سمكة الشرغوش وهو صغير بنسمية جنشور وهو اللي بيبقى لغاية حجم الكف كده
بعد كده بيبقى شرغوش والتيس شبة الشرغوش بس لونة بيج ومخطط بني
وسموه تيس لانه اول ما يطلع من الماية مش بيتحرك بيتيس يعني وغير كده انه سمكة غبية جدا وقوية جدا ولما تيجي تطلعة مش بيتحرك من مكانه لغاية لما نفسه يتقطع ويبتدي يطلع بس بيكون عدمك العافية
ياللا بينا نبتدي على بركة الله
موسم سمك الشراغيش
موجوده طول السنة ولكن طول الصيف بتكون قليلة جدا
موسم التفريخ بيبتدي شهر سبتمبر واحلى شراغيش تصطادها من نص اكتوبر لغاية شهر فبراير ..موسم طويل مش كده 
حنحضر معانا النهارده البوصة اليد والبوصة بالماكينة لان الشراغيش ممكن تصطادها كده او كده وممكن تصطادها بالنهار او بالليل
لو بالنهار بيكون لغاية اول ما الشمس تضرب في الماية لان الشراغيش بتحب الماية الباردة اول ما الماية تسخن تهرب للاماكن العميقة
ولو باليل يبقى عندك من المغرب للصبح براحتك يعني
اماكن تواجد الشراغيش
الشراغيش بتحب الوعر (الصخور) بتعيش حول الوعر وبتهرب داخله وسمكة الشراغيش بتعيش في مجموعات يعني لو اخدت منها واحده ان شاء الله ربنا حيكرمك بغيرها
1 – صيد الشراغيش بالبوصة اليد
الشعر الاساسي 25 او 30
وانا بنصح المبتدئين بالشعر ال30
والفروع 25
فيه بعض المتخصصين في صيد الشراغيش بيستعملوا شعر 25 اساسي
والفروع 18 وبيسحبوا بيه شراغيش تعدي الكيلو ونص احتراف بقى
الصيد يكون بالفلة وتكون من الحجم الوسط
الرصاصة تكون اكتر من ميزان الفلة بحاجة بسيطة بمعنى ميزان الفلة بيكون مخلي الجزء الفاصل للفلة هو سطح الماية (نصها فوق ونصها تحت الماية)
احنا نخلي الجزء اللي تحت الماية اكتر شوية يعني الثلث فوق والثلثين تحت
ودي نقدر نظبطها بتقل الرصاصة
حد يسالني ليه نعمل كده؟؟؟
اقولكم انا
لان الشراغيش من الاسماك اللي بتاكل الطعم وتجرة علشان كده احنا مش عايزنها تحس بمقاومة الفلة ليها وتاكل براحتها احنا بنحب نريح الزبون
نيجي دلوقتي للفروع
السنانير تكون نمرة 8 او 7
ولو عارف ان فيه احجام كبيرة تستخدم نمرة 5 او 6
طول قرمة الفروع واحده متر ونص والتانية متر وربع
يااااااااااه كل ده
ايوه لان ده بسببين
الاول ان الشراغيش زي ما اتفقنا بتاكل وهي جنب الوعر
يبقى احنا عايزين الطعم يكون عايم فوق الوعر
الثاني ان الشراغيش بتاكل وتجري
يبقى احنا عايزينها تاكل براحتها
العيار يكون تقريبا قد عمق الماية
بمعنى انك تخلي السنارة الطويلة يا دوب تحف في القرار
لما ترمي والسمكة تاكل معاك
مش اول ما الفلة تغمز تشد انت
لا
سيبها لانك بعد كده مش حتشوف الفلة اساسا
ساعتها شدها وانت مطمن
باذن الله بتاعتك
وتخلي بالك لان الشراغيش الكبيرة ليها حركات مفاجئة
بمعنى انها تكون واخداك يمين وانت معاها
مرة واحدة تضرب شمال
لو انت مش صاحي ليها تقطع على طول
2 – صيد الشراغيش البوصة بالماكينة
الشعر الاساسي او شعر الماكينة يكون نمرة 40
الرصاصة زي انت بتفضل او زي ما بتوزن معاك البوصة
الفروع شعر 30 او 35 انا عن نفسي افضل الـ35 لانة بيستحمل شوية لو السمكة دخلت الوعر
السنار 4 او 5 بكرش
الفروع يكونو فرعين واحد فوق الرصاصة وواحد تحتها او الاتنين تحت الرصاصة
ترمي وما تلمش البوش يعني ما تخليش الشعر مشدود وده لانك بترمي على وعر لو الرصاصة اتحركت حتدخل الوعر
لما السمكة تاكل معاك سيبها تضرب اول ضربة وفي التانية رد عليها وبقوة علشان لو سيبتها وحست بالسنارة حتدخل منك الوعر وان شاء الله السمكة بتاعتك لان الشراغيش نفسها قصير مش بتقدر تقاوم مده طويلة صيدها بالماكينة بيكون اسهل من البوصة اليد
انواع الطعم للشرغوش
الجمبري النطاط
الجمبري البرغوت
دود البحر
الدود الاسمعلاوي
الجرايات (نوع من الكابوريا الصغيرة)
اشهر اماكن صيد الشراغيش في الاسكندرية
ميناء الاسكندرية
ميناء الدخيلة
الميناء الشرقي
حاجز امواج القاعدة البحرية براس التين
السلسلة
الشاطبي
لسان الجامعة
كامب شيزار
كليوباترا
لسان جليم (الاول والثاني)
سان ستيفانو
لوران
المنتزة
ميناء ابو قير
ارجو اني اكون وفيت سمكة الشراغيش حقها
لاني بحب صيد السمكة دي فعلا
اراكم مع سمكة تانية ان شاء الله
معلومات تهمك …
افضل وقت للشراغيش هو وقت الاصطباحة قبل ما الشمس تعلى وخلي بالك … الشراغيش مبتاكلش على العايم
احسن شغل انك تعمل سبحة من 3 الى 5 سنون لو هاتشتغل برغوت يكون الساق 10 سم والسنانير تكون نمرة 8 او 7 وده للشراغيش
اما لو فيه بطاطا فتعمل سبحة من5 الى 7 سنون ساق 5 سم و السن 11 او 12 كفته
شرغوش الغرق يمتاز بفم اضيق وارفع من شرغوش الوعر ذو الاسنان والاول نستخدم له
السن الكفته حيث انه يعتمد علي خطف الطعم وهنا تحتاج الي سن حاد رفيع ضيق يعلق بالفم بمجرد مسك السمكه للطعم كذلك الحال مع الصبارص والكحله والغزيله الصغيرة كذلك الغلنفيش والميرة الاحجام الصغيره والمرمار .
اما شرغوش الوعر والتيوس فتحتاج الي سن كفته محمل ذو حربه مبططه الحافه وذلك حتي تتاكد من شبك السن في الفك بسرعه وعدم تمكنه من فتح السن او قص الشعر باسنانه حيث ان شرغوش الوعر عندما يشعر بالسن يدفع برأسه لاسفل ويحاول الهروب في اقرب كهف وحك الشعر في الصخر لقطعه
