فن صيد الدنيس بالتفصيل

هنتكلم اليوم عن ( الدنيس ) معشوق الصيادين … هنتكلم عن سمكه من أفضل أسماك المتوسط وملاذ كل صياد وممكن نسافرلها بلاد بس نعرف هي وصلت بس

الدنيس سمكه ممتعه صيد وأكل حاجه كده لوز اللوز والله

كفايه قعدتك في سهره وحاطط البوصه ومستني ضربته القويه حاجه ممتعه فعلا …
الدنيس سمكه سارحه وبتمشي غالبا في قطايع كبيره مجموعات يعني ممكن 5 سوا 30 سو 3 سوا وهكذا …
ولو ربنا كرمك ودخل بقلب ياكل يبقي هتعمل الضربه القاضيه معاه وترزق من الله أحلي رزق …

موسم الدنيس

عن نفسي ببدأ أجس عليه فالأرض من أواخر شهر 9 لكن أفضل ميعاد ليه من أول أسبوع من شهر 10 الي آخر شهر 2 وممكن يطول معاك لبعد كده كمان

وعايز اضيف لكم معلومه ( بسبب تغيير المناخ الي كلنا ملاحظينه في مصر مواسم السمك حصل فيها إختلاف كتير نسبيا بدليل ان الدنيس الفتره دي ظاهر من اواخر شهر 8 وممتد معانا حتي الآن وداخل بكميات كبيره ماشاء الله ولكنه صغير بس وسطه احجام محترمه فوق ال نصف كيلو )

الدنيس سمك بتمووووووت فالقشريات والصدفيات وبتعتمد علي قوة فكها في تكسير الصدفيات خصوصا …

وأفضل الطعوم للدنيس بالترتيب

• 1 . الجرايات البندقه
• 2 . التكني ( الكابوريا الصخريه الغامقه )
• 3 . الخلخل
• 4 . الجلاجولا
• 5 . البلح الأبيض الصخري
• 6 . الاسمعلاوي
• 7 . القراص
• 8 . دود الرمله
• 9 . دود النار
• 10 . النطاط ( في بعض الأماكن )
• 11 . الشطناره ( في بعض الأماكن )
• 12 . السردينلا ( في بعض الأماكن )
• 13 . العقر ( في بعض الأماكن )
• 14 . المصارين ( في بعض الأماكن )

قرمة الدنيس بتتكون شديده نوعا ما يعني

شعر قايم 40
شعر ترميل 30 او 25 حسب خبرتك وحسب شغلك بالليل ولا الصبح ولو صباحا هتقلل من شعر الترميل تخليه 20 او 25 كاحد أقصي ويفضل في صيد الدنيس عمل قرمه سلاح واحد او سلاحين واحد تحت الرصاصه وواحد فوق الرصاصه او سلاحين تحت الرصاصه مختلفين الاطوال طبعا

أفضل مقاس الأسلحة للدنيس

• 3
• 4
• 5

بكرش طبعا سلكه محمله سلاح محمل وطبعا حسب حجم السمك المتوقع
الرصاصه حسب طبيعة المكان طبعا
الساق بالسلاح بيكون طوييييل لا يقل عن 80 سم الي متر ونص وده للسبب الآتي ..

أفضل أماكن صيد الدنيس

زي ما قولنا وزي مامعروف ان الدنيس سمكه بتحب القشريات والصدفيات

وافضل أماكن يتواجد فيها الدنيس هيه الأراضي الحصو يعني الي أرضها متخلطه بالصخور الصغيره جدا والرمال وبقايا القشريات المأكوله والمتكسره او الاراضي الي فيها وعر صغير متفرق وسط الرمال والاماكن الي بقرب مصبات المياه المالحه علي الحلوه زي رشيد والكيلو 21 لان الأرض هناك بتكون غنيه بالصدفيات نظرا لاختلاط طمي المياه الحلوه مع رمال البحر مشكله بيئه مناسبه ليعيش فيها الجلاجولا والجندوفلي وأم الخلول … الصدفيات الي بيعشقها الدنيس وكمان يعيش في الميه البحر الراكده نسبيا زي بحيرات مارينا بالساحل الشمالي

الدنيس سمكه قلوقه جدا وأي حاجه تعكر مزاجها أو تخوفها في قرمتك بتسيبها وتمشي ومش بترجعلها تاني وده بيحصل معاك كتير أثناء الصيد

