عدة الصيد || كل ما تحتاجه في طلعة صيد السمك

السلام عليكم ورحمه الله وبركاته 🌹 🌹
احبابي الكرام، اخوتي واخواتي في الجروب لينا لقاء اليوم مع موضوع بيشغل كتير من اخواتنا المستجدين في الهوايه 🎣

وهو موضوع عدة صيد السمك 👌
وهنا الأساس في الموضوع وبدون حرج اللي بيحكم في الموضوع الامكانيات الماديه ونظرا للظروف الحاليه فأنا لا أرجح شراء عده غاليه ولكن دعونا نستجمع العده الاساسيه للصياد 🎣 : …

• 1- العود
• 2- المكنة
• 3-الخيوط
• 4- السنار
• 5-الفل
• 6- المداور
• 7- الرصاص
• 8- عياشه للسمك… اوكيس مخده….. او بوكس لحفظ السمك
• 9 _ كاوتشه للترميل
• 10 – فسفور….. زناقه للخيط
• 11- عدة الشاي 😂 😂

بداية كل صياد يتمنى اقتناء افضل عدة صيد 🎣

لكن عند شراء عدة الصيد بيكون في حيرة كبيرة وهي اي عود يختار؟ واي مكنة؟ و لا يدري افضل انواع الخيوط المناسبة و كذلك الامر بالنسبة للسنار والفل الخ

وعلشان كده بنقول كل واحد حسب إمكانياته الماليه وهنا لازم اعمل عملية توافق وانا رايح اشتري العده ويفضل لو كان معايا صديق يكون عنده خبره نوعا ما في العده 👌

ويقدر من خلالها انه يساعدني اجيب افضل عده بأقل الامكانيات ان توفر ذلك وهنا يجب ملاحظة الاتي :

1- العود

هناك انواع كثيرة جداً
فايبر ، كاربون ، عود جبر ، عود رقع ،

عود لف (حلقات لف) ، عود طويل ، عود قصير خفيف
عود وسط ، عود تقيل

السؤال: اي من هذه العيدان تختار؟

ببساطة شديدة اختار العود المناسب لطريقة الصيد التي تفضلها انت ( فلة ، حداف) مكان الصيد او الادوار الخاصة  بك ، السمكة المستهدفة وما يتبع ذلك من مواصفات خاصة
لابد من توافرها في العود المستخدم

أ- شغل الفلة ببساطة بيحتاج عود خفيف لتجنب الاجهاد
سواء الشغل بريم او دود ، وبالتالي نختار عود كاربون خفيف
و رقع لسهولة التعامل مع السمكة اي كانت من حيث الحجم او النوع

ب- شغل الحداف بيحتاج عود جبر نوعاً ما ليتحمل وزن الرصاص المستخدم في الحداف و توقع عنف السمك المصاد
في الميات الحامية او المفتوحة يبقى نختار عود جبر
طول العود بيعتمد على طبيعة الدور الخاص بك وعمق المياه
نختار عود لا يقل عن 4.5 و هو الانسب في كل الاحوال او
5.4

2- المكنة :

دائما وابداً اختيار المكنة مرتبط بالعود الذي تم اختياره في البداية بحيث تتوافق مع العود وطريقة الصيد

بمعنى العود الرقع الخفيف بيحتاج مكنة صغيرة الحجم و خفيفة الوزن لاحداث التوافق بينهم ،
و اذا كان شغل حداف واوزان رصاص اكبر و ميات مفتوحة
يبقى بنختار مكنة حلتها اكبر وتشيل خيط اكبر و تتحمل شغل الحداف

3- الخيوط

استمراراً لحدوث التوافق بين ادوات الصيد بنختار مقاسات
الخيط المناسبة للعود والمكنة يعني مكنة صغيرة يبقى خيوط من 30 الي 35 مم
مكنة وسط من 35 الي 50 مم

