أنواع طعم الجمبري و طرق حفظه

1_ الجمبري العقر

هو نوع من الجمبري صغير الحجم متجانس اللحم يفضل شراءة طازج ويمكن استخدامة للصيد من الشاطيء او تسقيط

الجمبرى طبعا من الاكلات اللى ما فيش حد مش بيحبها و القيمه الغذائيه فيه عاليه جدا ..كل 100 جرام بتحتوى على 19 جرام بروتين بالاضافه الى الفسفور اللى الجمبرى غنى جدا بيه

وهو من أهم أنواع الطعم أيضا الجمبري العقر ويتم لقفه من البحر المتوسط بشبك الجر في مناطق معينة ،

مواسم تواجده بكثرة في فصل الشتاء الا أنه موجود طول العام ، ويتم الحصول عليه من حلقة السمك ( الأنفوشي ) أو سوق الميدان ، أو محلات بيع الطعوم

ويتم الصيد به سواء طازج بقشرة بعد قص الرأس وجزء من الذيل وهو مناسب جدا للدنيس والغوزيلة الكبيرة والوقار والعديد من الأسماك الأخرى ولكن هو الأفضل للأسماك الكبير

ويفضل وضعه في ورق جرائد بعيدا عن الضوء جو رطب مخرج للتنفس لكي يبقى اطول فترة ممكنة

الصيد به يتم بالطرق الاتية

1- يمكن تركيبه كاملا في السلاح من الذيل الي الراس اذا كان صغير الحجم
2- يمكن نزع الراس وتركيبة بنفس الطريقه السابقة
3- يمكن تقشيرة وتقطيعه بالمقص الي قطع صغيرة في حجم عقلة الاصبع وتركيب في السلاح
4-يمكن الصيد به اكثر من مرة عن طريق تمليحة ووضعة بالثلاجة

• وللتمليح .. يفرد الجمبري علي جرنال كامل لامتصاص الماء الذائد
  

1. يوضع علية طبقه من الملح
   
2. يوضع في تيار من الهواء بعيدا عن اشعة الشمس المباشرة
   
3. بعد ساعتين يوضع في كيس ويوضع في الثلاجة لحين الحاجة
   

من الممكن بعد تمليحه و ازالة الملح من عليه نضع قطرات من الزيت ونقلبه جيدا ثم نضعه فى مصفاة لتصفية الملح والزيت .بهذا يحتفظ بقوامه وزفارته اطول فترة ممكنة وده عن تجربة شخصية

2_ الجمبري النطاط

الجمبرى طبعا من الاكلات اللى ما فيش حد مش بيحبها و القيمه الغذائيه فيه عاليه جدا ..كل 100 جرام بتحتوى على 19 جرام بروتين بالاضافه الى الفسفور اللى الجمبرى غنى جدا بيه

وانواع الجمبرى كتيره جدا منها اللى بيعيش فى المياه العذبه و منها اللى بيعيش في البحار …. وموضوع اليوم هوا أنواع الجمبرى وبعض الأختلافات والمميزات الخاصه بكل نوع وراح نبدأ بأول نوع وهو (الجمبري النطاط)

ويعتبرمن أغلى أنواع الطعوم في ، ومواسم تواجده بكثره في الصيف ، ويتم لقفه من البحر من على حواف الصخور بشبكه على شكل مثلث ، وهو مناسب جدا للدنيس والشراغيش ،

والحي منه يستخدم في صيد أسماك القاروص عن طريق شبك الطعم من الرأس في السن ويبقى النطاط حي لصيد القاروص ،

والميت من النطاط يعتبر من أهم الطعوم لصيد الغوزيلة ( الوز،كبيرة الحجم) من منطقة المكس ، ويقبل علية كذلك العديد من الاسماك ويمتاز بقوة مقاومته للنتش من الاسماك الصغيرة مجتذبا الاسماك الكبيرة وبرغم غلاء اسعاره الا انه رقم واحد في صيد الأسماك وخاصة الكبيرة نوعا ما

بالنسبة لفصيلتها فيفضله اولا الشراغيش والقاروص والوقار والتيوس والدنيس بل يأكله جميع الأسماك تقريبا وخاصة اذا كان حي

وبرغم غلاء سعره الا ان الصيادين بتهافتون عليه .. ما السر !!!

