أزاي تعرف نوع السمكة قبل ماتطلعها من البحر ؟؟

سمك الشعور و الخرمى و المحسنى والبونجز

كلهم فصيلة الأمبرطور (( Emperor fish )) طبعا بيختلفوا فى اللون و الشكل

انما وقت الضرب او الأكل يكادوا يكونوا نفس الشىء بمعنى ضربة او اتنين جامدين فثانيتين فهدوء فضرب شديد و سحب وجرى

و اول ما بتشد عليها تشعر بأن السمكه بتحاول تاخدك لتحت بينما هى معرضه اصلا و عايمه بالعرض مع محاولة الأفلات من السن

طبعا ممكن تطلع معاك شوية و تلاقيها بتكرر نفس الموضوع تانى و تالت لحد لما ربنا يكرمك بيها

التوين و الناجل

انت اصلا بتكون معلق الطعم فوق الأرض ممكن بمتر او اتنين حتى و ده ما بيتفاهمش

يعنى هبده و خبطه واحده و كل اللى عليك انك تفضل معلق ايدك علشان ترفع دماغها علشان ماتدخلش الوعر

و تقدر تطلع بيها و ساعتها كأنك طالع بشوال بطاطس بدون ادنى مقاومة

و لو ان الناجل ممكن يعرض فى السكه

و طبعا كل الكلام ده على حسب الغزر و العمق يعنى الـ20 غير الـ40 فالميه الأقل المقاومه اعلى و اشد

البهار

نيجى للبهار و ده فى رأيى اعفى و احلى سمكه فى ضربها لأنها ما بتتهدش بسهوله و بتضرب بدماغها في اتجاه الأرض و تطلع مترين تلاته و تكرر نفس الحكاية و هكذا ممكن خمس ست مرات قبل ما تتعب

القرش

القرش هيسحب الخيط منك زى الصاروخ و بالكاد لو قدرت تصد عليه خصوصا لو حجمه كبير بالأضافه الى انه هتلاقيه بيبرم و يلف حوالين المركب و ممكن يجيبلك الخيوط كلها فى بعض

الرباج أو الفسكر أو أبو كحله :

تنقر مرة والتانية والتالتة تخش على الطعم وهي طالعة تعمل 3 دكات ( وقفات أو فرملة) وتكررها لغاية ما تطلع

المرجان

سمكه قويه و معافره جدا و انت بتطلعها

و حتعرف انك معاك مرجانه لانك حتلاقى الخيط عمال يدك منك على طول كل شويه و لا تتوقف الى ان تصل الى المركب

و فى اكلها بتاكل بالراحه جدا لحد انك ممكن متحسش بيها

فخليها تاكل منك شويه و بعدين شد عليه

البياض

بتعوم لفوق تحس ان السمكه هربت

ابو شراره

ترعش الخيط وتحس ان الخيط مسكت فيه الكهربا