Loading...

Taking too long?

Reload document

| Open in new tab

تحميل الكتيب [2.52 MB]

The post كتيب || تعليم صيد الأسماك appeared first on ملوك الصيد.

بداية الشتاء ( منتصف الموسم ) أخر ديسمبر – يناير – فراير – منتصف مارس :

• تتواجد فى الشواطىء الصخرية و حواجز الموانىء
• و تتواجد فقط فى الشواطىء الرملية عقب النوات مباشرة ( البوستاشى )
• و تكثر بشدة فى التسقيط و المرامى الغرق و يكثر
  

بداية الربيع ( نهاية الموسم ) أواخر مارس – إبريل – مايو – أوائل يونيه :

تجدها مرة أخرى على :

• الشواطىء
• الحروف
• الجزر
• مارينا بالساحل
• الموانىء

وتكون قد وصلت لحجم كبير يتعدى الكيلو ….

بداية الصيف ( موسم ضعيف ) يونيه – يوليه – أغسطس – سبتمبر :

يتواجد الدنيس على شبه غلطات و ليس بصفة مستمرة … و يندر صيده بالبوصة اليد

و لو ربنا كرمك منه تاخد واحدة أو أتنين بالكتير …..

مسميات سمك الدنيس

• الدنيس الصغير جدا أسمه (بلاميس)
• الدنيس الوسط يسمى (فلّيجس)
• الدنيس الكبير (دنيس)

و يوجد نوع بنسمية (الملك) وده بيكون فيه لطشة صفرا على خيشومه وده بقى ربنا يكرمكم وتشدوا منه وتستمتعوا بيه

• اقرأ : فن صيد الدنيس بالتفصيل
• اقرأ : الغالي والنفيس في كيفية صيد الدنيس La Dorade

اماكن تواجد الدنيس

الدنيس بيحب الوعر و بيعيش حواليه في مجموعات وبيحب برضه الارض الخشنة

يعني لو المكان اللي بترمي فيه مفيش فيه وعر ورملته خشنة (حصى) حتلاقي الدنيس موجود

وزي ما قلنا انه بيعيش في مجموعات ودايما بيتحرك في المنطقة في شكل دواير علشان يدور على الاكل ولو اخدت منه واحده وغاب عليك بعد كده متقلقش حيلف ويجيلك تاني ان شاء الله

طرق صيد الدنيس

1- بالبوصة الماكينة

الشعر الاساسي 40 .. الفروع 35 أو 30 (انا عن نفسي بعمل الشعر الاساسي 40 على فروع 40 برضه)

السلاح

• لو فيه فليجس في الماية يبقى السلاح نمرة 5 او 4 او 3 بالكتير
• ويفضل بكرش ولو بترمي على تقايل يبقى السلاح نمرة 01 او 02 او 03
  
• بنعمل سلاح واحد بس تحت الرصاصة ويكون متوسط الطول وتوكل على الله وارمي زلم البوش شوية بس متخليش الشعر مشدود
  
• حيضربك الاولى سيبه ولا كأنك تعرفه 
• التانية انتبه له
• التالته مترحمهوش رد فيه بقلب جامد
  
• ولما ترد وقف ايدك شوية لغاية ما يبتدي يعافر وبعدين لمه

حد يسألني ليه؟؟

اقولك

لان الدنيس من السمك العفي جدا لما بترد فيه بيقف مكانه شوية
ولو ايدك رخت او حس ببوش في الشعر حيديلك ضهره ويجري
وفي الحالة دي يبقى السمكة راحت لو مش بالعة
مع الدنيس التقيل اللي بيعدي الكيلو ونص والاتنين كيلو
لما بنرد فيه وميرضاش يتحرك
بنريح ايدينا بالبوصة سنة صغيرة علشان يحس بالراحة ويبتدي يتحرك
وبعدها نبتدي نتعامل معاه

• خد بالك ساعات الدنيس بياكل بخباثة .. ازاي؟؟؟

تلاقيه الشعر بيبوش لوحده من غير ضرب ولا حاجه
في الحالة دي تلم البوش بحذر
لانه لو حس بالسلاح حيجري العكس ويقطع
وزي ما قلتلكم ان الدنيس سمكة عفية جدا
كفاية اني اقول انه بيكسر الجلاجولة بسنانة

معلش هخرج شوية عن الموضوع واقولكم ايه اللي كان بيحصل معانا مع الدنيس
كنا بنرمي بتكنيات ( كابوريا لونها اسود بنطلعها من بين البلوكات) وفيه ناس بتقول عليها العفاريت

المهم

كان يضرب علينا ياخد الطعم ويجري

لغاية لما واحد بيصطاد معايا ربنا يمسية بكل خير اسمة عم منير

حط القراص بتاع الكايوريا وقال اهو حاجه تستحمل شوية

ويادوب الرصاصة نزلت من هنا ولقينا زلزال في البوصة

الحق يا عم حاسب يا منير وهو طبعا صياد من الصيادين التقال

حوالي نص ساعة بيعافر مع السمكة لغاية ما وصلت تحتنا

بس طبعا علشان ارتفاع البوكات ميقدرش يرفعها

المهم نزلت لقفتها
بسم الله ما شاء الله

دنيسة ملكة طولها نص طولي

عرفت بعد كده انها 3 كيلو ونص

وبعد كده ابتدينا نرميله يالقراص واخدنا صيده يومها اصغر سمكة كيلو الا ربع

المهم نرجع للموضوع

نيجي دلوقتي للطريقة الثانية

2- البوصة العادية

وفيها طريقتين

الحساس

وهو نفس الصيد بالماكينة بس بالبوصة العادية

الصيد بالفلة

وده لازم يكون على قرار عالي لان الدنيس دايما ماسك الارض

وبتعمل الشعر الاساسي 35
والفروع 30
السلاح لا يقل عن نمرة 6

والفروع بتعمل فرع متر وربع والتاني متر

وطبعا الصيد بالليل
ويفضل والبحر هادي او مريح
لان الدنيس بيسرح والبحر هادي
ركب الفلة الفوسفور وتوكل على الله وارمي
بس لو حسيت ان السمكة تقيلة عليك ومش عارف تتعامل معاها
متعافرش معاها ولو قطعت متزعلش
ملكش نصيب فيها
وفكر دايما ان بوصتك لو اتكسرت مش حتعرف تعوضها
لكن السمكة لو راحت فيه غيرها كتير

