تسويح الفله .. يعني الدور اللي انت بتختاره بيكون لي مرمي اول واخر حسب قعدتك فيه .. و منه إللي ميته ماشيه ومكمله وده بنسميه مايه سارحه وفيه منه اللي مايته بتلف وترجع تاني وده بنسميه مدور او دور . دوار
نبدأ حضرتك في الدور اللي ميته ماشيه علي طول ومكمله هاترمي الفله من اول الدور وتسيبها بس مش علي راحتها تحاول تحرق عليها بسيط بحيث سرعتها تقل
لان في نقطه في الدور لازم تثبت عندها الفله علي ايدك وتبدأ تشتغل علي السمكه الموضوع ده فايدته إنك بتشغل الدور كله وتجمع منه السمكه في نقطه واحده وهى نقطة تثبيت الفله علي إيدك .
اما بقي الدور اللي هو بنسميه مدور ده بيبقي سهل نوعآ ما لانك بترمي الفله من اول الدور وهي بتتسوح إلي ان تصل الي نقطة النهايه وهي نفس النقطه اللي هاتثبت فيها الفله
وتتعامل فيها مع السمكه مع مراعاة انك ايضآ هاتحرق علي الفله و تحاول تقلل سرعتها لحد ما توصل لهذه النقطه
الفرق مابين الدورين انك في الاول انت اللي بتختار نقطة تثبيت الفله وده علي حسب قرائتك للدور
اما الدور التاني هي بتكون نقطه مخلقه من التيارات والدومات المائيه وبتلاقي الفله وقفت فيه لوحدها من غير اي تدخل منك
وطبعا الدور التاني اسهل في التعامل شويه عن الدور اللي مايته سارحه علي طول ادي معني كلمة تسويح والفرق بين الدورين والميات مع العلم ان فيه طرق اخري لقراءة المياه .
وبالمناسبه للي عايز ياخد بلطي في التوقيت ده :
- سوح لها الفله مع التيار .
- و يفضل فله ذات الاربع رصاصات بلي .
- و شفاطه طويله ومع اول تثبيته هاتلاقي غمزه والتانيه والتالته ترد عليها
- و حذاري في التوقيت ده تنزل برمال اقل من 25
- و يفضل رمال طويل مش أقل من متر .. ومتر وعشرين
- و طول القرمه حسب عمق الدور اللي انت متواجد فيه ويفضل الادوار العميقه نوعا ما
- و طبعآ سن ٦ او ٧ سلكه رفيعه او عاديه مش هاتفرق لان السمكه فاتحه بقها ولو إني بفضل السلكه الرفيعه
- وتكون ظابط عصفورة الماكينه علي ضربه ماتقلش عن كيلو او اتنين لان سمك الاحجام الكبيره اللي بتعدي اوزان ٣ & ٤ & ٥ ك بتاكل علي الفله في التوقيت ده زي البياض والدقماق والمباريك وغيره .
- وتختار دود بلدي وحجمه متوسط .
وتصفي النيه وتتوكل علي ربنا ..وربنا الرزاق .
