لو حبينا نروح رحلة صيد شاطىء فى البحر الاحمر يا ترى ايه اللى المفروض نعمله عشان نروح الرحله ونصطاد وننبسط او على الاقل نبقا عملنا اللى علينا صح ؟؟؟؟؟؟؟؟ وطبعا الارزاق فى الاول والاخر بتاعت ربنا عز وجل
اولا من اول ما تيجي النيه للرحله دى لازم نجهز معداتنا المناسبه للمكان بما فيها الطعم المناسب وده الطبيعى لاى رحله فى اى مكان
لكن بالنسبه للبحر الاحمر هيزيد عليهم حاجات بسيطه اوى لكن لازم نهتم بيها ونعملها
وتعالو نبتديها واحده واحده من الالف للياء عشان نكون ملمين بالموضوع .
1- اختيار الميعاد المناسب
وده ليه دور كبير تحديدا فى البحر الاحمر لان كلنا عارفين ان الموضوع فى المكان ده مربوط ارتباط كبير بالمد والجزر والمواعيد المناسبه لنجاح الرحله
ودايما نختار الايام اللى معامل المد والجزر فيها عالى لان نشاط الاسماك بيكون كبير ودايما الايام دى بتكون فى اواخر الشهور العربيه وبداية الشهور العربيه الجديده
ده غير انا بنبص بصه سريعه على جداول اسمها جداول سولونار واللى فيها بيكون النشاط المتوقع للاسماك غير طبعا اتجاهات الريح المتوقعه
احنا بنشوف معامل المد والجزر وجداول سولونار وعلى اساسها بنحدد رحلتنا تكون ميعادها ايه ويمكن ده مختلف شويه عن البحر المتوسط بحكم طبيعه البحر طبعا
- اشهر المواقع الموجود عليها جداول المد والجزر وجداول سولونار هو موقع المد والجذر
- بندخل الموقع ونحدد البلد والمنطقه وعلى اساسها بنشوف الجداول
2- العده المطلوبه
عدتنا المطلوبة للرحله تكاد تكون شبيه بالمستخدمه فى البحر المتوسط مع اختلافات بسيطه
البوصه
طولها هيتراوح بين 360- 420 والكاست ويت بين 60-120 جرام وهنا ده الاختلاف لاننا فى البحر الاحمر مش بنستخدم رصاص اكتر من كده بحكم حاجتين هما ان تيار الميه فى البحر الاحمر هادى نوعا ما وعدم وجود امواج
وان نسبه الوعر سواء صخور او شعب مرجانيه عاليه جدا
وبالتالى كل ما حجم الرصاصه هيزيد كل ما فرصه الوعر هتزيد وده طبعا بيختلف من منطقه للتانيه فى البحر الاحمر
المكنه
طبعا احنا عارفين خلاص وحفظنا مواصفات مكنه السيرف من حيث الحجم وشكل الحله لكن ممكن نضيف اننا ممكن نستخدم مكن حجمه اصغر ونستخدم بريد بدل المونو واحنا مطمنين لان تيار الهوا مش بالقوه انه يكعبل البريد ويعمل مشاكل زى البحر المتوسط
وطبعا كده انا عوضت نقص وزن الرصاصه بوجود البريد فى مسافة التشويح وانا عن نفسي بشتغل بمكن حجمه 7000 و 6000 فى السيرف
الخيوط ومقاساتها
لو استخدمنا خيط مونو فى التشويح ممكن نشتغل بمقاس 35 مم اساسى فى المكنه و25 للترميل اما لو بريد ممكن نشتغل ب 20 ليبره واحنا مطمنين
شكل الارمه
شكل الارمه طبعا بيختلف من مكان للتانى حسب طبيعة المصيد وحسب السمك المستهدف طبعا لكن لو هنشتغل على وعر مفيش قدامنا غير اختيارين
الثقل او الرصاص
رصاصه 80 جرام مثلا حره وتحتها مدور وخيط رمال واحد تحت طوله من 60-70 سم
او مدور ثلاثى يتربط فى الخيط الاساسي وتحته خيط ارفع منه للرمال واخر حلقه فى المدور يركب فيها خيط ارفع منهم كلهم وفيه الرصاصه بحيث مع اى وعر تكون اول الضحايا هى الرصاصه عشان لو معانا سمكه والرصاصه وعرت متروحش السمكه مننا
السنار
طبعا حجم السنار بيختلف حسب الموسم وحسب السمك المستهدف لكن احنا اللى يهمنا مقاسات من 5-7 فى صيد الشط وطبعا الاختيار بيتوقف على نوعية السمك الموجود فى الميه
الطعم المناسب
من واقع تجاربى فى البحر الاحمر نقدر نقول ان افضل الطعوم على الاطلاق فى صيد الشط فى البحر الاحمر هو الكاليمارى والجمبرى بدون منازع خصوصا لاسماك القاع او الاسماك اللى بتاكل من على الارض
ويليهم فى الاهميه بلح البحر ودود الرمل فى بعض المواسم
وطبعا احنا فاهمين ان حفظ الطعوم بالتجميد اهم شىء عشان نحافظ على الطعم فريش وبالتالى يكون فيه اقبال عليه من السمك
3- الالمام بطبيعة ارضيه البحر
طبعا احنا لما هنوصل الشط ونبتدى نصطاد بنبص الاول داخل البحر عشان نشوف طبيعة المكان هل هو فيه صخور او شعب او رمل فقط وده طبعا بيكون واضح من التغيير فى لون الميه فى مناطق الصخور والشعب
واكتر حاجه هتهمنا اننا نشتغل جنب الصخور او الشعب مباشرة مش عليها طبعا
اما لوالقاع رملى بحت فنفهم مباشرة ان الشغل فى المكان ده ضعيف جدا لان السمك دايما بيكون موجود فى الوعر سواء صخور او شعب لسرعة الاختباء فيها ووجود المرعى الطبيعي ليه جواها وعشان كده بنقول ان الشغل بيكون دايما جنبها مباشره وبنستهدف السمك اللى بيطلع من الوعر يخطف ويرجع تانى وعادة بتكون احجامه مرضيه
4- معرفة نوع السمك المستهدف
طبعا مع الخبره بنعرف احنا رايح نصطاد سمك ايه لانه مثلا ده الموسم بتاعه وبالتالى ممكن حجم السنار يتغير وطول الرمال وحجم الطعم بناءا على نوع السمك الموجود حاليا او ان ده الموسم بتاعه ومع الوقت بنعرف النوع المستهدف قبل الرحله وبالتالى تجهيز اللازم ليه
اخر حاجه احب اقولها ان موسم صيد الشاطىء فى البحر الاحمر بيبدأ فى نص شهر 4 مع ظهور سمك المكرونه بغزاره ووقتها بيكون هو المسيطر على المشهد
وبعد كده بيبتدى يقل بحكم ان فيه انواع تانيه بتيجى بحثا عن غذائها اللى هى المكرونه وعشان كده بتقل من الاختباء وفى الوقت ده بنلاقى سمك النقط والحفار ظهر بغزاره خصوصا النتى المبطرخه منه لان الوقت ده هو موسم التبويض ليهم وبيستمر موسم الصيد لحد بداية شهر اكتوبر