اما الرمال بيعتمد علي مهارات الصياد في التعامل مع السمكة
وان كان هناك قاعدة عامة لا يختلف عليها احد فيما يتعلق بالريم رمال 18 او 20 مم
الدود رمال 20 او 25 مم ولو حداف يبقى على الاقل 35
وهنا لازم اخلي بالي ان لازم يكون في فرق في قوة الخيط بين الأساسي اللي على المكنة والرمال وده بيكون 10

بمعني لو الأساسي على المكنة 35.يبقي الرمال أعلى حاجه
25…. لو اساسي 40 يبقى الرمال لحد 30 وده بيفيد في حالة الشبك او الوعر ان لو خيط اتقطع يقطع من الرمال وده بيقلل الخسائر شويه وبيوفر في المجهود

4- السنار :

لشغل الريم بنختار دائما سلكة رفيعة وسلاح حاد والراجع بتاعه كذلك مقاسات 8 و 9 و10 لا يهم اللون سواء كان ابيض او عسلي او اسود
عموماً افضل انواع السنار المتوافرة الموستاد…. واليوفيلا ، كراون 515 ، كراون 277 ، الامين 72 الاسود
لشغل الحداف والدود مقاسات 4،5،6،7 من نفس الانواع السابق ذكرها.

5- الفل او الغماز :

بحسب الدور من حيث العمق وسرعة المياه ، كل ما كانت المياه سريعة وعميقة بنختار فلة كبيرة تشيل رصاص لحد 3 بلية من الرصاص او 4 بلية
لو الدور اقل عمقاً و ميته هادية بنختار بالتالي فل خفيف وصغير يشيل بلية واحدة او 2 بالكتير

6- المدور :

بنختار مقاسه بنفس الطريقة
حسب حجم الخيط والرمال والسنار

7- الرصاص :

وده اللي بوزن به الغماز ومبدائيا بحتاج حوالي ربع كيلو رصاص حمص مشكل لظبط الغماز وحوالي نص كيلو مقاسات مختلفه… 2…3….4

8- عياشه اوكيس السمك :

ودي حسب الامكانيات يعني لو عندك آيس بوكس او كولمان
او ممكن كيس مخده من البيت 🤣 🤣 او تشتري شوال عياشه من محل أدوات الصيد وده مش غالي

9 – كاوتشه للترميل :

بجهز اكتر من وش ترميل بأنواع وأحجام مختلفه من السنار
بحسب المكان اللي نازل عليه…. رمال قصير…. رمال طويل
سنار صغير…… سنار كبير…… وكل نوع يفضل يكون في كاوتشه لوحده

10 – فسفور… زناقة للخيط :

يستخدم الفسفور للصيد ليلا وده بيساعد على رؤيه الغماز أثناء الصيد باليل
اما زناقة الخيط دي باستخدمها لتثبيت الغماز على طول معين بحسب المكان اللي بصطاد فيه

11 – عدة الشاي :

لا غنا عنها في عدة الصيد بحيث لا تحلو القعده على الميه اللا بكوباية شاي أو قهوة مع الصحبه الجميله

فيما يتعلق بالميزانية او القدرة المادية فليس بالضرورة اختيار شئ باهظ الثمن او غالي لكي تحصل على افضل عدة صيد 🎣

فهناك انواع و ماركات عديدة لها نفس المواصفات التي تبحث عنها بجودة عالية و لكن بسعر مناسب في متناول الجميع ،

ولكن يحتاج الامر شئ من الاجتهاد والبحث و السؤال عن كل ما هو جديد
وأهم حاجه سمعة المحل اللي هتشري منه الحاجه بتاعتك
فيجب ان يكون مشهود له بالبضاعه الجيده والسعر الجيد لدى باقي الصيادين

ملحوظه مهمه 👌

إياك وعدوة شراء العده فيجب ان تكون عندك ثقه في عدتك

ومافيش مانع اني كل فتره ازود بقطعه والمهم انها تكون اضافه وتساعد في رفع كفائتي كصياد 💪
وتقبلوا متى وافر التحيه والاحترام للجميع 💞 🌹