أفضل مواسم الصيد بالغلة
يبدأ موسم الصيد 🎣 بالغله من شهر مايو ويستمر حتى شهر اكتوبر حتى يبدأ في التراجع في دخول السمك وذلك مع برودة الجو..
وخلينا نتفق ان مافيش قاعده ثابته في الصيد وده رأيي الشخصي البسيط 🤔🤔
اولا طريقه تجهيز الغله….
١- النقع
وبيكون لمده يومين إلى ثلاثه وطبعا ده بيكون قبل طلعة الصيد ونلاحظ هنا أن الغله المستخدمه لابد أن تكون بالقشره … يعني بتاع الحمام مش بتاع البليله 🤣🤣
وده بعد ما اكون غسلتها كويس وتخلصت من الشوائب اللي فيها ولابد من اختبار الغله بدءا من اليوم التاني للنقع لتحديد درجة السوا وبعد ما اتأكد انها تمام احفظها في كيس اوعلبه بلاستيك في التلاجه
٢-السلق
وده طبعا بعد ما اكون جهزتها بنفس الطريقه السابقه ويجب أن ننتبه حتى لا يزيد السوا وتفشر وبكده لا تصلح للصيد
وعند الوصول لدرجة النضج المتوسط بعرضها لميه ساقعه علشان نبردها ونصفيها ونشيلها بنفس الطريقة السابقه 👌
العدة المستخدمه للصيد بالغلة…
عود بين الرقع والجبر والاساس 35 ورمال 25
طول الرمال لا يزيد عن 50 سم
الغماز …. أصغر حاجه عندي شكل رقم… 1
او ممكن سلك الدش… شكل رقم…. 2
وبالنسبه ليا انا مش بحط رصاص انا باستخدم مدور بس بدل الرصاص….. شكل رقم… 4
حد هيقولي الغماز هيبقى نايم على الميه 😒ققوله ده المطلوب اني اخلي المقاومه اقل حاجه ممكنه لما السمكه 🎣 تيجي تجس وتسحب الغله ومع اول حركه للغماز سمي الله ورود عليه 💪💪
السنار المستخدم ….
في ناس انا شوفتها بتصطاد بسنار… 9 وحتى سنار 2…..و….3….
لكني شخصيا افضل سنار… 5 او 6 ويفضل يكون عسلي او اسود علشان ميلمعش ويبان في الغله…
شكل رقم….. 3
تجهيز الدور للصيد بالغلة
اختار الدور اللي هتقعد فيه وجهزه واختار دورين تاني علشان ابدل فيهم لما الدور يريح
وهنا بعمل مرايه بكبشه بحجم قبضه اليد على بعد ربع متر من الجرف وبعدين اعمل زي هلال حولين المرايه لجوه شويه علشان اسحب السمكه عليا شويه 🤣🤣
ملحوظة….
السمك بيحب اللي يلاعبه ويثيره وينكشه 🤣🤣
ولازم تفتح نفسه…. يعني المرايه والهلال اللي هعمله لازم أضيف عليهم شويه تحابيش زي العلف والبادي والخميره الفوريه اللي هتظفر الدور وتلم عليك سمك النجع كله 🤣🤣
واول ما تلاقي الميه عكرت تعرف ان الفرعون العاشق جاهز للاحتفال وان السمكه جمعت على الدور
وهنا بقى لازم تكون حريص انك ترمي الغماز بعيد شويه لجوه وبعدين تسحبه عليك على المرايه بتاعتك وقابل يا معلم 🎣💪💪
وكل ما الاقي الاكل خف امسك 3…4…حبيات غله وادغدغهم باسناني وارميه على الغماز بتاعي
طيب هطعم الغله في السنار ازاي… 🤔🤔🤔
هشوك الغاليه في السلاح مكان انباتها وبعدين لو حسيت ان الغله معايا طريه شويه اعرضها للهوا هتشد معايا وتبقى فله 👏
خلي بالك وانت قاعد على الدور انك متتكشفش على الميه
اقعد بعيد شويه او بزاويه لان سمكة الغله حساسه شويه 👌
معلومه مهمه وعن تجربه الغله بتشتغل بالنهار وبالليل كمان بس بتكون عاوزه شويه صبر 🙄🙄
يفضل الأدوار الطينه عن أدوار الحجاره والميه الهاديه نسبيا عن السريعه 🤔
يا رب اكون قدرت اوصل المعلومه