السر ان سمك البحر الأبيض المتوسط هو اكثر سمك لا يحب ان يأكل الا من بيئته البحرية بل من البقعة نفسهاالتي يعيش فيها

بمعنى ان اردت الصيد الجيد من البحر المتوسط قم بصيد طعمك من نفس المكان الذي ستصيد منه ,

وبالنسبة للنطاط هو طعم يتمتع بالقوة والقدرة على العيش خارج الماء مدة لا تقل عن 24 ساعة

بالأضافة ان طبيعة جسده متماسك مما يعطيه الثبات على السنار ولكي تأكله السمكة غالبا ما تعلق في السنار نظرا لقوة جسده

الجمبري النطاط يعتبرمن أغلى أنواع الطعوم في السعر ، ومواسم تواجده بكثره في الصيف ، ويتم لقفه من البحر من على حواف الصخور بشبكه على شكل مثلث ،

وهو مناسب جدا للدنيس والشراغيش ، والحي منه يستخدم في صيد أسماك القاروص عن طريق شبك الطعم من الرأس في السن ويبقى النطاط حي لصيد القاروص ،

والميت من النطاط يعتبر من أهم الطعوم لصيد الغوزيلة ويقبل علية كذلك العديد من الاسماك ويمتاز بقوة مقاومته للنتش من الاسماك الصغيرة مجتذبا الاسماك الكبيرة

طريقة حفظ جمبري النطاط :

كثير منا يصطاد بالجمبري ولكن الجمبري فيه مشكله انه طري ويتقطع وبياكله السمك بسرعه خصوصا اذا المكان فيه سمك صغير هذي طريقة 100% لحفظ الجمبري وجعله اقل طراوه

وهي انك تشتري لك 2 كيلو جمبري او اكثر ويكون جديد وطازج وبعد كدة قشرة و بعدين تجيب لك علبة ملح الطعام وترش نصف العلبه على الجمبري مع التقليب المستمر

بعدين اربط الكيس وحطه في الفريزر لمدة ساعتين الى ان يتشرب الملح وبيكون جاهز للصيد

وبعد ما تخلص من الصيد لا ترميه لانك تقدر تستعمله مره ثانيه اربط الكيس ورجعه في الفريزر واستعمله اكثر من مره

بعد ما نطبق الطريقة نجد ان الجمبري ناشف اكثر من قبل وما يتقطع بسرعه يعني بيكون لحمه مثل قساوة لحم السبيط تقريبا ونجد ان الجمبري مش بيتلف بسرعه ويطول .

المقدار:

لكل 1 كيلو جمبري مقشر ربع علبة ملح طعام

و يتم صيده عن طريق اللقف بملقاف ودي عملية مش سهلة

واماكن صيده بتكون بين البلوكات الخرصانية اللي على الشاطي وخاصة الصخور الموجوده بجوار نادي الكشافة اللي في بحرى

وبيكون مع الصايد ملقاف على شكل مثلث ويغطس به ويتم مسح البلوكات بطريقة عرضية

وبعد كدة يفرز الجمبري من بين الخضرة وبعد مدة صيد 3 أو 4 ساعات ( لزوي الخبرة في هذا المجال ) بتكون كمية الجمبري اللي تم صيده لا تتعدى الكيلو جرام

وهناك طريقة اسهل بس متنفعش غير بلليل وهي انك بتاخذ معاك الملقاف وبطاريه وياريت تكون قويه

وبتيجي بين البلوكات الي في البحر وطبعا بيكون البحر هادئ لانه لو عالي فانسي وبتنور بالبطاريه بتلاقي النطاط بينور في المايه وبيجمع علي الضوء تقوم لقفه علطول وهكذا

حفظ جمبري النطاط حى

يحفظ في ماء البحر في الدرج الأسفل من الثلاجة أو يفرد على خيشة منداة بماء البحر في مصفاة و يغطى بخيشة خفيفة منداة بماء البحر و أيضا في الرف الأسفل من الثلاجة

لكن طبعا وضعه في إناء فيه ماء البحر أفضل و لكن لابد من زيادة خفيفة في ماء البحر لتجديد الأكسيجين

