هذا الكليبس سبب وجوده في الماكينه كما حدده الصانع لحبس النايلون من انزلاقه من علي حله الماكينه و ……
طريقة استعمال الكليبس لضبط العمق !
أولاً حضرتك هتفتح الماكينة و لما توصل للعمق المطلوب هتعلق الخيط في الكليبس الموضح بالصوره
و لما الطعم يتاكل كالعادة 😃 و عايز تغيره تقوم حضرتك لامم الخيط عادي خالص و هو لسه متعلق في الكليبس
و طبعاً بعد ما تغير الطعم … و تحب تنزل لنفس العمق بالضبط ، ما عليك إلا إنك تفتح الماكينة و تسيب الخيط يكر لحد ما الكليبس يوقفه بالضبط مكان ما حضرتك علقته
ولو باصطاد نوع من انواع السمك بين المايتين (المسافة بين السطح والقاع) اللى هو البلاط (الخنزيره) مثلاً ,, ويجب المحافظة على العمق اللى بياكل علية البلاط فيجب الربط على الكليبس وهو مابيقطعش معايا خالص ولا وانا برمى ولا وانا بسقط
الحركة دي باعملها في التسقيط على الوعر …علشان نتفادى التوعير في الصخور كل شويه ،والفكرة مجديه جدا خصوصا لو بنرمي على سمك واكل بين ميتين (زي الموزة والميرا )
و عن رأى شخصى لأنى من هواة إستخدام العصفورة ( الفرامل ) فهى تكون مزعجة جداًَ خاصة فى حالة السمك القوى أو الذى يحتاج مسايسة مثل البلاط و إلا ستضطر إلى ضياع نقطة تحديد العمق وهى تصلح لطريقة المفرمة أو اللم بدون توقف
بالنسبة للرمي Casting (الحداف من الشاطئ) عشان تفك نفس كمية الخيط كل مرة و بالتالي توصل لنفس البعد كل مرة و بكدة تحافظ على المنطقة الي “زفرتها” أو ترجع لنفس النقطة لو فيها أكل كويس
أنا بصراحة لا جربتها في تسقيط و لا رمي بس ما أخبيش عليكم حاسس أنها ما تنفعش في الرمي … لأنك لو إتعافيت شوية أو شوية هوا قاموافي اتجاه البحر و انت بترمي الخيط هيتحاش فيها و ممكن يتقطع …
ملحوظات هاااااااااامه ..
1_ لو سمكة كبيرة دخلت و انت فاتح العصفورة و الخيط فى الكليبس بيتهيألى الخيط هيقطع، لكن ليها حل !! أنك ما تحطش الخيط فى الكليبس الا قبل ما تلم مباشرة.
و لما تنزل الخيط من المكنة لحد علامة الكليبس تنزل الدراع وتشيل الخيط من الكليبس، يعنى تستخدمة فى الطلوع و النزول فقط لتحديد العمق، و الله أعلم.
2ـ تستخدم في تحديد مكان تواجد سمك الخنزيره البلاط وعدم فقدانه بتثبيت الخيط في مكان العثور عليه .
3_ في صيد التسقيط على الغوزيلة ما ينفعش تحديد طول الخيط لسببين
السبب الأول –
أن المركب بيندار ( إندراوة يعني بيمشي مع الريح ) فلو هتحدد طول الخيط ،مع إندراوة المركب ..الرصاص حايطير من على الأرض والسمكة مش حاتخش على الطعم
السبب التاني :
لما السمكة تبدأ تدخل على الطعم لازم تحافظ على الرصاص في مكانه بدون ما يتحرك مع إندراوة المركب ،،وده بيخلينا نسيب الخيط كل شوية ،،علشان نعرف نعبي الأرمة ونطلع بعشر سمكات 😃
