اساسيات الصيد علي كوبري أستانلي

العدة المناسبة للصيد من كوبري ستانلي :-

بالنسبة للماكينة المناسبة الفايكنج أنا شغال بيها هناك تمام

العود هيختلف على حسب نوعية السمك اللي رامي عليه

• لو هترمي على دنيس هتحتاج عود طويل 5 متر عشان تطوح بيه جوه
  
• لو هترمي على الشراغيش أو الموزة 3.5 متر هيبقى خفيف ومريح معاك
  
• لو مش هتشتري غير عود واحد بس يبقى هات 5 متر هيشتغل معاك في الناحيتين
  

العود الصب بتاع التسقيط مش هينفع لو عايز توسع جوه بالتالي هتستخدم عود شاطيء وده هيشتغل معاك سواء هتسقط بيه تحتك على طول أو هتوسع
وفقاً لميزانية 400 جنيه

مثلاً:

هتشتري عود صيني ماركة دولفين – مادنس تيلي 4.5 متر وهو ممتاز على فكرة

الماكينة الفايكنج هتعمل معاك حوالي 250 جنيه أو 300 لإني مش عارف الأسعار حالياً عاملة ازاي بعد ارتفاع الدولار بس لازم تتأكد إن الفايكنج كوري مش صيني..

• هتعرف ازاي؟

بص على دراع الماكينة اللي بيركب في العود لو لقيت محفور عليه كلمة كوريا يبقى كوري.. لو كلمة كوريا مطبوعة مش محفورة يبقى صيني ( العود هيعمل معاك 100 جنيه تقريباً )

كده احنا ظبطنا عود كويس وماكينة كويسة في حدود ميزانية متوسطة

الشعر اللي هتحطه 35 وعندك انواع كويسة كتير أنا شخصياً بفضل روكا هو شعر كوري
وبالنسبة للأرمة هتحط شعر 20 وأنا شخصياً مؤخراً بقيت احط شعر 15 بس ده محتاج تدريب عليه شوية فانت ممكن تحط 20 أو 25 عادي

نيجي بقى بالنسبة لأماكن الصيد، وبتكون عادة في البحر المفتوح

عندك الوعر اللي على أول كوبري ستانلي والوعر اللي على آخر كوبري ستانلي لو هتصطاد شراغيش

اللي شغال أحسن الفترة دي الوعر اللي ناحية نادي المهندسين مش اللي ناحية سيدي جابر

وسط الكوبري رملة ودي ممكن تشتغل فيها على المرمار لما بيبقى حاضر

أنواع الاسماك المتواجدة حاليا

الشراغيش:

هتقف على الوعر اللي قلتلك عليه.. الشراغيش الكبيرة الفترة اللي فاتت كانت موسعة مش تحت الكوبري.. وساعات بتبقى موجودة تحت الكوبري عادي بس حالياً اللي تحت الكوبري جناشير وموزة.. بالتالي هتقف على حروف الوعر مش الوعر نفسه لإن الوعر حامي قوي هناك وهتخسر رصاص كتير..

ممكن تسأل الصيادين اللي واقفين هناك حروف الوعر فين لو البحر عالي والوعر مش باين لحد ما تاخد خبرة المكان.. هتوسع على قد ما تقدر عشان ترمي بعد الوعر بحاجة بسيطة عشان الوعر.. كمان وانت بتلم سواء معاك سمكة أو لأ هتلم بسرعة قوي وده هيخليك تتفادى الوعر اللي في السكة وانت بتلم.. وسيب شوية بوش ماتخليش الشعر مشدود على الآخر عشان ماتوعرش منك..

هتحط رصاصة 4 عشان تجيب معاك المسافة دي.. ولو الشراغيش الكفافي حاضرة تحت الكوبري هتسقط تحتك على طول برصاصة 1 لو البحر مريح ورصاصة 2 لو مشخشخ ورصاصة 4 أو اكتر لو البحر عالي.. أرمة الشراغيش هناك هتعمل فرعين طوال فوق الرصاصة على صنار 10 كفتة.. وممكن تعمل سبحة لو بتصطاد الصبح وهتسقط تحت الكوبري

أما لو هتوسع او هتصطاد بالليل يبقى فرعين بس أو فرع واحد.. هتلاقي صيادين يقولوا لك الصنار ده صغير لو الشراغيش الكبيرة حاضرة.. ماتسمعش كلامهم.. 10 كفتة بيجيب أي حجم من الشراغيش الموجودة على كوبري ستانلي وميزته إن السمكة بتبلعه فمش بتعرف تفرغ منك.. أما الصنار الكبير هتشففه مش هتبلعه.. الطعم اللي هتستخدمه البرغوت والعقر لازم يبقى معاك الاتنين