طعم سمك الدنيس

• الجرايات (سلطعونات الشاطئ)
  
• تكني
• جرايات خضرا
• خلخل
  

مع ان الدنيس دلوقتي مش بياكل غير التكني ومش بيضرب على الجرايات الخضرا الا في الغرب و ابوقير

والخلخل بقى انقرض لان مبقاش فيه رملة على الشط وهو جحرة كان بيبقى حفرة في الرملة … (فين ايام الخلخل كنا بنقول لو رميت بخلخل في بانيو حتاخد بيه دنيس وقاروس)

السردين والسردينيلا

السردينيلا هو السردين الروسي بيبقى مجمد ومش بلاقيه الا عند واحده اسمها ام احمد في سوق باب عمر باشا

الدود

اسمعلاوي – قراص – دود بحر
بس القراص ودود البحر بيلم عليك السمك الرفيع

الجلاجولة والبشبش

واللي مش عارف الجلاجولة هي :

نوع من القواقع البحرية ليها صدفة قوية جدا وبتكون مليانة لحم من جوة احنا بقى بنصطاد باللحم اللي جوة ومتنساش تاخد معاك شاكوش علشان تكسرها

والبشبش هو ذكر الجلاجولة

الجمبري

نطاط – عقر – بلنص – شطنارة – برغوت
البرغوت للبوصة اليد لانه مش بيستحمل الماكينة

دلوقتي اقولكم كل طعم بنستخدمة امتى

الشتاء (موسم الدنيس)

الجرايات – الجلاجولة – السردينيلا

الصيف الدنيس بيكون موجود بس صغير (فليجس)

الدود – الجمبري

بمعنى في الصيف طعم طري وفي الشتاء طعم ناشف

اماكن تواجد الدنيس في الاسكندرية

اشهر اماكن تصطاد منها الدنيس

• ميناء الاسكندرية
  
• ميناء الدخيلة
  
• السلسلة (الازريطة امام الملاهي)
  
• الشاطبي ( بس خلي بالك من الوعر لانة جامد)
  
• كامب شيزار
  
• سبورتينج
  
• كليوباترا
  
• سيدي جابر
  
• كوبري ستانلي (فيه فليجس كتير)
  
• لسان جليم التاني
  
• سان ستيفانو امام سوميد
  
• العصافرة
  
• المنتزة
  
• ميناء ابو قير

The post الغالي والنفيس في كيفية صيد الدنيس La Dorade appeared first on ملوك الصيد.

أماكن صيد التسقيط في الإسكندرية

اولا :  ابوقير

كان (طبعا زى كل حاجه حلوه ) في الماضي من احسن اماكن الصيد و الأكثر حصيله من كل الأماكن وكانت أبو قير في الشتاء هى جنة الدنيس بالنسبة للصياد

اما اللآن و بسبب تلوث المياه و لأسباب أخري كتير اصبحت الحصيله ضعيفة إلا لو كنت مع بحار متمرس فى أوقات معينه فقط من السنه

مثلا في شهر 11 و 12 تجد الدنيس في ارض الخمسين او الحصوة او الوعرة التي يقابلها من خلف جزيرة نيلسون من ناحية البحر المفتوح

وقد يدخل عليك اسراب الشاخورة البلدي الكبيرة والتي تدخل بكميات هائلة

اما الموسم الثاني فهو تقريبا من اواخر شهر 3 الى اواخر 5 بيكون في الغرق موجود خير كتير زى الشراغيش الرشيدي والكحله و و التيوس بأحجام معقوله

• ملاحظة مهمة :

يجب ثم يجب ان تحضر الجمبري العقر الطازج لكي لا تندم وخاصة مع الدنيس فهو دواء العقر الطازج وخاصة في الأعماق

مع العلم ان الدود ليس له اي قيمة في صيد التسقيط وعن تجربة

الجمبري النطاط او البلانس يستطيع ان يخرج الوقار والعضاض من جحره ويحضره اليك على السنارة على طبق من فضة .

ثانيا : بحري

اعتقد ان بحري لا زالت تحتفظ بخيراتها وخاصة في الوعر او صيد الأثر من شهر 7 الى شهر 11

و يكون الصيد على الأثر وبصراحة هو موسم جيد جدا للشراغيش والحلابيش (صغار الوقار)

• ولكن هل تتحمل الحر ؟؟؟

هنا السؤال المهم لأن الجو يكون صعب جدا جدا في شهر 7 و 8 لذلك انا افضل النزول في شهر 9 الى شهر 4 فا من شهر 10 الى شهر 11 في بحري انا اسميه شهر الغلطات او السمك الذي نحلم به .. عضاضة كبيرة وقارة كبيرة فهو فعلا شهر ممتاز للصيد بالطرق غير التقليدية

بالسمكة الحية تأتي بسمكة حية شرغوش او موزة وتضرب السنار في لحمها بدون ان يلامس عمودها الفقري لتظل حية

وتأتي بخيط مقاس 100 او 80 ورصاصة 10 وتربط خيط السلاح بطول 2 او 3 متر حتى يصل السنار قبل الرصاصة بنصف متر

وتلقي بالسمكة الحية بشرط ان تكون جالس على اخر المركب لكي لا يتعقد خيطك مع من بجوارك فالصيد ادب واحترام

وتتوكل على الله وتسمي بأسم الله .

ثالثا : المكس

الصيد هناك على العايم غزيلة و أفضل أوقاته من نصف شهر 11 الى اواخر 5 والعمق هناك لا يقل عن 60 متر

لذلك الرصاصة او الثقل لا يقل عن 150 جرام ولا يوجد ظل والشمس تكون مباشرة على رأسك طوال الوقت

لذلك لابد أنا يكون لديك كاب للحمايه

لكن السمك هناك بأحجام وفيرة ولكني لا أستطيع ان اتكلم عن ما لم اجربه .

اما فيكون الصيد على الغزيلة او المرجان كما شرحت سابقا ولا تنسوا العقر الطازج وسوف اشرح فيما بعد طريقة تحضيره وتخزينه ليظل طازج وخاصة في الغزيلة.

