الساده الاعضاء الكرام نظرا لتكرار الاسئلة عن مواسم صيد الاسماك والرابلات المستخدمة او المفضل استخدامها خلال هذه الفتره ، سوف نقوم بمناقشه الموضوع من عده جوانب مع الشرح التفصيلي لكي تكون الامور واضحه وسهله خصوصا للاعضاء الجدد :
ما المقصود بموسم صيد الاسماك :
كما هو المعتاد بتسمع كلام صيادين كتير بتقول ده موسم مياس ، موسم قاروص ….الخ : فالموسم هو فتره بتكثر فيها الاسماك وبتكون نشطه وعدائيه وذلك لعده عوامل اهمها التالي :
- ١- الهجره الي تيارات المياه الدافئه للتزاوج .
- ٢- تواجد الاسماك التي تتغذى عليها بكثره والجزئ ده انا حابب اشرحو ب التفصيل .
هناك معادله حسابيه وتتبع للاحداث يحدث في وقت معين من السنه وبيكون هناك عنصر اساسي مسؤل عن هذه المعادله لمعظم الاسماك المستهدفه بطريقه الكاستنج
وهو ( السردين ) هجره السردين احب الطعوم لجميع الاسماك ،
المعادله بتقول :
تواجد اسماك السردين # يتبعها دخول اسماك مهاجمه مثل :
- ميره
- شجاره
- مغازل
- دراك
- اناشي
- لمبوكه (حصان)
- مياس
النتيجه من المعادله السابقة :
- ١- السردين كان نقطه البدايه وقد ادى الى دخول اسماك مهاجمه ( ميره ، مغازل ،شجاره)
- ٢- المغازل والميره ادت الي تواجد اسماك مهاجمه اكبر ( مياس ، اناشي، دراك)
مواسم الاسماك المهاجمه :
المياس :
من شهر ٤ الى شهر ٩ يفضل استخدام ربلات كبيره الحجم من ١١ سم الى ١٨ سم
وتلاحظ هنا ان السمكه ده بيحب الربلات الكبيره لانها اقرب ما تكون الي حجم المغازل ، المعالق بريش ابيض للاحجام المتوسطه ظ(قشايط) ، بوبرات من ١٠ الي ١٦ سم
الاناشي :
من شهر ٦ الى شهر ٩
الدراك :
هناك موسمين للدراك
- الموسم الاول للدراك المتوسط الحجم والتي تتراوح اوزانه من ٣ الي ١٠ كيلو من شهر ٤ الي شهر ٧ ويطلق عليه الصيادين (صواريخ) ويفضل استخدام ربلات كبيره الحجم من ١٢ سم الى ١٨ سم
- الموسم الثاني من شهر ١٠ الي شهر ٢ وده موسم الامهات الاسماك الكبيره .
الشجاره :
من شهر ٤ الي شهر ٩ يفضل استخدام ربلات من ٩ الي ١٢ سم والمعالق الفضي والذهبي .
الميره :
من شهر ٣ الي شهر ٩ يفضل استخدم ربلات من ٧ الى ٩سم ، والمعالق الفضي والذهبي .
المغازل :
يوجد لها موسمين الموسم الاول من شهر ٤ الي شهر ٨
الموسم الثاني من شهر ١١الي شهر ٢. ربلات من ٥سم الى ١٢ سم
الوقار (١١١) :
من شهر ٤ الي شهر ٧ يفضل استخدام ربلات غرقانه من ٩ الى ١٢ سم
اللمبوكه ( الحصان) :
من شهر ٩ الى شهر ٣ يفضل استخدام معالي فضي بريش ابيض وربلات من ٩ الى ١٨ سم
الكبريت (بلميطه) :
من شهر ٧ الي شهر ١١، افضل طريقه لصيده هي المعالق بجميع الوانها واشكالها وربلات من ٩ سم الى ١٨ سم
القاروص :
من شهر ٩ الى شهر ٣ ربلات من ٧سم الى ١٣ سم ، الجرينجو ( بلاك مينو او ساند ايل على سبيل المثال )
اللوت :
من شهر ٩ الي شهر ٤ ربلات من ١٢ سم الى ١٨ سم ، جرينجو ( علي شكل تعبان البحر)
نصائح للصيد بالرابلات
الاسماك المهاجمه موجوده طول السنه عشان كده حبيت اوضح كلمه موسم في البدايه ،لان في اسماك كتيره مسوطنه وموجوده طول السنه يعني مفيش حاجز و لا ميناء في اسكندريه مفيش عليه قاروص مثلا
الفكره ان السمك بيكون نشط في فترات وبيهاجم الربلات وفي فترات اخرى بيكون في مرحله تفريغ البيض
وعاده الاسماك في هذه الفتره بتكون في مرحله صوم وخمول وتكتفي ببعض الطعام الخفيف ولذلك دائما ما تجد ان احسن موسم لصيد الاسماك هوه الفتره التي تكون بعد وضع البيض مباشره ، لأن السمكه في هذه الحاله بتكون محتاجه للطعام وفي غايه العدائيه والنشاط .
دائما اعتمد علي الواقعيه وحركه ولون الربلات التي سوف تستخدمها اختار حاجه شكلها شبيه للطعوم اللي بتهجم عليها الاسماك ،
الكاستنج ممارسه ومع الوقت انت بنفسك حتكتشف طريقه او حركه معينه بتستفز السمك اكتر وتخليه يهاجم مهما شوفت فديو مصور او قريت محاضره انت كده حققت ٥٠٪ والباقي حيجي ب الممارسه ،
دايما جرب الجديد وغير ألوانك والمقاسات اللي بتسخدمها لان الموضوع مش قاعده لازم تمشي عليها مش عشان اخد سمكتين برابلا يبقى تفضل شغال بيها علي طول وكمان تروح تشتري ٥ او ٦ من نفس الشكل واللون وتقول شغاله اغيرها ليه ،
قصة قصيرة واقعية
من ١٠ سنوات كنت بطلع اصطاد مياس علي الوعر والجزر اللي ورا المنتزه مع صياد كبير و مخضرم وكنت جايب ربلات جديده من امريكا لسه منزلتش مصر ، المهم ان الصياد الكبير ده بص للرابله وقلي معاك كماشه او بنز ؟؟؟ سؤال غريب ؟؟
انا قلتلو معايا اتفضل راح كاسر الدفه بتاعت الرابله الجديده وقلي قول بسم الله وارمي !!! انا طبعا جالي انهيار وازاي نعمل كده انتي بتفهم اكتر من يازوري ورحت شايل الرابله
اللي كسرها وحطيت وحده جديده بدفه ، اول ما رميت وعرت علي طول ، رحت رامي تاني مره وعرت بردو وكل ده الراجل ساكت ومبيتكلمش !!
بعديها قلي حط الرابله اللي كسرت الدفه بتاعتها وارمي ، وبعديها ابتدت المجزره سمك ورى بعض !!!!!!
الفكره ان السمك ماسك تحت الوعر ولما تكسر الدفه وترمي فوق الوعر وتلم الرابله بتعوم علي الوش والسمك وراها .
المغزي من هذا القصه لراجل صياد بسيط حتي لا بيعرف يكتب ولا يقرأ انه اضاف تعديل علي اكبر شركات الطعم الصناعي في العالم لكي يخدم ويحاكي طبيعة البيئه اللي يصطاد فيها .