انا قد جربت تمليح الجمبري والحقيقة هو رائع فمشكلة الجمبري الاولي انه بيتاكل بسرعة او يسقط من السن
اما بعد التمليح فانه يصبح في منتهي الروعة وزي الكاوتش وانا جربت استعماله والسمك بيدخل عليه زي الفل وبياكل فيه زي الجمبري الطازج تماما جربته في راس البر وفي البحر الاحمر

وهذة الطريقة للتمليح كما اجريتها

1. يتم تقشير الجمبري ويفضل الجمبري العفر (يعني المحمل شوية)
   
2. يتم تقطيع الجمبري الكبيرة الي قطع مناسبة باستخدام مقص لان القطع باليد يتسبب في هري الجمبري
   
3. يرش الملح الخشن علي الجمبري بعد فرش الجمبري علي ورق جرائد لا متصاص الماء
   
4. يتم تقليب الجمبري برفق من وقت لآخر
   
5. يعرض الجمبري لتيار هواء او وضعه تحت المروحة
   
6. لايعرض الجمبري للشمس لان ذلك يتسبب في اسمرار لونه
   
7. لاتنتظر حتي يجف الجمبري تماما بل اجعل به بعض الطراوة والرطوبة
   
8. يوضع في علبة محكمة الغلق ويتم حفظه بالثلاجة لحين الاستعمال
   
9. ماتبقي منك بعد الصيد اعد حفظه في الثلاجة دون خوف عليه
   

البودرة التي توضع علي الجمبري تحافظ علي لونه فلا تجعله يتغير للاسود ولكن ده في حالة الجمبري الطازج مش المجفف
والبودرة دي اسمها (د نكار) وتجدها عند العطار

والبعض يستخدم البودرة التي يستعملونها في اللحام بالاكسجين ولكن اكرر ده للجمبري بدون تجفيف ويحفظ بالتجميد في الفريزر
ملحوظه هامه : هذه البودره تمت تجربتها على جمبري في البحر الأحمر وثبت فشلها حيث لم يضرب عليها أي نوع سمك وهذا بناءاً على تجربه شخصيه ..

اهم الاسماك اللي تتغذى علي الجمبري النطاط فهى :

• دنيس
  
• شراغيش
  
• جلانفيش
  
• زنجاريا
  
• شعور
  
• ميرمار
  
• كحله
  
• ميرا
  
• سبارس
  
• غوزيله
  

3_ الجمبري البرغوت ( الميكروسكوبي )

يعتبر البرغوت من أشهر أنواع الطعوم في البحر المتوسط وفي المياه العذبه على السواء ،

وترجع هذه الشهرة لرخص تمنة وإقبال العديد من أنواع الأسماك علية في البحر والترع ،

والبرغوت ده جمبري مية عذبة وبيتلقف من الملاحات وبعض الترع والمصارف وممكن تلاقيه صاحي بس الصبح بدري عند بتوع الطعم وبيكون صغير جدا لا يتعدى عقلة الصباع

ويتم لقف البرغوت من المياه العذبة الضحلة ، ويقل حجمة في الصيف ويكبر في الشتاء ..ويصلح لجميع انواع الأسماك بما فيها الدنيس والشراغيش والمرمار والمرجان ، حتى البلطي

الطعمة الحية مفهاش كلام بالنسبة للسمك وصياده … بس المشكلة انك في شهور الصيف زي اليومين دول الموجة الحارة عالية جدا والبرغوت مبيستحملش

يعني حتلاقيه بيموت بسرعة حتى حتلاقيه في الطاولة اغلبه ميت … لانهم مش بيستعملوا طاولات مجهزة بالثلج لنقله من البرلس مثلا للاسكندرية طبعا كمية كبيرة في الطاولة مع الحر … النتيجة طعماية ميتة بس طازة !!!

طيب ايه موضوعنا النهاردة … موضوعنا اننا حنقول طريقة تحافظ بيهاا على الطعماية لاكتر من صيده وهي طريقة سهلة جدا !!

بص حضرتك .. بالنسبه للأسكندرانيه حتروح محطة مصر او اي حد بيبيع جنبري برغوت طازة بس بالسعر الحقيقي زي الحرش في محطة مصر او سوق ابو سليمان وحتشتري كيلو جمبري او اتنين لو الجمبري حلة وطازة وماسك نفسه …. وحتروح لاي نجار او ورشة نجارة وخد شوية نشارة من تحت المنشار !!

