المرحلة الأولى
شراء الزودياك (ودي أسهل مرحلة 🙂 بعدها تيجي مرحلة التفكير في تجهيز الزودياك بمستلزماته وأوراقه وشرحها جاي
المرحلة الثانية
وهي استخراج رخصه قياده عائمة بحريه ودي مهمه جدا علشان تصريح المخابرات
وكمان علشان تتعلم قياده الزودياك ودي تكلفتها 4000 جنيه
عندك مكتب المرحوم محمد موسي ومديرة المكتب علي الفيس وهي الاستاذه هند وصفحتها اسمها حلم عمري
أو الأستاذ عبد الخالق في نادي يخت القاهره خلف محكمه هيئه قضايا الدوله قبل شيراتون القاهره علي النيل
المرحلة الثالثة
مرحله شراء المحرك ويفضل ياماها قدرة من 15 حصان حتي 25 حصان
وأفضل الـ15 حصان حيث أن اعطاله بسيطه وصيانته وقطع غياره رخيصة
توجه الي المطريه المنزلة حيث أن الأسعار متفاوتة وتبدأ من 13 الف حتي 16 الف ده بالنسبه لمحرك قدره 15 حصان
المرحلة الرابعة
مرحله ترخيص الزودياك ودي تكلفتها 3600 جنيه شامله فاتوره الزودياك وفاتوره المحرك
حيث أن الفواتير يجب أن تكون من شركه معتمده من التفتيش البحري وكل التراخيص بتتعمل من اسكندريه لكي تكون الرخصه جميع الشواطئ في وقت حوالي شهر تقريبا يعني لو عملتو الرخصتين القياده والزودياك مع بعض يكون أفضل بالنسبه للوقت لغاية كده تمام
المرحله الخامسه
وهي شراء حبل البروسي وده سعره من 40 الي 50 جنيه للكيلو هات ابو 50 جنيه
أفضل هتشتري اللفه كامله حوالي 12 كيلو يعني انت معاك 215 متر علشان لو فيه مكان غزير
مقاس الحبال فيه 10 مم وفيه 12 مم يفضل ال 10 مم لأنه طري ومناسب وهات الحبال بلاستيك احسن من الحرير لأن الحرير بشيل مياة ويبقي تقيل وهو طالع إنما البلاستيك بيبقي خفيف وهو طالع
المرحلة السادسة
البروسي أو الهلب ياريت يكون معاك 2 بروسي واحد 7 كيلو وواحد 10 كيلو
فيه 6 ازرع قابلين للفرد علشان لو البروسي وعر مش هتقدر تطلعه زي المراكب ما بتعمل وبتربط الحبل وبتمشي بالمركب لغاية ما يطلع البروسي دون مراعاه للشعب المرجانيه وما تسببه من دمار للبيئة
المرحلة السابعة
بعد ما تخلص اوراقك مما سبق ووضحناه تقوم بتصوير شهاده القيد ودي هتستلمها مع تصريح الملاحة (الرخصه ) وشهادة التأمين الإجباري وصور الفواتير بتاعه الزودياك والمحرك كما سبق واشرنا اليها
وتقوم بعمل فيش وتشبيه لصاحب الرخصه الي انتو هتختاروه لأن رخصه الزودياك ورخصه القياده هتكون باسم شخص واحد من الفريق
وتصور كل مستند 3 صور وتتوجه الي المنطقه المركزية الي انت عاوز تنزل فيها وتقدم الأوراق دي الأصل للاطلاع عليه
والصور لاستخراج التصريح لمده 3 شهور بتكلفة تقريبا 250 جنيه
المهم أن الفريق يكون مكون من 4 أفراد أو 5 أفراد علشان التكلفه كلها هتوزع علي المجموعه كلها أهم حاجه تكون المجموعة متفاهمه وأصدقاء يكون أفضل واتمني لكم الاستمتاع بالصيد
نصيحه من أخ أكبر لكم
فيه ناس هحاول تحبطك وتقولك يعني هو انت بتفهم في البحر !!
أحب اقول ان اشطر رؤسة البحر خدوها بالممارسة يعني متخافش انت مش داخل في عرض البحر انت يادوب حوالي من 500 حتي كيلو واحد داخل المياه مش كمياء يعني
ومتنساش تشتري للمجموعة جاكت لايف من عند بدر ستار لأنه أرخص واحد بيبيع جاكت لايف وده للأمان
واختار الأيام الي الهواء فيها قليل وكل ما تطلع للجنوب هتلاقي الهواء قليل .
