ملوك الصيد | أفضل أماكن صيد السمك في مصر

أفضل أماكن صيد السمك في مصر || اكثر من 50 دور لصيد السمك النهري في مصر

هذا الموضوع تم نشره في العديد من المواقع والصفحات المهتمه بالصيد .. ولكن الجديد هذه المره .. انه تم اضافة المزيد من الأدوار والمعلومات اليه .

ادوار مجربة ممكن تختار منها الاقرب ليك وربنا الرزاق وارجو من لديه مكان غير موجود اضافته في رد لنضيفة لعمل قاعدة بيانات لاماكن الصيد الممكنه مع جوده كل مكان والانواع الموجوده به والسنون المستخدمه ان امكن .

1- منطقة محاجر ابو زعبل

سمك بلطى كفافى سريع وقرموط بحجم كبير و السمك هناك كبير و المياة عميقة جدا جدا جدا من 7 متر و فى حتت تيج 12 متر دة كدة و بتسقط امامك وليس بالداخل .

2- منطقة دير الميمون

قبل بنى سويف وبعد الكريمات جميع الاسماك وخاصة الرعاد

3- الترعة التى امام البلاجات فى فايد

قرموط سريع جدا

4- ترعة الصحافة

تروح لها من ابو زعبل تركب عربة باتجاه بلبيس وتنزل الصحافة وتمشى شوية فى الزراعة بلطى سريع

5- ترعة تروح لها من شبين

تركب عربية بتقول الشرابية وممكن تنزل الشرابية او كفر عبد النبى بلطى حلو

6- ترعة القلج

خلف السجن بلطى كفافى

7- أبو الخاو طريق الخطاطبة الطيرية كوم حمادة

جميع أنواع السمك بلطي في النهار (ريم) وف الليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر

8- المنصورية و النجيلة ( كفر الزيات )

جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر

9- كوم شريك ( كفر الزيات )

10- قناطر بولين (بحيرة )

لطش من على البغلة طوال أيام العام

11- فى منطقة فى حلوان اسمها ركن فاروق

(و هى مرسى للصنادل الخربانا) اخر طريق الكورنيش فى اتجاة حلوان لحد متلاقى مصنع لمواسير البترول (طعم و عجين ) حداف و غماز ( فلاش باشا )

12- القناطر

هتروح القناطر و تسئل عن سجن القناطر و انزل بعدها عند المطافى و اول يمين قبل الكبرى الى علية الكامين تدخل يمين لحد اللسان و انزل هتلاقى جزر على فكرة الدوار حجارة (طعم ) غماز

13- غمازة الصغرى

بعد حلوان على الكورنيش هناك ثلاثة ترع موازيين… آخر ترعة أدخل يمين حتى تجد هيش… بلطي جميل أحمر كفافي حجاري بالطعم الموسم من شهر 5 لكن ممكن يشتغل من شهر 4

14- ابتداءا من المناشي – منشأة القناطر

ساعات بيقع فيها غلطات محترمة تشتغل صباحا ( بالريم ) و مساءا بالطعم و لو الجو هادي باليل و مافيش زحمة ممكن ترموا حداف بسن 6 أو 5 و طعم محترم ( معنكب ) و تلعبوا على البياض.

15- اتجاه الباجور :

بالترتيب كدة : صروة – أو السبع روس و ده دور حداف و غماز

16- بير شمس

و ده دور غماز بالأساس و ساعات الحداف بيشتغل فيه لكن عيبه إنه بعيد شويه

17- الباجور

و فيها عدة أدوار على الحجر على كيف كيفك بلطي و رعادات

18 – اتجاه نكلا :

نكلا نفسها – ولكن أنا ما بفضلش الصيد فيها أولا علشان المية هناك حامية جدا و ما ينفعش فيها غير الحداف و من على البغال مش من البر.. و ثانيا .. علشان الريحة..!!!!

19- أبو غالب :

فيها دورين حلوين جدا عند المجزر و تقدر تشتغل فيهم غماس و حداف و البلطي بتاعها يفرح

20- الحاجر :

و هي بعد أبو غالب على طول و فيها كذا دور و أنا بفضل دور المدرسة و سمكها زي أبو غالب تمام

21- الخطاطبة :

وهو دور مسلي سواء عند الجامع اللي على الطريق أو قدام على الحجر… و لكن عيبه إن سمكه صغير و الراي فيه كتير ( بالمناسبة الدور ده في يناير تشيل منه تعابين زي ما إنت عايز )

22- كفر داود

دور ريم و طعم و سمكته أكبر شوية من الخطاطبة بس المية فيه حامية و علشان كدة هو دور بالأساس غماز.

