طريقة صيد سمك البلطي بالغلة

قلت لما اكتب طريقة صيد الغلة (القمح)بتفاصيلها ممكن ان تنفع اخوانى محبى صيد النهر خصوصا المبتدئين لانى عارف ان هنا فية جهابذة فى الصيد
فمثل هذة الطريقة او الخضار من ثوابت صيد النهر منذ القدم واظن ستظل

اولا

نقوم بتجهيز العدة عود متوسط 60و 3 او 4 يجب ان يكون ذو لبلوب مرن الخيط الرئيسى على على المكنة 30 يركب علية الغماز ويكون صغير جدا ثم يركب الثقل ويكون مناسب للغماز طبعا عشان ميغطس ثم نربط الخية ثم نقوم بتركيب الوش وخيط الوش يكون 25 والسنارتين مقاس8

وتجهيز العدة بهذة الطريقة لسبب مهم وهو ان حبة الغلة خفيفة الوزن والصيد على الشط مباشرتا يعنى المسافة قصيرة فاى تقل السمكة هتحس بية فلازم نجهزلها عدة خفيفة

ثانيا

الغلة تكون جاهزة وتجهيزها سهل وهو اما ان تنقع فى الماء مدة من 5الى 6 ساعات او تغلى فى الماء وفى الحالتين تنشل من الماء قبل ان تفتح

ثم نقوم باختيار المكان وذلك مهم فيجب ان يكون على الشاطئ مباشرتة والشط يكون فية دوران خفيف من نحيتك مش من نحية المية ودة عشان يسمح بوقوف الغماز

والمكان دة اسمة الدور ثم نقوم برش كمية من الغلة فى هذا الدوران ونتركة حوالى 20 دقيقة لما يجمع سمك والغلة ترش على الشط مباشرة و على الطينة اللى بينة

المرايا

علي طول تحت اول المية ودى اسمها المرايا وفيدتها ان الضوء بيضرب فيها السمك بيشوفها ويتجمع عليها ثم نضع حبيتين فى السنارتين ونظبط المسافة بين السنارة والغماز مسافة قصيرة جدا لا تتعدى شبر ونص ولا نجلس فوق الدور علطول بل نجلس بجانب الدور بحيث يكون العود بالجمب يعنى بتحاول تكون مش ظاهر للدور

وبعدها نسمى ونرمى جوة ونسحب بالراحة على الدور لحد لما الغماز يبتدى يميل دة معناة ان التقل لمس الارض ونصبر اذا نقرت نصبر اذا غطست او سحبت نضرب

وتكون ضربة شكم يعنى لا تسحب براحة تضيعها ولا تضرب بقوة برضة تضيعها او تقطع الوش او تكون مشففة

انتبة ان السمكة قريبة منك يعنى اول ضربة هتكون ردتها قوية لو سمكة حلوة والوش 25 فديما تذكر تشريق المكنة يكون جاهز ولو اكلت ومنعت زود شوية غلة