الدنيس:

أحسن مكان له.. هتيجي من ناحية سابا باشا.. هتعدي من تحت البرج وتفضل ماشي لحد أول فانوس.. ده بيبقى فانوس كبير متعلق عشان الاضاءة.. ارمي هناك.. الأرمة المستخدمة شعر أساسي 35 وأرمة 30 عشان فيه دنيس هناك أحجام حلوة.. رصاصة 6 أو 8 عشان تطوح بيها بعيد على حسب حالة الميه.. هتطوح لأبعد حاجة تقدر عليها عشان الدنيس موسع قوي..

هتخلي الرصاصة حرة يعني هتحط الرصاصة في الشعر من غير ما تقفل عليها وتربط تحتها مدور وتحته فرعين 25 و30 سنتي.. وصنار 5 أو 6 كرش.. فيه برضه صنار عند محل آل فهيم في سابا باشا اسمه circle hock ده فوق الممتاز احسن من الكفتة والكرش..

• طب ليه انت بتسيب الرصاصة حرة فوق المدور مش بتربطها؟

عشان الدنيس لما يسحب الطعم مايحسش بالرصاصة لإنه بياكل ويتف ويرجع ياكل تاني.. فكده الشعر بيتسحب من غير ما يشد الرصاصة عشان ماياكلش ويتف ويحس بالرصاصة يقوم هربان منك.. والطعم اللي هتستخدمه دود بحر ده رقم 1 مع الدنيس هناك ويليه الاسماعيلاوي وهتلاقيه موجود في سوق الميدان عند الحمامصي

الموزة:

هتشتغل عليها بصنار رجل دبانة 24..  وده هتلاقيه عند السبخي..

اعمل سبحة 6 فروع عشان الموزة لما بتبقى حاضرة بتدخل اسراب..

وارمي تحتك على طول ماتوسعش جوه.. وخليك واقف في الاماكن اللي قلتلك عليها للشراغيش..

• هتعرف منين ان الموزة حاضرة في الميه؟

لما تلاقي البرغوت يطلع معاك ممصوص.. يعني تلاقي القشرة بس..

وطبعاً من طريقة الضربة بتاعته في الميه مختلفة عن ضربة الشراغيش بس الطريقة الأولى اسهل..

والطعم برغوت.. هتخلي الشعر بتاعك مشدود على الآخر واللبلوب متني شوية هتلاقي رعشة جامدة في اللبلوب اشكم واسحب في الموزة على طول

الكاليماري:

الموسم بتاعه من آخر شهر اكتوبر.. وده هتطلع له بالليل بعد المغرب.. ولازم يكون الميه حصيرة وكاشفة خالص.. ويفضل في الليالي اللي بيبقى القمر مكتمل فيها بس مش شرط.. هتشتري رابلا صيني مقاس 3.5 من النوع اللي بيبقى كله بينور مش ديله بس.. اللي هي رابلا قماش..

وهتلاقيها عند آل فهيم ومحلات الصيد عموماً.. هتشحنها بالضوء قبل ما تستخدمها.. حط فلة شمندورة وتحتها بمتر ونص اربط الرابلا بتاعتك على الشعر الأساسي اللي هو 35..

ارمي واسحب ببطء وماتغيرش من سرعة السحب بتاعك او انك تسحب وتوقف.. طبعا هترمي الرابلا موسعة جوه خالص على قد ما تقدر وتسحبها ببطء زي ماقلتلك بنفس السرعة من غير توقف وتخلي اللبلوب بتاع العود بتاعك نازل تحت ناحية الميه مش مرفوع لفوق عشان حركة الرابلا تبقى مظبوطة شبه حركة السمك في الميه..

هتلاقي فجأة وانت بتسحب فيه تقل جامد معاك.. ساعتها استنى ثواني عشان الكاليماري يمسك الرابلا كويس وبعدين اشكم جامد واسحب الكاليماري بتاعك.. وخلي بالك هو مش بيضرب زي السمك انت بس وانت بتلم بتحس بتقل جامد فجأة..

أما المكان اللي هتقف فيه فأحسن مكان للكاليماري هناك على حروف الوعر اللي موجود ناحية سيدي جابر..

بس خلي بالك عشان المكان ده بيبقى زحمة قوي لما الكاليماري بيبقى حاضر وممكن تشبك مع الشعر بتاع اللي بيصطادوا جنبك كتير لو مش مخلي بالك ومحدد اتجاه رميك كويس .