23- الدلنجات و دمشق –

زي كفر داود بس سمكتهم أكبر و لكن مشوارهم أبعد بكتير.

24 – اتجاه قبلي :

الصنادل – دار السلام – و ده مكان قدام شرطة المسطحات و بنروحله بالمعدية و ما تستهونوش بالمكان ده لأن سمكته لو اشتغلت بتطلع منه سمك محترم خصوصا على الحداف .

25- كوتسكا

دور تسلية ( لتعليم الصيد ) لا ينصح به.

26- الإخصاص :

دور حلو جدا بس لو المية واطية في النيل و تاخد بلطي حلو منه.

27- ميت القايد :

دور رائع لصيد الريم صباحا و الطعم في الليل ( الحداف ما ينفعش علشان الحجارة هناك كبيرة و المية سريعة )

28- نزلة عليان

(غمازة) و من هنا نخش على الجد – يعنى عدة نضيفة و خيط جديد و سنون محترمة و ده دور بلطي و رعدات و شيلان و بياض و أنوم.

29- جرزا

زي نزلة عليان بالظبط و هي في الجهة المقابلة منها.

30- من جرزا إلى بني سويف

ممكن تعد أكثر من 100 دور على الناحيتين و معظمهم أدوار تقيلة و زي الفل

31 – القناطر

بشرح من صياد محترم جدا للقناطر و الادوار التمام جزاة الله كل خير:

ان القناطر صعب تلم بكل ادوارها كلها لان القناطر فيها فرع رشيد ودمياط والتفرع بيبقى في القناطر وفيها حوالي 4 رياحات (المنوفى ، التوفيقى ، البحيري , الناصري) من اجمل الرياحات قي القناطر المنوفي ميته شديدة جدا فالحداف افضل الطرق وارضه حجارة .

الطعم :

دود الارض عادي وعنكبوت للبلطي والراي و البياض و الانوم و الدقماق وغلطات شيلان , العجينة للراي و للبني والبلطي و غلطات مبروكة وممكن تطعم للمبروكة من البوص النامي على الجوانب بس تكون حاضرة في المية .

الرياح البحيري

من الرياحات القوية وهي الممتدة على طريق الخطاطبة وفكرته نفس فكرة المنوفي والرياحات في القناطر كلها او اغلبها ميتها شديدة لان القناطر هي منطقة الهاويس لهذة الرياحات فبتبقى المية في بداية إندفاعها اما التوفيقي والناصري فمعرفش عنهم اي معلومات بصراحة .

فرع رشيد في القناطر

فحدث ولا حرج فية عندك ياسيدي الكوبري القديم ودا في الصيف شغال طعم وعجين … وطول السنة تقريبا التشميط كويس .

الجرف بين الكوبريين

ودا دور ممتد بطول المناشي ويقع ما بين الكوبري القديم والكوبري الجديد ودا طعم وريم حلو جدا في الصيف وتشميط طول السنة تقريبا والسمك بلطي وبياض وانوم وقليل جدا من البني وشيلان نادرة جدا .

نطلع بعد كدة على الكوبري الجديد والرمي من فوق الكوبري ناحية قبلي غير بحري الكوبري قبلي هيبقى زي الجرف والكوبري القديم اما الرمي من من نفس الكبري بس على بحري بكون على المشاية الملحقة بالكبري من فوق العيون مباشرة ودي بتكون ميتها شديدة جدا جدا فية مواسم المبروكة بتاكل من عليها في المية الحامية بالطعم (عنكبوت) او ريم او البوص (قصب الفار) وهو البوص النامي على حواف النيل

المواسم دي عادة بتكون في شهر 6 , 7 ,8 الطعم التاني المميز العجينة بس دي عايزة حرفنة شوية في تجهيز العجينة وحرفنة في الصيد بيها علشان العجينة ما تسيبش من السنارة من شدة المية والعجينة دي من الطعوم السحرية إللي كتير من الناس بيتجاهلها بسبب صعوبة الصيد بيها انواع السمك الراي – البني – القراميط – البياض – الشيلان إن وجدت

و البلطي والمبروكة تأكلها لكن بالصدفة ويفضل في حالة توجية الطعم لصيد البياض تزفير العجينة بوضع زفارة سمك عليها لانها جاذبة للبياض الطعم الدولي (مصارين الدجاج) ودي للقرموط رقم واحد وصدف ثعبان في الشتاء وصدف مبروكة العنب البناتي للقراميط والبني في شهر 7,8 والصيد بالسمك زي انك تطعم راية صغيرة جدا او جلمانة ودي ممتازة للبياض والشيلان والرعاش القرموط والبني الكبير جدا بيدخل عليها بس دي عايزة يكون معاك سنارة تطعمها وتنساها بس الغلطة فيها بإذن الله بحاجة محترمة