The post تبسيط صيد التسقيط || صيد التسقيط في الإسكندرية || 2 appeared first on ملوك الصيد.

هنفترض اننا بنصطاد بمياه عذبة يبقي ايه الطعم اللي ممكن نصطاد بيه

1 -الدود البلدي

دا بقي في اي مكان وفي اي وقت تصتاد بيه عادي لانه رائحته بمتميزة وبتخلي السمك يجي عليه بس عادة بيدخل عليه السمك الصغير ونادر لو دخل عليه سمك كبير ودا ممكن يطلع كل حاجة في المياه العذبة زي ايه مثلااااا

البلطي — القراميط — البياض — المبروكة — الحنشان — الخدال او الرعاش — البياض –العرسة

كل دا ممكن ياكل الدود بس في حاجات مفضله لكل نوع من السمك داااا يعني هوة اه بياكل الدود البلدي بس مثلاااا سمك البياض يحب الدود الافرنجي كتيرررر وبردوا الحنشان و الخدال

2 – الدود الافرنجي

دا بقي احلي صيادة بلليل للسمك الكبير الدودة طولها ممكن يوصل الي 10 او 20 سم ولو المياه ماشية وفيها سمك احجام بطعم حبل الطعم كله في السن ويستحسن تنزل بيه حداف بس عايزة صبر شوية

انما لو السمك اللي في المنطقة قليل زي الشبار الصغير او الكراكير في بتقلل الطعم شوية يعني الحبل علي سنين عشان تبقي معقوله علي قد بق السمكة هههههههههههه

3 – الغله

دي بقي ليها طريقتين لتحضيرها …

تغليهاااا لغيت اما تطري شوية بس متلحقش تنفس او …. تتنقع في مياه لمدة لغيت بردوا اما تطري شوية وفي ناس بتنقعها مع شوية سكر او بتزفرها مش هتفرق

دي بقي صيادتها الصبح للسمك الكبير وبدخل عليها السمكة النظيفة يعني مش بتاكل اي حاجة زي البلطي الوسط والكبير والقراميط والبياض وانواع اخري طرية الصيادة بيها بدر كف من الغلة امامك علي سطح المياه وبدر نصف كف امامك مباشرة بحيث جزء من الغله يكون علي الارض وعلي حواف المياه بحيث السمك يشوفها بس مش يقرب منها اسمها مرايااااا

وبتبعد عن الدور دا لمدة ربع ساعة مثلااااا وبعدين تيجي تنزل بالغله تصتاد كل حباية علي طرف السن يكون سن كبير نرويجي يستحسن والتقل خفيف جدااا اخف حاجة وعوامة خفيفة بردوا

وتبعد عن الدور بزاوية وترمي السنارة بعيد عن الدور وتقربها ببطىء لغيت اما ترسي في المكان اللي انت رامي فيه الغله واول اما يغطس العوامة تضرب في عكس اتجها بس بعقل خفيف خفيف

وكده تبقي صياد تمام بس اللي يبوظ الدور انك تعمل دربكة كتير فيه وسمك يفرغ منك يعني تصتادة ويقع تاني في المياه
دول احسن صيادة في المياه العذبة

في بقي حاجات تانية زي … الخضار …. العجين …. الذرة بس قبل الشوي …. الجنبري بس دي عايزة محترفين

عايز تعرف اذا كانت المنطقة دي حلوة لصياده السمك ……….

طيب تعرف ازاي ؟؟؟ هقولك

انت هتشوف حواف المياه تمام ويستحسن تكون حته جنبها ريم او ورد نيل او زرع لان السمك بيحب يستخبي تحت الريم دااا بس يكون بكميه قليله يعني
كمان المياه تكون ماشية بس ببطء شوية مش سريعة اووووي

منسوب المياه يكون متوسط لو عالي صعب الصياده فيه لان السمك الكبير بيقلك

يعني باختصار تكون المياه في وضعها الطبيعي لان في بوابات طبعااا للترع والانهار الديقة اما تتفح هذة البوابات او تتغلق كتير بتعمل قلق للسمك ولكن يستحسن ان تكون البوابات مفتوحة بنسبة معقوله

The post نصائح للصيد النهري appeared first on ملوك الصيد.

بالنسبة للماكينة المناسبة الفايكنج أنا شغال بيها هناك تمام

العود هيختلف على حسب نوعية السمك اللي رامي عليه

• لو هترمي على دنيس هتحتاج عود طويل 5 متر عشان تطوح بيه جوه
  
• لو هترمي على الشراغيش أو الموزة 3.5 متر هيبقى خفيف ومريح معاك
  
• لو مش هتشتري غير عود واحد بس يبقى هات 5 متر هيشتغل معاك في الناحيتين
  

العود الصب بتاع التسقيط مش هينفع لو عايز توسع جوه بالتالي هتستخدم عود شاطيء وده هيشتغل معاك سواء هتسقط بيه تحتك على طول أو هتوسع
وفقاً لميزانية 400 جنيه

مثلاً:

هتشتري عود صيني ماركة دولفين – مادنس تيلي 4.5 متر وهو ممتاز على فكرة

الماكينة الفايكنج هتعمل معاك حوالي 250 جنيه أو 300 لإني مش عارف الأسعار حالياً عاملة ازاي بعد ارتفاع الدولار بس لازم تتأكد إن الفايكنج كوري مش صيني..

