أولا رأيي ووجهة نظري تحتمل الخطأ والصواب بس دي وجهة نظري النظريه والعمليه فالي أتعلمته فالتعامل مع الأسماك الكبيره من فوق 3 ك الي ماشاء الله ….
أولا لاقيت أسأله كتير جدا عن كيفية التعامل مع السمك الكبير وكتير مننا فرقع منه سمك من ربطات سواء ليدر × بريد أو ليدر × الرابلا …. أو تحميل زياده منك علي السمكه يؤدي الي تهتك لحمها أو فرد سن الشلاط الي موجود بالرابلا …
احساس مختلف
التعامل مع السمك الكبير ده أروع شئ ممكن تحسه في عالم صيد الأسماك وأغلب المتطلعين لشراء عدد باهظة الثمن يرغبو في إصطياد سمك كبير للشعور بالمتعه وتدفق الادرنالين بالدم الي بيخليك تشعر إنك في قمة حماسك ومتعتك بالصيد زي طريقة البوبينج علي الجروم والتونه وزي الجيجينج علي الأناشي كمثال ….
مش هتكلم عن توافق العود مع المكنه والبريد والليدر حسب السمك المستهدف … لا
انا هتكلم دلوقتي بالعاميه الي بحب اشرح وأبسط بيها شرحي عشان نستوعب كلنا صغير وكبير
( ألنهارده مسكتني سمكايه ماشاء الله وراحت وبصراحه معرفتش أتعامل )
سؤال متكرر يمكن البعض بيتشجع ويسأله والبعض الآخر بيتحرج يسأل إلا القريبين منه أوي ….
انا بشتغل كاستينج أو سبينينج
– الكاستينج هوه شغل التشويح بالرصاص والطعم عموما من علي الشواطئ أو الحواجز أو الجزر
– الاسبينينج هوه شغل التشويح بالرابلات والطعوم الصناعيه ( رابلات . بوبر . طعوم جيلاتينيه زي الجرينجو كمثال )
أنا شغال كاستينج أو سبينينج ومسكتني سمكه كبيره أول نقطه …
1 . الهدوء …
تكون هادي جدا جدا وماتخافش وماتستعجلش وسد ودنك عن أي حد عامل دوشه حوليك ( براحه . ياعم واحده واحده . خدها يمين كده هاتروح . ياباشا لم كده غلط ) كل الكلام الي بنسمعه كتير وثق في نفسك جدا ولو راحت منك والله هتعرف غلطك فين وهاتتعلم
2 . توقع المفاجأت
لو انت واقف بتعمل سبينينج ومسكتك سمكه فعلا كبيره زي المياس تحديدا لانها سمكه قويه جدا مهما كان حجمها … أوعي تكون قافل دراج المكنه أيا كانت طريقة صيدك وأيا كان السمك الي أنت شغال عليه لان فيه مفاجأت انت لاتتوقعها وبتحصل وحصلت مع ناس كتير جدا …
ظبطك للدراج أول خطوه صحيحه فالصيد ودراجك يتظبط من كيلو ونص الي 2 ك بالكتير أو لو انت متمرس جدا وفاهم بتظبطه بأيدك وده بيتطلب سينس صياد
3 . المسايسه
المساسية هي أهم شئ خصوصا في الثواني الأولي من مسكة السمكه للرابلا بتاعتك لانها لتكون في حالة هياج بسبب الكمين الي وقعت فيه منك وبسبب ألم شكة السلاح ومش معني إني بقولك سايسها يبقي فيه رعونه فاللم لا لازم تاخد بالك أوي من إتجاه الشعر رايح فين وتتفادي الصخور الي شايفهم أو عارف إنها موجوده غرقانه بحكم دراستك للمكان ده
4 . هام
حذاري حذاري تنيم وش البوصه في وضع أفقي وأنت معاك سمكه كبيره لانك بكده بتلغي وجود البوصه خالص وبيكون قوة السمكه مباشرة علي الشعر من أول الرابلا حتي بكرة الشعر فالمكنه وبيكون إحتماليه قطع الرابطه مع صرخة فوقان للسمكه أقرب في أي لحظه
6 . طول ما انت موقف البوصه رأسيه طول ما اللبلوب مقوس ومتني عامل سوسته مع صرخة السمكه وشدتها وده بيديك ولو ثواني بسيطه راحه تعرف تحرك أيدك بشكل مرن وسلس مع لمك للشعر ورد فعل السمكه المفاجئ فالجري
6 . هام
تعبتها وفرهدتها وجايه ناحيتك خلاص حذاري حد قريب أو غريب يمسك منك الشعر ويرفع السمكه بأيده كده أنت برضه شيلت وزن السمكه الي لسه حيه وممكن تعمل حركه في آخر نفس ليها بقوه وتتحرك بشكل مفاجئ وتفلت من السلاح ( حصلت كتييييييير جدا كلنا عارفين )
يبقي ملقاف السمك في عدتك أساسي والي هايلقفلك يتفضل مشكورا يلقفلك بسلام 😊
7 . هام جدا
طول ما انت مقوس وماسك فالسمكه حااااااافظ جدا ان شعرك يكون طوووووول الوقت مشدود بلغة الصيادين ( خليك محرب علي الشعر ) خصوصا فالصيد بالسنار لان مش ديما السلاح بيكون معشق في فم السمكه وكتير مننا بيرخي الشعر غصب عنه أو عن قلة خبره
وده بيزود فرصة ضياع السمكه بشكل كبير لان إرتخاء الشعر بيسمح للسمكه إنها تاخد قسط من الراحه ولو بسيط تستعيد قوتها للحظة فوقان قويه وتصرخ منك وتشد الشعر فجأه وتكون النتيجه الشعر يفرقع او السمكه تفلت من السلاح او شلاط الرابلا والكلام ده تفصيليا وعمليا بالفيديو أسفل البوست اتمني تركز فيه طول ال 14 دقيقه الشعر مشدود هتعرف ان كلامي صح 😊
8 . هاااااام
حذاري جدا وتواخي الحذر الشديد من مسكك للرابلا أثناء تسليك السمكه ويتم مسك السمكه من الخياشيم بقوه ولو معاك بنز مدبد ببوذ طويل ياريت أو لو معاك أيا من أدوات الصيد المتخصصه في تسليك السمك يبقي أنت كده في أمان بأمر الله وبالنسبه للمياس والدراكات تحديدا لو معاك جوانتي سميك يكون افضل ربنا يبعد عنكم أي مكروه
البوست من واقع خبرتي البسيطه وليس منقول منه حرف و آسف بجد إني طولت عليكم وأي تعديل أو إضافه أرحب بيها جدا أنا مازلت أتعلم من الكل ومرفق كليب لي بيوضح نوعا ما كيفية التعامل العملي مع السمك الكبير أرجو يكون واضح فيه البنود الي ذكرتها.
