تبسيط صيد التسقيط ||تفسير المعاني .. عن السبحة الأسكندراني

السبحة بنستخدمها لأسباب محددة :

وجود تجمع كبير من السمك ونوع السمك ده بياكل بشراهه وفي مجموعات واحنا عايزين نجيب منه اكبر عدد في اقل وقت

وكمان نكون بنرمي على اعماق كبيرة (زي ما بيحصل مع الغزيلة) والسمك موجود باعداد فبنكون محتاجين اننا نحاول نوقع عدد اكبر من الاسماك لتوفير المجهود المبذول في كل رمية على هذا العمق الكبير

طيب لو بنرمي من الشاطئ بالماكينة بيكون الهدف منها هو نفس الهدف لاننا بنرمي مثلا على مرمار او غلانفيش وده بيدخل على شكل مجموعات كبيرة وبياخد لفه في المكان ويروح وبعد شوية يرجع تاني وهكذا فبالتالي بنحاول اننا نصطاد منه على قد مانقدر في كل لفة من لفاته

طيب لو بالبوصة والفلة او حساس بتكون لنفس الاسباب مع اضافة انها بتغطي معظم عمق المية تحت منك وده لاننا بالبوصة اليد بنرمي على اعماق صغيرة وبكده لو السمكة على اي عمق حتاكل معاك

ومن الاهداف المهمة للسبحة عموما انها مش بتحتاج انك تزفر المكان لانها تعتبر اداه لتجميع السمك وده لوجود عدد كبير من السنار وبالتالي فيه عدد كبير من الطعم

• طيب انا عمال ارغي ولسة ماقلتش اللي انا عايز اقوله ..اللي هو
  

ان نوعية الاسماك اللي بتدخل على شكل مجموعات بتكون احجامها اصغر بكتير من الاسماك اللي بتكون بشكل فردي وبالتالي اذا اكل معاك سمكتين او تلاتة او حتى السبحة كاملة ده لا يمثل اي مشكلة مع الصياد المتمرس لان في المجمل بيكون مجموع الاوزان لا يتعدى الاتنين كيلو

لكن تخيل ان سمكتين الواحدة فيهم 3 كيلو دخلوا على السبحة الموقف يكون ايه؟؟؟؟؟؟

وللسبب ده لما تحب ترمي على حلبوش او قرفص او وقارة مش بترمي بسبحة لكذا سبب

اولهم واهمهم

ان السمك ده من ساكني الوعر فبنحاول اننا نقلل فرص التوعير لاقل درجة
فلو رميت بسبحة فرصة التوعير بتكون اكبر بكتير

ثانيا :

لو رميت على السمك التقيل ده غالبا بترمي بحية على الارض لو سمك كبير فعلا وبكده مش بتحتاج سبحة لان كل اللي بتحتاجه سلاح واحد وحية واحدة وبترقد للزبون

وفين الواير من الكلام ده كله .. الواير امتى بنستخدمه ؟؟؟؟

بنستخدمه لما بنرمي على سمك بسنان
وزي ما قال قبل كده استاذي الباشريس (سامح ابو مصطفى) ربنا يديله الصحه
السمك ده زي المياس او الدراك وفي البحر الاحمر البراكوده

وخليني اتكلم على اللي اعرفه وهو البحر المتوسط

لو بنرمي على سمكة بسنان بنرمي عليها ازاي
يا اما تسويح (حية على العايم)
او ترقيد (حية على الارض او بين الميتين)
ومعروف ان السمك ده بيدخل فرداني او سمكتين

يبقى حنحتاج السبحة في ايه
اعتقد ان الهدف من استخدام السبحة منعدم ؟؟؟

ثالثاً ..

نفترض اننا بنرمي بسلاحين او تلاته
وضرب عليك سمكتين مع بعض من الاوزان المحترمة
وواحدة منهم فرغت وطبعا ده بعد ما يكون السلاح شكها
في الحالة دي شبه مستحيل ان السمكة اللي اتشكت وفرغت دي تدخل عليك تاني

ده غير انها بتفزع اي سمكة موجوده عن طريق صرختها في المية
يبقى احنا كده فقدنا احتمال اننا نجيب سمك تقيل تاني من نفس المكان

لكن لو انت شغال بسلاح واحد
وركزت على سمكة واحدة في التعامل معاها لغاية وصولها للمركب بفضل الله
حتقدر ترمي تاني علشان اختها اللي موجوده تحت

رابعاً

معظم السمك اللي بسنان سمك بيجري
اول ما تشكمه تلاقيه بيصرخ يمين او شمال
فتخيل ان معاك سمكتين من النوع اللي مش بيتفاهم واحده منهم قفلت معاها انها تروح يمين والتانية راسها والف سيف انها تروح شمال
حتسايس اي واحده فيهم
انا بقول ان احتمال ضياع السمكتين في الحالة دي ممكن يوصل ل 90 %

خامساً

طريقة الصيد نفسها وهي ان لما بترمي على سمك بسنان بتعمل الليدر واير وقبله شعر عادي بطول 5 متر او اقل بحاجة بسيطة
طيب حنعملها ازاي في السبحة ؟؟؟؟؟؟؟؟؟

اما بخصوص لون الشعر وتاثيره فرأيي الشخصي ان السمكة لو جعانة حتدخل على الطعماية ولو رامي بحبل غسيل

لكن لو مش جعانه بنحتاج اننا نتحايل عليها عن طريق الشعر الفلوروكربون او الشعر الخفيف وبيعتمد على خبرة الصياد في التعامل مع السمكة

فيه عوامل ليها تأثير على لون الشعر المستخدم اهمها
هل الصيد بالنهار او بالليل – لون المية – حالة البحر – حالة القمر
على سبيل المثال لا الحصر

انا عن نفسي باهتم جدا بلون وحجم الليدر لكن الشعر الاساسي فاهميته اقل

الخلاصة من وجهة نظري اللي بتحتمل الصواب

لازم نحدد الهدف من استخدام طريقة الصيد عن طريق العوامل اللي بتستدعي استخدامها (نوع السمك المستهدف – اسلوب السمك في الدخول على الطعم – عمق المية – طبيعة الارض – الاوزان المتوقعة في المكان وده بييجي من خبرة الريس وخبرة الصياد نفسه في نفس المكان)

ملحوظة:

برجاء عدم ذكر سمك القراض على انه من الاسماك المستهدفة في الصيد لان ممكن يكون فيه صيادين مش عارفينه وبالتالي ممكن يعتبروه من الاسماك اللي ممكن يطلع عليها

انا اسف اني طولت جدا في عرض وجهة نظري الشخصية
التي تحتمل الصواب او الخطأ واي تعديل عليها على الرحب والسعة

•  ازاى تعمل سبحة جر ..