• هتعرف ازاي؟

بص على دراع الماكينة اللي بيركب في العود لو لقيت محفور عليه كلمة كوريا يبقى كوري.. لو كلمة كوريا مطبوعة مش محفورة يبقى صيني ( العود هيعمل معاك 100 جنيه تقريباً )

كده احنا ظبطنا عود كويس وماكينة كويسة في حدود ميزانية متوسطة

الشعر اللي هتحطه 35 وعندك انواع كويسة كتير أنا شخصياً بفضل روكا هو شعر كوري
وبالنسبة للأرمة هتحط شعر 20 وأنا شخصياً مؤخراً بقيت احط شعر 15 بس ده محتاج تدريب عليه شوية فانت ممكن تحط 20 أو 25 عادي

نيجي بقى بالنسبة لأماكن الصيد، وبتكون عادة في البحر المفتوح

عندك الوعر اللي على أول كوبري ستانلي والوعر اللي على آخر كوبري ستانلي لو هتصطاد شراغيش

اللي شغال أحسن الفترة دي الوعر اللي ناحية نادي المهندسين مش اللي ناحية سيدي جابر

وسط الكوبري رملة ودي ممكن تشتغل فيها على المرمار لما بيبقى حاضر

أنواع الاسماك المتواجدة حاليا

الشراغيش:

هتقف على الوعر اللي قلتلك عليه.. الشراغيش الكبيرة الفترة اللي فاتت كانت موسعة مش تحت الكوبري.. وساعات بتبقى موجودة تحت الكوبري عادي بس حالياً اللي تحت الكوبري جناشير وموزة.. بالتالي هتقف على حروف الوعر مش الوعر نفسه لإن الوعر حامي قوي هناك وهتخسر رصاص كتير..

ممكن تسأل الصيادين اللي واقفين هناك حروف الوعر فين لو البحر عالي والوعر مش باين لحد ما تاخد خبرة المكان.. هتوسع على قد ما تقدر عشان ترمي بعد الوعر بحاجة بسيطة عشان الوعر.. كمان وانت بتلم سواء معاك سمكة أو لأ هتلم بسرعة قوي وده هيخليك تتفادى الوعر اللي في السكة وانت بتلم.. وسيب شوية بوش ماتخليش الشعر مشدود على الآخر عشان ماتوعرش منك..

هتحط رصاصة 4 عشان تجيب معاك المسافة دي.. ولو الشراغيش الكفافي حاضرة تحت الكوبري هتسقط تحتك على طول برصاصة 1 لو البحر مريح ورصاصة 2 لو مشخشخ ورصاصة 4 أو اكتر لو البحر عالي.. أرمة الشراغيش هناك هتعمل فرعين طوال فوق الرصاصة على صنار 10 كفتة.. وممكن تعمل سبحة لو بتصطاد الصبح وهتسقط تحت الكوبري

أما لو هتوسع او هتصطاد بالليل يبقى فرعين بس أو فرع واحد.. هتلاقي صيادين يقولوا لك الصنار ده صغير لو الشراغيش الكبيرة حاضرة.. ماتسمعش كلامهم.. 10 كفتة بيجيب أي حجم من الشراغيش الموجودة على كوبري ستانلي وميزته إن السمكة بتبلعه فمش بتعرف تفرغ منك.. أما الصنار الكبير هتشففه مش هتبلعه.. الطعم اللي هتستخدمه البرغوت والعقر لازم يبقى معاك الاتنين

الدنيس:

أحسن مكان له.. هتيجي من ناحية سابا باشا.. هتعدي من تحت البرج وتفضل ماشي لحد أول فانوس.. ده بيبقى فانوس كبير متعلق عشان الاضاءة.. ارمي هناك.. الأرمة المستخدمة شعر أساسي 35 وأرمة 30 عشان فيه دنيس هناك أحجام حلوة.. رصاصة 6 أو 8 عشان تطوح بيها بعيد على حسب حالة الميه.. هتطوح لأبعد حاجة تقدر عليها عشان الدنيس موسع قوي..

هتخلي الرصاصة حرة يعني هتحط الرصاصة في الشعر من غير ما تقفل عليها وتربط تحتها مدور وتحته فرعين 25 و30 سنتي.. وصنار 5 أو 6 كرش.. فيه برضه صنار عند محل آل فهيم في سابا باشا اسمه circle hock ده فوق الممتاز احسن من الكفتة والكرش..

• طب ليه انت بتسيب الرصاصة حرة فوق المدور مش بتربطها؟

عشان الدنيس لما يسحب الطعم مايحسش بالرصاصة لإنه بياكل ويتف ويرجع ياكل تاني.. فكده الشعر بيتسحب من غير ما يشد الرصاصة عشان ماياكلش ويتف ويحس بالرصاصة يقوم هربان منك.. والطعم اللي هتستخدمه دود بحر ده رقم 1 مع الدنيس هناك ويليه الاسماعيلاوي وهتلاقيه موجود في سوق الميدان عند الحمامصي

الموزة:

هتشتغل عليها بصنار رجل دبانة 24..  وده هتلاقيه عند السبخي..

اعمل سبحة 6 فروع عشان الموزة لما بتبقى حاضرة بتدخل اسراب..

وارمي تحتك على طول ماتوسعش جوه.. وخليك واقف في الاماكن اللي قلتلك عليها للشراغيش..

• هتعرف منين ان الموزة حاضرة في الميه؟

لما تلاقي البرغوت يطلع معاك ممصوص.. يعني تلاقي القشرة بس..

وطبعاً من طريقة الضربة بتاعته في الميه مختلفة عن ضربة الشراغيش بس الطريقة الأولى اسهل..

والطعم برغوت.. هتخلي الشعر بتاعك مشدود على الآخر واللبلوب متني شوية هتلاقي رعشة جامدة في اللبلوب اشكم واسحب في الموزة على طول

الكاليماري:

الموسم بتاعه من آخر شهر اكتوبر.. وده هتطلع له بالليل بعد المغرب.. ولازم يكون الميه حصيرة وكاشفة خالص.. ويفضل في الليالي اللي بيبقى القمر مكتمل فيها بس مش شرط.. هتشتري رابلا صيني مقاس 3.5 من النوع اللي بيبقى كله بينور مش ديله بس.. اللي هي رابلا قماش..

وهتلاقيها عند آل فهيم ومحلات الصيد عموماً.. هتشحنها بالضوء قبل ما تستخدمها.. حط فلة شمندورة وتحتها بمتر ونص اربط الرابلا بتاعتك على الشعر الأساسي اللي هو 35..

ارمي واسحب ببطء وماتغيرش من سرعة السحب بتاعك او انك تسحب وتوقف.. طبعا هترمي الرابلا موسعة جوه خالص على قد ما تقدر وتسحبها ببطء زي ماقلتلك بنفس السرعة من غير توقف وتخلي اللبلوب بتاع العود بتاعك نازل تحت ناحية الميه مش مرفوع لفوق عشان حركة الرابلا تبقى مظبوطة شبه حركة السمك في الميه..

