الشكم او اللكع بيختلف من سمكة لسمكة ,, ومن نوع لنوع وحسب الحجم , وهل السمك بالع ولا بيلعب لسه بالطعم وطريقة اكله وهل هو صغير ام كبير والتقويسة نفسها
كل دة بيتوقف عليه طريقة او اسلوبك فى الشكم وهل انت ماسك على ايدك ولا مريح العود ومستنى الضرب , وسلوك السمك فى اليوم الواحد ثابت ولا متغير ,
مثلا .. ممكن الدنيس يكون بالع بسيبه ياكل ومش بحتاج اشكمه وفيه اوقات بيمشى بالطعم ولو رديت فيه مش بتلاقيه
او بياكل ويجى معاك بعد ماترد عليه ويسيبك فى نصف المسافة ويخليك تشد فى شعرك 😅 وتهبد على الارض وتفزع باقى السرب ناهيك عن انه صرخ بعد الشكة ,
تحديد الهدف
انا باوصل المصيد وبسمى الله وبستهدف سمك معين وبعمل قرمتى وسلاحى المعين والطعم ايضا على فكرة بيحدد اذا كنت هاترد بسرعة ولا هاتستنى عليه وخصوصا لما تكون الطعماية خشنة لانه مش من المعقول تكون رامى بجرايه واول ماتنضرب تشكم …
انسى بكدة انت بتقول للسمكة اهربى وهناك السمك اللى بيكون بالع ونايم كل دة محتاج منى رد فعل مناسب فى الوقت المناسب وبجمع كل دة فى دماغى فى ثانية او اتنين.وبعدها ببدئ اعمل الاكشن المطلوب , ولازم علشان اتكلم يبقى اخد كل سمكة واتكلم عليها ارد فيها ازاى ,
البوري و الدنيس
انما اكتر سمكتين ممكن نتكلم عليهم هم البورى والدنيس لان البورى مهما كبر حجمة فاسلوبه فى الاكل شكله ايه؟
سمكة حذرة جدا وبتشفط فى الطعم بل بتلحس فيه علاوة عن حجم الفم الصغير وسلاحى اللى انا شغال بيه هايسعفنى ولا بتحس بيه بالرغم من انى حاسس بانها تحت طعمى وكذلك الكارب بتضرب الاول الطعم بديلها فكل ده محتاج منى ذكاء وتشغيل دماغ
والدنيس بميت حالة مرة ياكل ويبلع وينام ومرة يضربك ضربة ويسيب ومره اخرى يمسك الطعم و يمشى بيه ومرة يهبد ويخطف ومش محتاج منك اى شئ غير انك تجمع عليه وتجيب السلاج من معدته وكتير فى بداية ظهوره بيضرب ويجى معاك ويسيبك
الفعل ورد الفعل
كل دة لازم يوضع فى الحسبان وكلها عملية حسابية مش بتاخد منك غير كسر من الثانية للقيام بالرد فعل المناسب والوسط للشكم
لو سايب العود وشوفت الضرب من الطبيعى انى فى لحظتها بمسك العود والم البوش او احرر على الخيط واجر واحدة ولقيتها معاية بلكع بالهداوة فى لحظتها وفى احوال الم البوش وهى تاخد وش العود لتحت برضه اخدها واحدة خفيفة العكس ,
غير الكاستينج دايما اللكع بيبقى على جنب علشان دايما السمكة بتضرب اللور بجنب حنكها وهكذا , يبقى الشكم غير ثابت على حال او شكل واحد وكل حالة بحالتها وكل يوم بحسب سلوك السمك بالع مشفف هاجم بيلعب وهكذا
طبيعة الطعوم وتأثيرها على عملية الشكم ؟؟
كما نعلم جميعاً تنقسم الطعوم إلى :
١-طعوم صلبه
- كابوريا بانواعها واحجامها (سليمه او مقطعه)
- سبيط
- جراجولا
- بقاليديس
- قواقع بانواعها
- قلوب فراخ
- بطارخ خرز بتاعه الرنجه
مع هذا الطعم لا تقم بالشكم او الرد من اول مرة مع اول ضربه
خلي البوصه علي ايدك ومع الضربه التانيه او التالته استفتي قلبك وصوت دقته لو قالك رد رد مش بقوة ردة خفيفه مع لم البوش بسرعه
٢- طعم الديدان
كل الديدان بانواعها مع اول ضربه رد بسرعه وقوة متوسطه لان السمكه في الغالب معلقه لان الدود بيركب علي السلاح بنفس شكل السلاح فكأنها بتاكل السلاح فاضي
٣- طعوم الجمبري
(الميت او مملح او مقشر ) يفضل اظهار سن السلاح من الجمبرايه والرد مع اول ضربه بقوه وسرعه
٤- الجمبري الحي
(شطنارة عقر برغوت جمبري صيني (زي الشطنارة بس شنبه طويل ) جمبري رابسو زي العقر بس منقط وفي ناس بتسميه اسكنش
كل الجمبري الحي بأستثناء البرغوت بتحتاج صبر وقوة ملاحظه ودقه لان السمكه بتمسك الجمبرايه وتمشي بيها واول ماتحس بأعاقه بتسيبها عشان لازم نحس انها مسكاها ومصممه عليها وهنا بلم لمه خفيفه للبوش بحس ان السمكه وخداني ولا سايبه الطعم لو وخداني ارد بقوة وسرعه مع اخذ في الاعتبار حجم السمك والدراج المفتوح لان سمك الجمبري الحي غالبا بيكون احجام والملقاف طبعا
٥- الطعوم المملحه
زي السردينيلا والسردين وغيرة بتحتاج رد وشكم قوي لانها اول ماتنزل الميه بتبوش بسبب الملح فبتكون طريه والسمكه بتكلها بسهوله
٦- طعم الشرايح
(المياس وغيرة ) شكم ورد قوي جدا مع الانتباة لفتح الدراج وطيران السمك واتجاهه ناحيه الصياد بسرعه سرعه لم وعينك علي اتجاة الشعر والسمكه
٧- الطعم الحي
السمك (بوري بساريا مكرونه جعير كبريت زنجاريا زلغانه مرمار موزة اي سمك حي )
رامي علي الارض ولا عايم محتاج تركيز عالي
اولا انت رامي علي ايه؟
- اناشي
- قاروص
- وقار
- دراك
- سكمتشه
- مياس
كل السمك رد فيه بقوة وحنيه
يعني تكون جاهز للمسايسه الا الوقار لو وعر سباق بينك وبينه هو علي الوعر وانت علي الايس بوكس لو رمله العب واتمتع
٨- الاسماك الغلبانه
زي المرمار والنقط (ال ياما سترونا )
جرجر ولم وانا بصطاد النقط بسبحه ٣ كفته بدون طعم المهم يكون بيلمع اوي
الموضوع طويل لكن كل اللى نقدر نركز عليه هو .. !!
- نوع السمكه واسلوبها
- اتجاه التيار
- اتجاه الريح
- نوع الطعم
- شكل السنار
- ليونة العود
- السمكه ماسكه ايه فى الدور سطح او بين الميتين او غاطس
- طول الرمال إللى انت شغال بيه
- شغال حداف اوفله
- نوع الطعم