زمان كنا بنجيب بيها قشر بياض بس دا إنقرض ننزل من فوق المشاية على الجرف البحري ودي ادوار مبروكة ممتازة بس لما المية تكون عالية وبلطي في موسم الريم , وبالطعم في الشتاء التعبان بياكل كويس وادوار القراميط كتير نظرا لوجود البوص ودي صيدها بالطعم الدولي (مصارين الدجاج)

نطلع بعد كدة على منطقة السد او الشلالات ودي منطقة ممتازة لهواة الصيد بالفلة (الغماز) بالريم وبيقع فيها بلطي محترم بس لازم مركب وتنزل على الهدار او الشلال او كما نسميها في القناطر الدشم والراي والبني بياكل كويس في الصيف على العجينة والطعم …..والمبروكة والدقماق والبياض والتعبان و الشلباية كل الاسماك دي هناك بس انت ورزقك ..لانهم مبيكلوش بالساهل وعايزين صبر وحرفنةواحب اضيف بعض الاماكن .

32-بنها ,برشوم,

الطريقة حداف الطعم دود ارض الاسماك انوم وبياض وممكن غماز ادوار حجر بلطي ورعاش كتير

33-ترعة الاسماعيلية ,سرياقوس

علي الهويس الجديد حداف جميع انواع السمك والطعوم ,البني كتير جدا

34-التحرير

عزبة الباشا غماز بلطي ورعاش وبياض على الوش الطويل

35-القنطرة غرب

الرياح ,ترعة ابو خليفة الطريقه حداف و غماز بياض رهيب بالعلق,وبلطي

36-الشرقية ,السعديين ,ترعة ابو الاخضر

حداف بياض وكرور ولبيس وانوم وبني

37- شبين القناطر ترعة الشرقاوية و الحسنية

بلطي علي الغماز وقرموط , نهارا ريم وليلا طعم ولهواة السبلة والسمم (مالهاش حل)

38 – مدينه الفيوم ( اللهون – بحر يوسف-بحر واصف_ وادي الريان)

الطعم هناك بيكون سمك صاحي واحلي طعم هو سمك البوري وده هتجيبه تشميط من المجره ويليه ابو رياله البني وابو رياله واضعف طعم هو الِشر .

39 – خلف مطار النزهه بالأسكندريه

المكان إسمه العفاريتى وفيها سمك جامد .

40 – مسطرد :

خيط 45 سن 5 حداف الطعم :دود / عجين .

41 – جزيرة الوراق :

غماس فى النهار ريم وبالليل طعم بلدى رعاش محترم وبلطى .

42 – مصفة ذات الكوم :

تنزل الجلاتمة وتاخد عربية او توك توك او لو معاك عربية يبقى تمام هتفضل ماشى على طريق نكلا لحد ما تلاقى ملعب وسوق لبيع المواشى انزل سوق المواشى ودى بداية المصفة وانت داخل بقى ، بلطي واحيانا قراميط .

43 – كوبرى الجلاتمة:

انوم ورعاش وقراقير وبلطى

44 – قلتي الكبرى بمركز الباجور -المنوفية :

بياض وقراميط ومبروك ( المواصلات من المؤسسه او موقف عبود تركب عربيات منوف وتنزل قلتى على كبري بنت الباشا الاجره 5 جنيه او تركب عربيات الباجور الاجره 5 جنيه وتنزل الخضرة (الكرته) وتركب توكتك ب3جنيه وتنزل قلتى على كبري بنت الباشا زمن الوصول من المؤسسه او موقف عبود ساعه اوساعه ونصف )

45 – المنيل كوبريي عباس والملك الصالح ،

مرسي الاتوبيس النهري بالروضه ، الكورنيش بعد موقف الاتوبيس النهري به مكان لا يمكن ان تختطة عبارة عن نصف دائرة تدخل في النيل ولا يوجد تحتها ارض علي الماء مباشرة بلطي وانوم ، الطعم : دود ريم .

46 – ترعة بحر البقر

من ناحية بورسعيد قبل الدخول لطريق القناطر ، السمك بياض وقراميط وبلطي الطعم دود ومصران وعجينة

47 – ابو المطامير

مصرف حسن عبدالله بلطى والطعم غلة