هتلاقي فجأة وانت بتسحب فيه تقل جامد معاك.. ساعتها استنى ثواني عشان الكاليماري يمسك الرابلا كويس وبعدين اشكم جامد واسحب الكاليماري بتاعك.. وخلي بالك هو مش بيضرب زي السمك انت بس وانت بتلم بتحس بتقل جامد فجأة..

أما المكان اللي هتقف فيه فأحسن مكان للكاليماري هناك على حروف الوعر اللي موجود ناحية سيدي جابر..

بس خلي بالك عشان المكان ده بيبقى زحمة قوي لما الكاليماري بيبقى حاضر وممكن تشبك مع الشعر بتاع اللي بيصطادوا جنبك كتير لو مش مخلي بالك ومحدد اتجاه رميك كويس .

The post اساسيات الصيد علي كوبري أستانلي appeared first on ملوك الصيد.

1_القلعه و ما حولها

من اشهر مناطق الصيد بالاسكندريه لما تتمتع به من مخابئ و صخور تمتد تحت الماء لمسافه لا تقل عن مئتى متر امام القلعه مما يعد مكان مناسب لمعيشه الاسماك .

2- جزيره الارمجان

و هى فى منتصف الميناء الشرقى و هى صناعيه و يمكن الصيد امام الجزيره بالقوارب فقط دون الصعود على الجزيرة لان هذا ممنوع حاليا و الميناء الشرقى بوجه عام مستعمره البطاطا .

3- ميناء الدخيله:

من افضل المناطق و اغزرها فى كميات و احجام الاسماك و لكن تحتاج الى تصريح دخول ..

لو هتنزل بلليل الدود المشرشر سيد الموقف وبأذن الله ربنا يرزقك والعده المستخدمه بوصه 5 متر شعر القرمه 25 او 20 وفله وسط وشعر الجوز 8 او 10 تكون شعرايه نضيفه وتعمل جوز واسع وسلاح 10 او 11 موستاد

واتوكل على الله وترمي فى بطن إي رصيف وطول ما انت قاعد غير عياراتك لحد ما السمك يعلم عليك وان شاء الله ربنا يرزقك

4- السلسله:

فى الميناء الشرقيه ايضا.

5- كوبرى استانلى:

الصيد هناك ليلا يعطى نتائج جيده .

5- خليج نادى المهندسين:

يوجد به مجموعه لا باس بها من الاسماك مثل البورى و البطاطا و الترس و الموزه و المكرونه .

6- كوبرى المنتزه:

يجب قطع تذكره دخول المنتزه و المشى لمده ثلث ساعه للوصول اليه و لكن المشى فى المنتزه متعه فى حد ذاتها و يوجد هناك اسماك بيضاء جيدة .

7- خليج ابوقير:

يوجد به اسماك خشنه مثل البطاطا و المكرونه و الموزه و اسماك بيضاء مثل الميرمار و الشراغيش فهو بحق مستعمره قديمه .

8- جزيره نلسن:

فى وسط البحر على بعد نصف ساعه من ابوقير و يتم الوصول اليها بالقوارب ذات المحركات الديزل .

9- الساحل الشمالى:

يوجد به اسماك جيده جدا لصيد المكنه و لكن يجب انتقاء المكان بعنايه فكما قلت قد تذهب و تجد ان الاسماك قد ذهبت فى مشوار و تركت المنطقه .

10- مارينا:

يوجد بها كبارى ذات جوده عاليه اذا حالفك الحظ قد تعود بما لا يقل عن عشره كيلو جرامات من الاسماك .

11- لسان المندرة

تحت فندق شيراتون بوري دنيس خاصا في الليل رزقها واسع .

12- لسان العصافرة مثله .

13- اللسان في نادي القوات المسلحه 6 اكتوبر خلف حلقه السمك .

14- جزر ميامي .

15- أمام المحروسه شراغيش وزنجاريا وبوري وبطاطا .

16_ وأخيراً ماننساش المكس طبعاً .

اما الطعوم المعتادة :

الصيد فى البحر المتوسط اصعب صيد لان السمك خبير فى اساليب الصيد و الهرب من الصياد و لا ياكل اى طعم ترميه فى اى وقت من العام بمعنى ان السمك ليه مزاج … ايوه مزاج و عالى كمان ، ايام تلاقيه نفسه مفتوحه و بياكل كل حاجه و ايام تلاقيه ملهوش نفس كده غير لطعم معين مع انه نفس النوع

و نفس المكان بس اللى تغير هو المزاج ، ثم ان السمك فى الاسكندريه قليل و كثير الترحال بمعنى انه لا يستوطن مكان معين لفترات طويله و بكده ممكن تصطاد من مكان و بعدين تلاقى المكان مفيش فيه غير الرمله فى اقل من شهر .

• اساسيات الصيد علي كوبري أستانلي
• عدة التسقيط في الإسكندريه
• تفسير المعاني .. عن السبحة الأسكندراني

The post أشهر أماكن صيد الأسماك بالأسكندريه و أفضل الطعوم المستخدمة appeared first on ملوك الصيد.

السلام عليكم ورحمة الله وبركاته …

أحبابى معشر الصيادين .على حد فهمى المتواضع فى إختلاف كمية الطعم وده بيكون حسب الأتي :_

1- المكان

بحر أحمر /شمال غير جنوب أو بحر متوسط

2- الزمان

صيف غير شتاء وحالات القمر المختلفة – فمثلا هناك آراء معتبرة بأن أفضل أوقات للصيد من يوم 5وحتى 10 ومن يوم 20 وحتى 25 فى كل شهر عربى

3- السمك المستهدف والفرشة أو الطرحة

فالمرجان والدنيس غير الكوشر والشعور أو المحاسن أو البياض والبلاط أو الحريت…إلخ

4- طريقة الصيد

التسقيط غير الجر على سبيل المثال

أرى من وجهة نظرى المتواضعة ومن باب خير الأمور الوسط ( بين من يرى أن الطعم مبيخسرش وزيادته مفيهاش مشكلة/ وبين/ من يرى الإقتصاد وعدم التبذير والإهدار وانه ممكن أن نتبع طريقة منه فيه- وكلها أراء محترمة)

مبدئياً قبل الدخول في التفاصيل ..أرى أن تكون الكمية لتكون فى الأمان صيد الأسماك للمحترفين لكل مكان وزمان وسمك مستهدف وطريقة صيد ما يلى لكل 24 ساعة للفرد:

• نصف كيلو جمبرى أحسن نوع طازة وحجمه مناسب
• كيلو كاليمارى
• نصف كيلو سبيط
• كيلو ماكريل
• نصف كيلو باغة أو سردين
• نصف كيلو بلاميطة

وبجملة المصاريف و دوس يا ريس وش أو تصبية تسقيط أو جر إستخار واختار مقلى او مشوى أو مسلوق او صينية او طاجن

ولكن في جميع الحالات يجب أستشارة الريس في نوعية الطعم وكميته قبل القيام بالرحلة.

