كنت سألت سؤال من يومين عن أن السمكه تمنع في المكان المعتاد ليها ان كان في بركه او منطقه بين الوعر ان كانت رمايه او صخريه ونلاقيهم شغاله في المنطقه اللي حواليها على غير العاده
اكتر ناس قالت ممكن يكون فيه قرص او بمعنى أصح فيه تواجد لمفترسات اكبر في الحجم في المكان
وناس قالت إن تضاريس القاع ممكن تكون اتغيرت ان كان ده بعد نوه او ما شابه ده
والمايسترو كتب في اجابته النموذجيه اجابه كانت بين السطور لكنها ممكن تكون الأقرب الحقيقه وهي ((( درجات الحرارة ))) وخصوصاً اليومين دول لاننا في بدايه الانقلاب بين الربيع والصيف
وبنلاحظ في الفتره دي على الأخص تطرف كبير في درجات الحراره بين يوم واللي بعده او اسبوع واللي بعده
الشمس المباشره وطبعا ده عشان الانقلاب الربيعي وزياده تعامدها عندنا
التفاعلات اللي تمت في البحر بسبب النباتات البحريه وموتها بتولد حراره ود طبعا اللي بيعقبها ظاهره غسيل البحر وخروج النباتات دي ميته ومتحلله
طب هل ده يأثر بشكل مباشر على نشاط وسلوك السمك؟؟؟
لازم نعرف ان درجه الحراره وتوفر الاكسجين بالنسبه للأسماك هما اهم عاملين بغض النظر عن أي عوامل تانيه
ونعرف انه بياثر بشكل جذري لأسباب كتير تعالو نفنطها سوا :-
– لو القاع رملي
بحت ممكن نلاقي ان فرق درجه حراره الميه بين قاع البركه والمناطق العاليه اللي حواليها يوصل ل ٥ درجات مىويه وده طبعا بيفرق جدا مع الأسماك ونشاطها ونلاقي ان الأسماك بصفه عامه هتروح للمكان المناسب ليها في درجة الحرارة على طول حتى وان كان العمق اقل بكتير من المناسب ليها وعلى فكره بتفرق بين رمل خشن او ناعم في درجه الحراره ودايما بتكون الرمال الناعمه درجه حرارتها اقل
– لو القاع رملي وصخري
ده هنلاحظه جدا في البحر الأحمر خصوصا وقت الجزر اننا لو نزلنا البحر هنلاقي ان المناطق الصخريه درجه حرارتها اقل بكتير عن المناطق الرمليه حتى لو لازقين في بعض وممكن فرق درجه الحراره يوصل ل ١٠ درجات مئويه وده انا شوفته بعيني في البحر الأحمر اني كنت بلاقي أسماك هربانه للمناطق الصخريه لأنها مش قادره تتحمل درجه حراره المناطق الرمليه واللي ملحقش يهرب مات مكانه
_ لو القاع صخري بحت
هنلاقي ان الأسماك بتهرب للمناطق اللي عمقها قليل لان درجه حرارتها اقل بحكم ان سطح الميه معرض لعوامل الريح وبالتالي بيكون درجه حرارته اقل
– لو القاع شعب مرجانيه
بيكون طبيعي درجه حرارته ملاىمه اكتر ما يكون لحياه معظم الأسماك لان الشعب كاىنات حيه وبتقدر تحافظ على درجه حراره نفسها في أغلب الظروف ما عدا فترات ما قبل غسيل البحر لأنها بتكون مردومه ببقايا الكائنات المتحلله (الروبه) زي ما بيسميها الصيادين
– لو بستخدم طعم غير مناسب
من الطبيعي ان كل نوع سمك له الطعم اللي بيحبه وبيقبل عليه وبالتالي لو كنت بتستخدم نوع معين (غير مناسب) من الطعم في منطقة بها أسماك تتطلب نوع أخر من الطعم فلن تقبل على الطعم وستتمنع عن السنارة.
لذلك من المهم أن تستخدم الطعم المناسب في المكان المناسب
وماننساش أن كده كده درجه حراره المياه في زياده مستمره كل سنه نتيجه الاحتباس الحراري على مستوى بحار العالم وده بدأت التحذيرات منه من فتره
حاجه اخيره اقولها ودي خاصه بصيادين التسقيط في المراكب لكن في الاعماق الكبيره والغزير خصوصا فوق ال ٣٠٠ متر عمق في شهور معينه بعينها زي بدايه شهر ٧ انهم بيلاحظوا أثناء الصيد خروج الرصاصه سخنه جدا وكانها كانت محطوطه على نار
اقولهم ان ده نتيجه التشبع الحراري للميه واللي بياخد شهور لحد ما يوصل للقاع ويوصله لكده وبالتالي بياخد شهور لحد ما درجه حرارته تنزل تاني