حضرتك حتقسم الجمبري اربع او انصص حسب احتياجك في كيس بلاستيك وحترش شوية نشارة في كل كيس وحتقلبهم علشان الجمبري كله يتغطى بالنشارة وحتقفل الكيس كويس وعلى التلاجة على طول في الفريزر !!

كده خلاص لما تطلع تصطاد خد معاك كيس مثلا وسيبه في التلاجة وخد اللي يكفيك ولو اتبقى منه ارجع بيه وخليه في التلاجة تاني واستعمله في صيده تانية!!

الطريقة دي بتحافظ على الجمبري في حالة كويسة وماسك نفسه وقليل جدا لو اتهرى منك !!!

دايما احتفظ بطعم في تلاجتك تحسبا لاي طوارئ !!

فيه صيادين بتحط الجمبري في رده … طبعا بتحافظ عليه من انه يحمر بس النشارة بتحافظ على قوامه لحد ما زي يوم ما اشتريته والطعماية بتكون خشنة عند وضعها في السلاح.

طبعا فيه صيادين محترمين ليهم طرق تانية طبعا لها كل التقدير وبنحترم كل رأي!!

طبعا حتلاقي حد يقولك كل شوية النشارة حتلزق في ايدك … وحاجات من هذا القبيل … جرب وشوف النتيجة وحتعرف الفرق اكيد!!

• ملحوظه هامه
  

البرغوت للبوصة اليد لانه مش بيستحمل الماكينة

طريقه أخرى لحفظ الجمبري البرغوث
قرأت طريقة حلوة في حفظ الجمبري البرغوت وجربتها ونجحت
اشتريت جمبري من السوق.. برغوت ميت طبعا بس طازة يعني لونه لسة ازاز يعني شفاف وممكن تلاقي كام واحدة صاحيين

واول ما روحت فردته على ورقة جرنان (واستبعدت السمك الصغير اللي بيبقى مع الجمبري) لحد ما صفى الميه اللي فيه …

تقريبا نص ساعة بعد كده بانقلهم على ورقة جرنان تانية واخلطهم بالملح ( ملح طعام عادي ) علشان طازة بالاقيه ماسك نفسه كويس اوي وما بيتهريش معايا

بعد كده فردته تاني نزل شوية ميه … آخر مرحلة بقى اخدته على ورقة نظيفة تانية ورشيت عليه مادة اسمها دنكار دي بتيجي من عند العطار رخيصة جدا..

تغير لون الجمبري وخلطتها كويس وبعد كده قسمت الجمبري مجموعات على قد كل مرة ولفيت كل مجموعة لوحدها في كيس وحطيتها مباشرة في الفريزر … انا عندي ديب فريزر ما بيعملش ثلج

وجربته وكان بقاله 3 ايام في الفريزر والحمدلله كان كاني لسة شاريه وكان ماسك نفسه ..وفعلا عن تجربة لما استخدمته بعد 3 ايام كان محتفظ بلونه الازاز كاني لسة شاريه حالا

ولاني جففت الجمبري كويس من المياه الزائدة كان قوامه متماسك جدا وما بيتهريش من مية الملح في البحر بسرعة … في الوقت اللي ماكانش في سمك بياكل في المكان كان الجمبري محتفظ بقوامه 100% كاني لسة مطعمه حالا

عايز اقولكم ان الطريقة دي وفرتلي كتيييييييييييير لاني باقسم الجمبري كميات على قدي وبكده مش بافقد جمبري كتير بعد ما اخلص رحلتي والربع كيلو ممكن اصطاد بيه اكتر من مرة

وعلى فكرة السمك كان بيدخل على الطعم كويس

البلنص و القزاز (deep water shrimp)

من الانواع اللى بتعيش فى الاعماق دول طبعا للأكل لان اسعارهم بقيت غاليه جدا .. وكمان الفائده الغذائيه ليهم لاتعد ولاتحصى..

كل 100 جرام بتحتوى على 19 جرام بروتين بالاضافه الى الفسفور اللى الجمبرى غنى جدا بيه .

