تعريف السابيكي
تستخدم السبايكي بشكل أساسي في صيد أنواع الاسماك اللي زي المكريل و الباغة و السردين و غيرها من نفس العائلة
فكرة طريقة صيد السابيكي
ببساطة هي عبارة عن خيط (قرمة) و متفرع منه 4 أو اكثر وشوش و في نهاية كل وش سنارة فيها ريش أو شراشيب او خيالات و ده بتجذب الاسماك
يتم وضع ثقل في اخر الخيط ( تحت الوش) وهي موجودة ممكن تشتريها جاهزة في أغلبية محلات أدوات الصيد أو ممكن تعملها وهي فكرتها بسيطة .
طريقة الصيد
و هي قريبة من فكرة الجيجينج، تبدأ بتنزيل الخيط الي الارض او للعمق المطلوب لو السمك عايم ثم تبدأ السحب براحة للسطح الي ان يضرب السمك معاك
أو ممكن ترفع متر براحة و تريح لتحت و هكذا (و كأنك بتعمل جيجينج بس بالراحة و ببطء) و لو السمك موجود بكثرة حتطلع عناقيد و يجب الاخذ بالاعتبار حجم السمك و حجم السن
يعني لو مثلا باغة مبرومة يكون احسن انك تستخدم سن صغير بريش صغير و هكذا وهذه الطريقة تكون مثالية لصيد كميات من الطعم الصاحي (زي الباغة في البحر الأحمر) لأستخدامها في التسقيط و التوشيح
في ايطاليا و اسبانيا تستخدم بشكل أساسي لصيد المكريل، أما في تركيا اقد رأيتهم يستخدموهها في أسطنبول في صيد نوع سمك يشبه الي حد كبير الباغة المبرومة و هناك مبيستخدموش غير السابيكي تقريبا
أما بالنسبة لتجربة هذه الطريقة في مصر أول مرة كانت في الغردقة زمااااان و واحد معانا طلع باغة قلت اجرب السابيكي و بعدين كانت المفاجئة الاقي حاجة بتشد جامد (أقول معقولة ديه اكيد مش ممكن تكون باغة) و فعلا كانت المفاجئة الاقي معايا سمكتين شرار محترمين جدا و الرمية اللي بعديها واحدة شرار تانية و وشين مقطوعين (و ده لأني كنت بصطاد بسابيكي حجم سنونها و خيطها رفيع جدا للشرار
المهم قعدت أصطاد بيها لحد الشرار مخلصلي علي كل الوشوش بعد ما اخدتلي 6 او 7 وحدات حلوين، و كان بصراحة شيء غير متوقع و كأن السابيكي ديه دواء الشرار و فعلا أصبحت السابيكي هي دواء أبو شرار و انتشرت و كثر استخدامها و بالوقت أكتشفنا انها فعالة جدا حتي ان في بعض الأحيان نحط علي السن حتة طعم صغيييرة و نسقط بيها عادي و ناخد سمك متنوع سواء شرار، بونجز ، شرايف، كنايات، و غيره من اسماك التسقيط المنتشر’ و بعض الأحيان بردو يضرب عليها سمك ثقيييل جدا و تقطع
