مساء الفل يا رجاله .. انا مريت بتجربه امبارح و حابب اشاركها معاكو .. انا عارف ان اغلبكو بما فيهم انا نعرف كويس السمك السام و مدي خطورته و كيفيه التعامل معاه بس ساعات الواحد بيكون مهمل شويه .
كنت باصطاد امبارح و طلعتلي سمكه جلخ حجمها متوسط . و انا بفك السمكه جالي تليفون فرديت عاليه و انا بفكها و ده كان غلط كبير ..
المهم السمكه شكتني في كف ايدي و اللي يعرف السمكه دي بتفضل الشوكه متعلقه في الجسم . بتسرع حاولت أشدها و انا بشدها اتشكيت في صباعي اليد الاخري اللي كنت ماسك بيها الموبيل ..
الألم كان شديد بصوره لاتتخيل بس لاني عارف السمكه دي كويس انها سامه بس مش بتموت .. فأقولت استحمل الألم شويه
بعد شويه الموضوع بدأ يسوء الألم بيزيد و مش عارف اخد نفسي و مش قادر اتكلم من الألم .
الشكه اللي في صباعي تقريبا كان في مركز عصبي .. في الألم عمال ينتشر من في كل ايدي لحد كتفي .
المهم اصحابي ودوني المستشفى في الطوارئ والدكتور شاف نوع السمكه اللي شكتني و هو كان علي علم بيها .. اداني الحقن دي علي طول
- Mesporin 2 mg IV
- Voltaren 75 mg injection
- Solu-Cortfe 25mg
الحقنه الأولي دي تقريبا مضادات الميكروبات – مضادات البكتيريا .. مكتوب عليها لعدوى الجهاز العصبي و التنفسي و تلوث الدم البكتيري .. الحقنه دي وريد مع محلول سلاين
الحقنه التانيه فولتارين مسكن
و الحقنه التالته كورتيزون مضاد للالتهاب
و قعدت في المستشفى حوالي ٣-٤ سعات عشان يتاكدو ان بقيت بعرف اتنفس كويس
الدكتور و انا مروح لما اتحسنت كتبلي علي مضاد حيوي و مسكن
الحمد لله عدا دلوقت يوم كامل .. الألم لسه موجود بس اقل بكثير من امبارح …. ربنا يحفظكو كلكم من كل سوء