من اهم الاسماك اللي بتاكل على الجمبري

• دنيس
  
• شراغيش
  
• جلانفيش
  
• زنجاريا
  
• شعور
  
• ميرمار
  
• كحلة
  
• شخرم
  
• حفاره
  
• نقط
  
• سبارس
  
• دريني
  
• حريد
  
• مياس
  
• قاروس
  
• الميرا ..
  
• استكامتشا

مسميات الجمبري في بورسعيد

مسميات الجمبري تختلف من بلد الى بلد ومن شاطىء الى شاطىء فإن ما يصلح من طعم فى البحر الاحمر لا يصلح فى سواحل البحر الابيض (الاسكندريه …بورسعيد … رشيد ….دمياط …. البردويل)

القزاز

وبتجربتى الخاصه يصلح لسمكة اللوت كبيرة الحج (اللاج) وما دونها

العقر

نحن فى بورسعيد نسميه (المحشف) ولا تقبل عليه الاسماك الا فى ايام عدم وجود بديل

النطاط

انواعه متعدده وافضلها جمبرى الدهره الابيض وهو ما يتهافت عليه الصيادون المحترفون والهواه على حد سواء ….

البرغوت

أو (ابو سبعه) وهو اصغر حجما وهو مطلوب فى مواسم كثيره ولانواع سمك اكثر …

وهناك نوع من الجمبرى انتشر فى الاونة الاخيره تم استجلابه من الصين وتربيته فى مزارع لا تتهافت عليه معظم الاسماك بسبب طول الحربه الموجودة فى اعلى الراس وهذا عن تجربتى الخاصه والله اعلى واعلم

• اقرأ : كل شئ عن جمبري (الشيكال)

وأخيراً نختتم حوارنا عن الجمبري ..بالحديث عن الجمبري الحي

الجمبري الحى لا يتم شرائه ولكن يتم صيده ثم يوضع فى مكان مخصص او اى جردل فى المركب وتوضعه فيه ماء وطبعا يكون معاك مووتور بالبطاريه او الحجاره بتاع احواض سمك الزينه علشان الجمبري يفضل حي اطول فتره ممكنه

طريقة ” تصبير ” الجمبرى الحى لعدة ايام

ضع ربع الأيس بوكس ثلج ثم ضع عدد 2 قطع كرتونة مساوية لحجم الايس بوكس فوق الثلج ثم احضر شوال خيش مبتل بلماء ومطبق على مرتين وضع الجمبرى الحى وغطى بشوال وكثيرا من الصيادين نصحو بها بعد التجربة.

واحب اضيف طريقه اخرى للحفاظ على الجمبرى حى و هى سهلة جدا و على طول باعملها و نتائجها معى كانت ممتازة

تجيب حضرتك صندوق فوم ابيض او ممكن فى ايس بوكس قديم و بتحط الجمبرى الصاحى فيه و تملاه ميه مالحة من البحر وبتجيب موتور سمك من النوع اللى بيشتغل بالبطاريات و تثبته خارج الأيس بوكس و الصندوق الفوم و بتوصل الخرطوم للميه مع ربط تقل فى الخرطوم لأنه بلاستيك عشان مايطفوش و يقل كمية الأكسجين التى تضخ الى الماء .

لو كمية لجمبرى اكتر من كيلو هتحتاج الى موتور اضافى لايجاد كمية الأكسجين كافية للكمية الأضافية و بالطريقة دى هايعيش معاك لفترة طويلة لحد ما توصل مكان الصيد.

لما بتوصل مكان الصيد بتكون مجهز بستله بلاستيك كبيرة و مخرمة اخرام كتيرة و صغيرة ( التخريم ممكن بشنيور او مسمار سخن) و بتثبت فيها منخل حجر كبير و تقيل و بتربط فيها حبل من النوع المتين جدا.