سمعونا الصلاة على النبى وأحنا نازلين للجد 🙂

بالنسبه للبحر الاحمر تسقيط شمال الزعفرانه حتي السويس

معظم السمك صغير الا لو سمكة كبيره معدية ماسكه وش شعبه
للـ ٢٤ ساعه كيلو جمبري للفرد و ربع كليماري و نص ماكريل ويتم ضربه في اجمالي العدد عشان في ناس مش هاتستهلك طعم و طالع يتبسط و يغير جو

الزعفرانه و جنوبا حتي القصير

للفرد في ٢٤ في الموسم صيفا ٢ كليماري ٢ ماكريل و سردين مملح قديم او جديد مش هاتفرق و ده عشان يضبط الدور و يمسمر السمكه ف مكانها .. و ممكن اتنين جمبري للرحله .. و شتاء نص الكميه

راس العش

بالنسبة ل رأس العش 36 ساعة بنعمل حسابنا في ان يكون كل واحد من 2 ماكريل وتقريبا 1/2 جمبري وكيلو الاربع كاليماري كبير او 1 كيلو سبيط احمر من العبور وده احلي بالنسبة لرأس العش او باغة بس الافضل ماكريل.

القصير ولحد الحدود مع السودان

و ديه مافيش حد طالع يهرج فيها والكميه ضعف المذكور واهم حاجه السردين المملح

ملحوظة هامة

كلما اتجهنا جنوبا يتم زياده مقاس العلب و بالتالي زياده استهلاك الطعم و زياده التنقير من السمك الصغير .. وبالنسبه للطرحات فوق ال٢٥متر التزفير لا يمكن يبقي برمي الزفاره من المركب فلازم يبقي كل هلب عليه حته من السردين و دي اول ما تنزل السمك الصغير بيهربدها تحت و يزفر الدور مضبوط و لو اتزفر صح كل شويه ممكن ما تحتاجش تتنقل كتير

انا من مدرسه اتقل علي الرز يعني زفر الدور كويس و استني رزقك ربنا يبعتهولك و مش بنقل غير لما يكون السمك حلف ميت يمين ماهو طالع

على العموم الطعم ميخسرش . يكون معايا بزياده احسن فرق التكلفه مش حيبقي كتير
يعني تحسب الطعم بتاعك مره وربع .

حنفسر شويه …… في 24 ساعه

انا عن نفسي

1- باسقط ببوصه ( طعمها كله تقطيع … مكريل .. سبيط .. سردين .. بلاميطه ) يبقي بالوزن عاوز كيلو من كل حاجه . وده لصيد البوصه

2- لشغل العوامات ( سردين كامل – باغه كامله – سبيطه كامله – ) وده غالبا بيكون بالنهار ) يبقي حوالي نص كيلو من كله

3- لشغل اللنس ( كامل وتقطيع حسب السمك )

4- للمرجان والكتارين ( نص جنبري )

5- اما الوش انا باوش بسمكه كامله او بسمكه حيه

الخلاصه كل 24 ساعه ( كيلو ونص مكريل – كيلو سبيط – نص سردين – نص جنبري – كيلو بلا ميطه لو موجود احجام صغيره )

.. و الله اعلي و اعلم

The post كيف يتم تحديد كمية و انواع الطعم قبل الرحلة appeared first on ملوك الصيد.

و تستعمل بشكل اساسي في الكاستنج و تكون مقاساتها صغيرة نسبيا و تعتمد في حركتها علي الالتواء من جانب الي اخر اثناء عملية السحب و هذه الحركة تجذب الاسماك

و بما انها ربلات غارقة فمن الممكن التحكم في عمقها علي حسب المكان و السمك المستهدف فممكن ان تبدأ في سحبها بمجرد ان تلامس سطح المياه بعد الحدف و بهاذا الشكل تكون قريبة من السطح

و ممكن انك تنتظر الي ان تغطس الي العمق المطلوب قبل ما تبدأ في عمية السحب
و هي تصلح في المالح و العذب و تصلح عندنا ايضا و المهارة هنا تعتمد علي الصياد في الوصول للعمق المناسب و في السحب بالشكل المطلوب

و في هذا النوع كل ما سرعة السحب تزيد كل ما العمق يقل و العكس و ذلك لعدم وجود ذقن للغطسهذا النوع هو رابلات تتلوى فى السباحة بذقن (تغطس) مع السحب وايضا هذا النوع يصلح للجر بسرعات بطيئه او للكاستنج ولاحظت ان هذا النوع يستخدم في البلاد العربية التي تطل علي الخليج العربي و يستخدمونه لاصطياد سمك الهامور و البالول و هو يشبه عندنا الكشر و التواين

و لكني لم اجربه في البحر الاحمر و لا اعرف نتائجه بس اكيد ممكن نتيجته تكون كويسه مع الكشر لان طباعه زي الهامور

The post رحله مع انواع الطعوم الصناعيه || رابلات Lipless Rattling Crank Bait appeared first on ملوك الصيد.