وبتحب تاكل براحتها أوي وتكسر وتقطع وتستطعم وكأننا فاضين لها ( ياستي ماتبلعي زي بقية خلق الله بقي) 😃
عشان كده بنعمل ساق طويييل عشان تاكل وتعضعض وتكسر وتاخد راحتها وتتحرك بالطُعم بدون ماتشعر ان الطُعم مربوط في حاجه او مشدود من شئ ووقتها بتاخد راحتها خالص وتبلع السلاح 😊

طريقة أكل الدنيس للطعم

الدنيس له كذا طريقة في ضربة البوصه بجد سمكايه تحيرك
( طبعا أهم حاجه في صيد الدنيس خصوصا ليلا أنك ماتحربش علي الشعر وسيبله متر بوش فالشعر عشان تاكل براحتها بدون ماتحس ان فيه حاجه ماسكه الطُعم )

1 . السهل الممتنع بطريقة الطفاسه …. هتخطف الطعم وتجري وتعلق نفسها وكأنها لقة كنز علي بابا اكلته وجررررري ووقتها هتبقي صيده سهله ليك ولو كبيره ماتنساش تسااااايس

2 . هتديك ضربه واحده فالبوصه …. هتنتظر الضربه التانيه …. مفيش …. مفيش ربع ساعه مفيش هتزقه وتلم هتلاقي الطعم مقطوم واتهبش وباي باي

3 . هتضرب ضربه واحده برضه وتناملها 10 دقايق او ربع ساعه حسب صبرك لان صيد الدنيس ليلا محتاج صبر جدا …. هتزهق وتلم هتلاقي الي بيشدك 😉

وقتها هي ضربت الطعم وشفطته كله وبلعت وندغت وحست انها بالعه حاجه غريبه مع الأكل ( السلاح طبعا ) وهتفضل ساكنه كانها قاعده تفكر ازاي أخلص من الي انا فيه وهتحاول كتير بس دون جدوي غالبا …. شايف واحد بيسأل هناك اه معاك وقاري السؤال في عينك

هتقولي مه لما تحاول تخلص من السلاح مه اكيد هاحس فالبوصه بضربتها ومحاولاتها هقولك ….. لا طبعا لأن وقتها ( اسرح معايا في دي ) انت حاطط متر او متر ونص ساااااق مخليها واقفه تتشقلب براحتها فالمتر ده بدون ما تحسسك بيها لان هيه حسستك خلاص في أول ضربه خالص 😊😉

وقتها هايكون رزقك ونصيبك ملكش سبب فيه لانك وصلت لمرحله انك زهقت من الانتظار وقررت تلم تطمن علي طعمك ( وحصلت معانا كتيييييييير )

4 . في صيد الصدفيات زي الجرايات والتكني والبلح الأبيض والجلاجولا ( الطعوم بتاعة التقايل ) لما تضرب اوعي تلم من أول ضربه لان الطعوم دي بتحتاج انها تتكسر وتتفرتك لحد ما توصل السمكه مرحلة البلع يبقي مع 3 ضربه او 4 ضربه لم البوش ووطي وش البوصه وسمي الله ورد رده جامده وربنا يرزقك وبعد ما ترد سااااايس بلاش شغل عتاله😃

في صيد الدنيس خصوصا ليلا فالترقيد

انا عن نفسي مش بحب ابدا اعمل دوشه فالبوصه والشعر بحس اني بنبهها ان فيه كمين منصوب وطبعا بكون مثبت البوصه مش بتكون علي أيدي نظرا لطول وقت الأنتظار ووقت ما بقرر امسك البوصه بكون مستني ضربه تانيه وبعدها فورا برد فالسمكه ولما بمسك البوصه بكون هادي جدا وبرفعها براحه بدون ما أحرك الشعر الواصل فالميه أي حركه مفاجأه احسس السمكه بأي شئ فالكمين المنصوبلها ده ………. هدؤ تام

 ملحوظه

( الدنيس سمكه متحركه معروف عنها السعي الكتير يعني لو قاعد عليه وأكل معاك ومنع ساعه ساعتين ماتمشيش هوه بياخد لفه وراجعلك تاني إلا لو الموضوع طول زياده عن اللزوم يبقي سرح بعيد عنك خالص وقتها قرر تغير مكانك )