بتفضى الميه من الأيس بوكس و قبل ما تحط الجمبرى فى العياشة البلاستيك رش عليه ميه مالحة من المنطقة الجديدة اللى هتصطاد فيها لأن الجمبرى خلال زمن الرحلة و قلة الضوء داخل التلاجة بيحصل له نوع من الخمول

ولو صدمته مرة واحدة بميه درجة حرارتها مختلفة عن اللى كان قاعد فيها بيموت كمية كبيرة منه نتيجة هذه الصدمة و بتكرر الموضوع ده كام مرة لحد ماتلاقى الجمبرى بيتنطط تبتدى تحطه فى العياشة و تقفل عليه و تنزله الميه

• هام جدا

التأمين على العياشة بربطها بحبل متين فى مكان جيد عشان البحر مايخدهاش و احضر معاك جردل صغير و طلع من الجمبرى كميات صغيره على قد الصيد و حاول تغييرله الميه كل نص ساعه عشان مايموتش من قلة الأكسجين او سخونة المياه

لما تشترى جمبرى حى و عاوز تصبره لحد ما يحين وقت الصيد سواء بعد يوم او يومين كنت تضع الجمبرى فى المياه المالحة وتلاقى بعد فترة ان المياه أصبحت قذرة ومحتاجة للتغيير والا الجمبرى هايموت

فأحسن طريقة تشترى القواقع بتاعة حوض السمك من عند بتوع السمك وتغسلها كويس وبعدين تحطها فى الجردل ويفضل ان يكون الجردل لونه غامق لأن الجمبرى ما بيحبش الإضائة وسوف تدهش كيف ان المياه اصبحت صافية ومافيهاش عكارة والجمبرى مستخبى فى القواقع

هذه الطريقة نحتفظ بالجمبرى لمدة اسبوعين.

ضع مكنة هواء بتاعة سمك زينة, و الجمبري حينزل المية بيتحرك بنشاط

الشطنـاره

لمن لا يعرف ماهى الشطنارة …
هو نوع من الجمبرى بطول اصبع اليد (السبابه)تقريبا حاجه كده تجيب التايهة يا فندم
🙂 وهو يأتى من كفر الشيخ وغالبا من البرلس ..يتم نقله حى يرزق لنوعية عالية جدا من الصيد والصيادين ….

واثناء رحلة النقل بالطبع تموت كميات وتباع على انها طعم طازج ايضا ولكنه ميت …

اما الشطنارة الحية فيمكنك نقلها الى الاسكندرية ..ومن هناك بقى نروح نعمل 70 كيلو داخل اسكندرية من المعدية…..ومعانا جرادل ومواتير زى بتاعة احواض السمك وفيها ميه مالحة لنقل الشطنارة حيه ترزق …وجرى على مارينا … فى مكان (محطة الصيد السرى طبعا)

بالنسبة للمحافظه على كمية من الشطنارة ….منزليا بكميات من حوالى 300 واحدة ( اصله زى المجوهرات بالنسبة للصيادين )

هناك انواع من المواتير تعمل بالكهرباء للمنزل ….
اثناء الصيد للمحافظة على الشطنارة حيه الموتور بالبطارية …ويجب تغير المياه كل حوالى 12 ساعة …

الشطنارة بتيجى لونها يميل للرصاصى ومع تغير المياه سبحان الله يتنض نفسها ويتحول الجمبرى للون الابيض ويطرد كل رواسب البرلس الطينية فى المياه ….

السعر زمااااااااااااان فكانت تباع الواحده بـ50 قرش واحيانا اخرى بـ25 قرش واحيانا ثالثة بنجيبه بالجملة كل 100 ب20 جنيه بس محدش يقولى ابقى هاتى لنا 😛

وعلى فكره الدنيس بيشوف الشطناره الحيه يقوم هاجم هجوم مذهل والاحجام مش اقل من 2 كيلو ( عن تجربه ) وهو افضل طعم لصيد القاروص ويدكك من ذيله في السن مع مرعاه كسر الشوكه الاماميه كي لا يدافع عن نفسه ضد هجوم أي سمكه

الشطناره معروف أنها نوع من أنواع جراد البحر .. ممتازه جداً في الصيد وخصوصاً صيد القاروص والدنيس المتصلح ..وياسلام لما تكون حيه وبتلعب .. وبالنسبه لكيفية الصيد بيها بيكون كالأتي ..

• السلاح 6 كفته
  
• الشعر الأساسى 35
  
• الترميل 25 درعات طويله
  

ولو معاك مكنه ممكن تعمل سبحه تسقيط يعني رصاصه تحط تحتها سلاح و فوقها سلاحين علشان السمك العايم و اللي على الارض

• ودى كانت قصة اجدع طعم حى فيكى يا مصر قبل الصيد بالبرغوت والنطاط