كما تفضل معظم الأسماك أيضا الرخويات كالسبيط والكاليماري والأخطبوط في غذائها ولاستعمال هذه الأسماك كطعم للجر يجب تجهيزها بالطريقة الصحيحة أولا حتى تكون صالحة لتحمل مقاومة المياه أثناء الجر وبالتالي لاتتهالك بسرعة وتحتفظ بشكلها الطبيعي لإطول فترة ممكنة :

يجب أولا أن تكون السمكة طازجة تماما حتي تستعمل كطعم للجر فالأسماك لا تقبل علي التهام الأسماك الغير طازجة من ناحية , كما أن السمك الغير طازجة لن تصمد عند جرها وراء اللنش وستتهالك وتتحول إلي قطع يعد فترة قصيرة من الجر

وكلما كانت السمكة متماسكة القوام , وكان ذلك أفضل لصمودها فترة أطول وعلي سرعة أعلي عند جرها وراء اللنش , وعموما فأن معظم الأسماك المستعملة كطعم يفضل استعمالها في السرعة البطيئة والمتوسطة عند الجر تحت السطحي أو العميق , ولا بأس من استعمالها مع السرعة العالية عند الجر علي سطح الماء ,

أما الكاليماري والسبيط فأنه يصلح للجر السريع سواء السطحي أو العميق , بل ويتحمل الجر لمدة طويلة دون تغيير يذكر

تختلف انواع الطعوم باختلاف اماكن الصيد ( انواع السمك الموجود) وايضا اختلاف نوع القاع الذى يختلف طبيعتة من مكان لاخر.

فمثلا ..!!!

نجد القاع الرملى والذى تعيش علية ( فرشات ) اى تجمعات انواع سمك الشعور أو الحفار (من انواع الدنيس والشراغيش )

ونجد القاع ذو الشعاب المرجانية وتختبىء بة اسماك القاع مثل الوقار والناجل والشريفة وابو لولو

ونجد القاع الصخرى وبة الاسماك مثل القاروص والبهار

ونجد القاع العميق من 120 الى 150 م فاعلى وتعيش بة اسماك القاع العميق مثل الحصان ( الفارس) والصرع .

ببساطة نقدر نقول مبدأ عام اى سمكة يمكن اصطيادها باى طعم ولكن يفضل الاتى:

• منطقة خليج السويس والبحيرات يفضل استخدام الجمبرى النطاط (الحى ) او الأسماك الصغيره الحيه الموجوده بمكان الصيد
• الاسكندرية نفس الشىء + الجرايات ( الكابوريا الصغيرة ) والمتواجدة بين الصخور.
• البحر الاحمر ( الماكريل و البلاميطة وتسمى فى الغردقة ( الشروى ) والسردين و الكليمارى ( الحفط ) يستخدم السبيط بديلا للكليمارى

الشروط الواجب توافرها فى السمكة المستخدمة كطعم الحى

• أ_ان تكون فى حالة جيدة لتستطيع السباحة والعوم الى الاسفل الا تكون فى حالة صدمة
• ب_ان يكون حجمها يتناسب مع حجم الصنار (السن – الخطاف) المستخدم فى عملية الصيد
• ج_عند استخدام الصنار (السنار – السن – الخطاف ) و غرسة فى السمكة يجب ان يتم غرسة
• بشكل صحيح حتى لا يتسبب فى موت السمكة المستخدمة كطعم
• د_يفضل فصل الزعانف الظهرية للسمكة المستخدمة كطعم

انواع مفضلة لإستخدامها كطعم حي

العنبري

و هي سمكة تشبه البربون.. يميز هذه السمكة لون ظهرها الأحمر المائل للبرتقالي و البطن البيضاء

وأهم ما يميزها هو زائدتي للاستشعار تحت ذقنها كما لو كانوا قرون استشعار لكن اتجاههم للأسفل مع العلم انها تجتذب الاسماك بصورة كبيرة جدا

البونجز

للتسقيط علي الناجل و التوين ولا يعنى ذلك انها لا تصلح لباقى الاسماك

بالنسبة للبونجز الدراك مابيخشش عليه أوى لكن الكنايات و العجام بيدخلوا على البونجز دايما.
البونجز بيدخل عليه دراك كتير فى الكونيسة ، أما فى الزعفرانة فحاولت كتير معاه لكن ماخدش بونجز و

لكن فى الغردقة و حماطة دخل على بونجز لكن بنسبة مش كتير . لأكن انا قصدى لو فيه عنبر أو شك الزور أو الكسكومرى صاحى أو حفارة فى الزعفرانة الموضوع بيختلف تماما ، الدراك داخل داخل.

بالنسبة للعمق ده بيتحدد أثناء الصيد لأن الدراك سمكة عايمة ممكن تجيبها من أى حتة.

عادة و انت نازل بالطعم الحى بيتخطف منك السمكة لو الدراك موجود فى نصف المية أو قبل الارض بشوية. و بعض الاوقات بتبقى شايفة و يدوبك تنزل 3-4 متر و يخش على الطعم.

الدراك الكبير سمك صعب شوية فى صيدة لأنة كتير من الوقت مابيدخلش على الواير بس ليه حل ممكن تربط الخيط فى مدور بمشبك و تشبك فيه سن دراعة طويل شوية، وممكن تحط سنين فى بعض، يعنى تحت عين سن تانى فى سن الاول.

الدراك بيختلف تطعيمه بالحى من مكان لأخر يعنى البورى و المغزل و بعض الموزه غالبا فى المتوسط
و البحر الاحمر هتلاقى عندك الكنايات و الكوسكومبرى و القمله و العيده والقاصه

لو اللعفه الحيه و انت بتصطادها طلعت من الميه في بوئها فقاعه هوا ..فرغها من ألهوا بابره او سن المقص عشان ده بيكون نتيجه السرعه في الصعود و التغيير المفاجئ في الضغط و بيخلي السمكه تموت بسرعه لو مفرغتش ألهوا …

تاني حاجه كاتب الموضوع بيوصي باننا ننزل الطعم الحي بالتدريج للعمق حفاظا علي انتظام تغيير الضغط تدريجيا حفاظا علي انه الطعم الحي يوصل للعمق و بحاله جيده …

عندي فكره خطرت لي في هذا الامر حبيت أضيفها ..احنا نقيس العمق و نحط علامه علي الخيط (آستك يد مثلا ) و بعدين نرفع الخيط من الميا و نركب تقل حر الحركه و بعدها علي بعد ٢م من نهاية الخيط نركب رصاصه شريط (لمنع انزلاق التقل نحو السن )

و في نهاية الخيط نركب السن بتاعنا و نشك الطعم الحي و ننزله الميا و نمسك التقل الحر في ايدنا و بعد ما السمكه تنزل براحتها و بحريتها و بسرعتها الطببعيه نسيب التقل يجري علي السلك عشان نحافظ علي وجودها تحت …للادمن حرية اضافة تلك الملاحظه للموضوع نفسه اذا وجد انه ذلك مفيدا ..

