عجينة العيش البلدي لصيد البطاطا (السيجان) الصافي!!

حتصطاد بطاطا ( صافي )… طيب عندك عيش مش حتاكله …. طيب عندك عيش مسربه 🙂 🙂

.. طيب تعالي نعمل عجينة بطريقة بسيطة وتاخدها معاك جاهزة لصيد البطاطا !!

حتجيب جردل بلاستيك او اي حاجة تخلط فيها العيش مع الميه … وحتجيب شوية دقيق!!

حتكسر او تقطع العيش حتت وتحطه في الجردل الصغير وترش عليه شوية ميه يتشربها مترشش كتير يعني بحيث ان العيش يبقى سايب سنة وبعدين تخلط العيش ببعضه وتعجنه الاول بحيث ان كل الحتت تبقى بايشة شوية وتقرب من شكل العجينة تاخد شوية دقيق وتقوي بيها قوام العجينة وتفضل هكذا لحد ما يكون القوام متماسك … وخلي بالك كل ما خلطت العجينة بايدك فترة اطول كل ما كان قوامها متناسق !

بعد كده كورها ورش عليها شوية دقيق وتحطها في كيسة وفي التلاجة في الفريز وانت طالع تصطاد خدها معاك … وعلى المية اعجنها بايدك طول ما انت بتصطاد يعني في ايدك الشمال حتاخد قطعة عجينة وتفضل تخلطها بايدك للمحافظة على قوامها ومتوصلهاش انها تفرول منك .. ولاحظ فيه ناس بتسيبها فترة في الشمس مبتبقاش حلوة.

طبعا حتقول لي انا حفضل اخلطها بايديه طول ما انا بصطاد
متقلقش دي تعود وعادة في معظم صيادين العجينة شوف ايديه الشمال وحتلاقيه عمال يعجنها علشان يحافظ عليها.

طيب حقولك شوف صياد البوري حتلاقيه حاطط العجينة على صباعه وكانه بيتشاهد وده تعود واصول صيد من قديم الازل،

طيب المهم انك تاخد عجينة … عارف ليه علشان لو كانت شغالة عجينة وواكلة عليها البطاطة حتفضل تشحت من ده وده …. ومش حتبقى مرتاح!!

طيب الكلام ده ينفع على المية يتعمل … اه ينفع طبعا يتعمل بس خد شوية دقيق معاك احتياطي لانها ممكن بالغلط تسيب منك!!!!

لو عايز تجمع السمك تحتك زفر بعجينة وياسلام لو عجينة وصرصار !!

فيه طبعا انواع كتيرة من العجينة اللي على البارد والساخن والمطبوخة وغيرها وكل صياد وليه طريقة بيعمل بيها العجينة!!
وكل عجينة وليها سمكها!!!

اوعى تنسى شليط ١٤ فرنساوي (هوك ثلاثي)!!! في عدتك!!