سلسلة سفن غارقة و كنوز صيد منسية || شعاب أبو نحاس

قررت أني أدور علي المعلومات المتاحة عن شعب أبو نحاس وفوجئت بالكم الهائل من الكنوز الغرقانة هناك وبسبب السفن الكتير الي غرقت في الشعبة دي بالذات سموها مقبرة السفن لأن شعب أبو نحاس قريبة جدا من الممر الملاحي وها أبدأ الشرح بالتفصيل

الموقع الفلكي:

بتقع شعب أبو نحاس في النقطة N 33° 55′ 43.12, E 27° 34′ 39.2

الموقع الجغرافي:

شعب أبو نحاس بتقع شمال جزر شدوان وشرق الجونة وبتبعد عن الغردقة تقريبا بحوالي 35 كم ومتكونة من شعبتين شعبة رئيسية ودي المهمة في الصيد وشعبة تانية صغيرة في الجنوب من الشعبة الرئيسية وفي ما بينهم ممر العمق بتاعه تقريبا من 5 ل 10 متر

السفن الغرقانة:

1- سفينة Carnatic

دي أقدم سفينة غرقانة ومعروفة حتي الأن دي غرقت في سبتمبر 1869 من ميناء السويس لأن قناة السويس ماكنش لسه تم افتتاحها بشكل رسمي واشتغلت بكامل طاقتها وكانت السفينة محملة بألواح نحاس وبالات قطن ومبلغ 40 ألف جنيه استرليني وكانت متجهة للهند ويعتقد ان الشعبة اتسمت بأسم شعب ابو نحاس لحمولة النحاس الضخمة الي كانت علي السفينة دي وحطام السفينة دي متواجد علي عمق من 15 ل 27 متر

2- سفينة Kimon M

السفينة دي غرقت لانها اصطدمت بالشعب يوم 12 ديسمبر 1978 وكانت رحلتها من تركيا للهند وكانت محملة بالعدس وانقسمت السفينة لجزئين جزء كلنا بنشوفه لانه فوق الشعب وجزء غرقان في المايه علي عمق من 27 متر ل 33 متر

3- سفينة Chrisoula K

السفينة دي أصطدمت بالشعب في أغسطس 1981 وكانت محملة ببلاط وجاية من إيطاليا ورايحة مدينة جدة وغرقانة في الماية من عمق 20 ل 30 متر وموقعها بالظبط هو 27° 34’ 50″ E; 33°55’30 N .

4- سفينة Giannis D

السفينة دي أصطدمت بالشعب يوم 19 أبريل 1983 وكانت محملة بالخشب وجاية من يوغسلافيا ومتجه لجدة وبعد كده تتجه لميناء الحديدة باليمن وهي متواجدة في المياه علي عمق من 10 إلي 28 متر وموقعها بالتحديد 27° 34′ 42″ E, 33° 55′ 24 N ودول أهم أربع سفن موجودة ومعلومين حاليا

أهميتها بالنسبة للصيد

تعتبر شعب أبو نحاس من الأماكن الحيوية والغنية بالأسماك وده لأنها بتحتوي علي حطام سفن غارقة وكمان بتعتبر حرف شعبي كبير جدا لان العمق بتاعها بيوصل ل 200 متر وفي جنبيها جبل شعب بيبدأ من 30 متر وبيدرج ويوصل ل 192 متر ده بالإضافة ان الشعب قريبة جدا من ضهار جزيرة شدوان وما أدراك ما جزيرة شدوان

الشعب ينفع تصطاد فيها بكل طرق الصيد من جيجنج وبوبنج وجر وتسقيط وبالنسبة للجر يفضل الطعم الحي فيها