوية وناعمة

3- مدور مشبك صغير يربط فيه خيط الماكينة لتركيب الوش فيه

4- السنار

• مقاس 8 و 9 كفتة لصيد الوعر
• ومقاس 6و 7 كفتة لصيد الغوزيلة الكبيرة 
• مقاس 5و6 كرش لصيد الدنيس

5- شعر الوش 25 لصيد الوعر ومقاس 30و35 لصيد الغوزيلة
6- الرصاص 50 جم للوعر و120 جم للغرق ويزيد الوزن بزيادة العمق وقوة التيار
7- رصاص حمص لحبس الرصاص الثقيل

8 -الطعم

(برغوت / عقر / نطاط ) لصيد لصيد الوعر والغوزيلة سردين وعقر للدنيس والجرار شتاءا

أما بخصوص صيد الترقيد في حالة وجود قرص من سمك كبير فالعدة المطلوبة هي

لينسة شعر 70 أو 80 + سنار 02 + رصاص خفيف 30 جرام مثلا وربط السنار في الوش على طول بحيث تكون السنارة بعيد عن الرصاص 1.5 متر تقريبا

والطعم سمكة حية ( مش شرط تكون صاحية )

نصائح عامة للصيد بالتسقيط :

– مش هتحتاج لعود أطول من 2 متر او 2 متر و نصف … و مش هتحتاج أعواد تليسكوبية …

– كن جاهز ببدائل … يعني مثلا خيط 40 علي مكنة و ممكن مكنة تانية احتياطي عليها خيط 50 .. او علي لنسة

– كن جاهز بـ “لبارة كاليماري” متركبة علي خيط جاهز … لأن وقت ما تشوف الكاليماري جنب المركب مش هايستناك علي ما تركب اللبارة في الخيط! الكاليماري عادة لا يستقر في مكانه

– كن جاهز لأي شيء و كل شيء لإن انت تحت منك بحر و متعرفش البحر فيه ايه! عشان كدا لازم يكون معك سنون من جميع الأحجام، تنويعة كبيرة من الخيوط بما يتناسب مع السنون، رصاص من جميع الأحجام، غماز .. ممكن تحتاجه، موتور هواء لإعاشة الطعم الحي، قفاز، فوطة، بنسة او زرادية و قصافة، سكين لتقطيع الطعم و مقص … الخ ..

باختصار، كن جاهزا لجميع الاحتمالات حتي و ان كان الإحتمال 1 في الألف، لعلك تصيب الـ1 و ليس الـ999 !

The post تبسيط صيد التسقيط || صيد التسقيط في الإسكندرية || 1 appeared first on ملوك الصيد.