شك السمك

بالنسبة لشك السمكة ده ففى طرق كتير جدا و مدارس كتير جدا يعنى ممكن تشك من العين و من البق و من الظهر و من (الذيل من أسفل) بس كل طريقة تطبق فى حالة معينة .

أنا بأختلف مع البعض فى نقطة “يتم شكه من بعد الديل بشويه للتميل السمكه وتنزل براسها”.

أنا ممكن أنزلك سمكة شككها من عينها أو ظهرها و تنزل عادى لأن الميل مش بيساعد السمكة فى حاجة، السمكة هى اللى بتعوم علشان تنزل و ديه النقطة المهمة.

هأقولك على أنا بأفضلة و طبعا ده عن تجارب شخصية مش قاعدة و يقبل الخطأ والصواب:

• 1- لازم تبقى مجهز خيطك التقيل قبل ما تصطاد اللعفة الحية علشان ما تأخدش وقت وهى برة تاخدها و تشكها على طول.
• 2- تختار حجم السمكة اللى هتشكها و حجمها بالنسبة لفم السمكة المهاجمة يعنى هتخش تبلعها و لا هاتخدها على مرتين يبقى كبيرة عليها،
• 3- السن حجمه مايكنش كبير قوى علشان متموتش السمكة اللى شككها، وفى نفس الوقت مناسب لفم السمكة المراد صيدها دراك غير نواجل .
• 4- طريقة الشك فين بالظبط و حجم السن بيخلوا السمكة حية فترة أطول فى المياه وكمان نشيطة و ببتحرك علشان تجذب السمك المهاجم مش ميتانة خالص.
• 5- طريقة مسكك للسمكة و انتا بتشكها لازم تبقى براحة جدا و ما تفعصهاش و تحاول ماتنزلش قشر كتير منها و لا تتجرح منك (التفاصيل الصغيرة قوى بتفرق)
• 6- أول ماتنزل السمكة فى الميه سيبها شوية قدامك لحد ماتتأكد انها كويسة وبتعوم كويس لأن السمكة الصغيرة بتقى مصدومة عند الشك و بعض أوقات بتستعبط لازم تبقى نازلة بتتتحرك 😃 .
• 7- لو منزلها بتقل للأرض لازم تنزلها بالراحة خاصة لو مطول الرمال و طبعا لو معاك ناس كتير حاول تقلل الرمال و تطلع على بوز المركب. (طول الرمال بيعتمد على نوع السمكة المصادة) يعنى الناجل و التوين وش مش طوبل و تقل كبير.

ملحوظه …

لو الميه كاشفه الواير مش حينفع مش حيدخل عليه الدراك حط سن بساق طويل او سنين في بعض .

الدراك بيحب يستخبي في الحد الفاصل من المياه العكره والصافيه يعني تفضل ماشي باللنش لغايه ما الميه تبدا تغير لونها وتصفي دي افضل الاماكن له . وطبعا انا بتكلم عن البحر المتوسط البحر الاحمر لا افتي فيه.

The post الأسماك المستخدمة كطعم حي وطريقة الشك appeared first on ملوك الصيد.

و هذا الأكشن بيخلي الستيك يلتوي من جنب لاخر و تسمي هذه الحركة Walk the dog اما الستيك بيتس التي تغطس قليلا عن السطح يفضل انك تخلي بوز البوصة لتحت و تقوم بالشد بقوة متوسطة بجنب و تلم، و هنا لما تقوم بالشد، ده بيخلي الستيك بيت تغطس تحت السطح في حركة إلتوائية ثم يبتدي يطفو مرة اخري و هكذا،

يجب ان نعلم ان الشركات المصنعة تنتج موديلات و اشكال كثيرة للستيك بيتس و كل تصميم له أكشن مختلف و لذا يجب ان تغير من اسلوبك في التعامل حتي تصل للأكشن المثالي و الأكثر فعالية ومفيش صح و غلط و لكن كما أقول دائما إحنا بنحاول نزيد من الفرص ونصل لاحسن أكشن و دايما خلي عينك علي البوبر او الستيك بيت و لما السمكة تخش عليك ممكن تلاقيها بتضرب علي وش المياه ورا البوبر

و في هذه الحالة خليك زي ما انت و متوقفش لحد لما تضرب عليك ولما السمكة تضرب الكع جامد لفوق و ابتدي المناورة و هنا اهم حاجة انك تكون مظبط فرامل المكنة بتاعتك لقوة مقاومة مناسبة للخيط بتاعك

و ايضا اهم حاجة انك تخلي علطول في ضغط علي السمكة حتي وهي بتسحب منك و طبعا متخليش خيطك يرخي ابدا و خلي دايما في بالك ان السمكة بتكون بكامل قواها في الاول و بعدين بتتعب تدريجيا يعني متنزعجش لو لقيتها بتاخد خيط كتير في الاول و بعدين اول ما تبتدي تهدي ما تيدهاش فرصه لم عليها علي طول حتي لو رجعت تاخد تاني متقلقش ادام الفرامل بتاعتك مظبوطة خليك معاها بالمرصاد شد عليها بالعود و بعدين لم بسرعه علي المكنه الخيط اللي شديته و هكذا لحد ما توصل ان شاء الله

و خلي بالك حاول علي قد ما تقدر متخليهاش تنزل تحت او تروح علي الشعب علشان خيطك ميتقطعش من الشعب و حاول دايما تخلي بوز السمكة لفوق نحيتك علشان متديهاش فرصة تنزل المسايسة و الصبر و اليقظة لكل تحركات السمكة هي المفاتيح الاساسية للعبة

The post رحله مع انواع الطعوم الصناعيه || رابلات ستيك بايتس Stick Baits appeared first on ملوك الصيد.