تلبيه لرغبة بعض الأصدقاء عن طرق صيد الحنشان!!
يعني الـ3فااااازززز يعني الڤولت العالي يعني كوارع البحر 💪💪😂
وبما أن موسم صيد الحنشان من الشهر القادم بإذن الله اليكم بعض المعلومات المجمعه عنه وعن صيده
( ثعبان السمك/ السمك الثعبان / الحنشان)
وهو من السمك المفترس ويأكل الديدان و الكائنات الحية والقاعية والاسماك الصغيرة يعني ممكن تجيبه بالشرايه
موسم صيد ثعبان السمك
يظهر ثعبان السمك في الشتاء وممكن يغلط في الصيف
لكن موسم الحنشان من اخر شهر 11 الى شهر 3
ويفضل صيده ليلا في الأيام شديدة البرودة يعني في النوات
ويفضل فى الليالى الغير مقمرة والتى بيكون فيها الظلام دامس
ويا سلام لو فيها امطار يبقى جو عسل وهيهدخل عليك بشراهه
العده المستخدمة لصيد الحنشان
- الماكينة عليها شعر او خيط 40 والرمال 35
- الوش قصير يعني 30 او 25 سم
- السن المستخدم 7 او 6 او 5
طريقة صيد الحنشان
الشغل حداف و غماز
ولكن يفضل الحداف لانه بيسف من على الأرض
ولو شغال غماز اكسر الغماز يعني خلي الرصاصه على الأرض ومتمشيش الغماز يعني طول الغماز مترين وارمي جوه واسحب عليك بحيث يكون الرصاص والوش في الغويط والغماز عليك بيدخل عليك اسرع
رصاص الحداف على حسب سرعه المايه
يعني كل مايه وليها وزنها في الرصاص بس نصيحه خليك في ربع المايه اللي قريب من الشط يعني احدف في نص المايه وخلي الرصاص يركن على البر لانه معظم جحر الحنشان بين الشط والربع……..
العود……
عود قوى جبر وماكنه جيدة علشان لوحجمة كبير ممكن يكسر العود لو ضعيف ولو انت اتخاشمت عليه ونصيحه انزله باكتر من عود
اماكن تواجد سمك الثعبان :
دايما بيكون في الأماكن التي بها حجارة
وينتشر في كل انواع المياة
وافضل اماكنة في اماكن بنسميها عروق المياه و fيعرفها الصيادين بس هشرحها على قد ما أقدر لاخواتى المبتدئين:
بتكون عبارة عن المياة فيها جارية ومش حامية اوي بس تلاقي زي عرق او اكتر من المايه (يعني خطوط مياه اسرع من باقي المياه) او بمعني اخر تيار قوي وسط تيارين هادئين
وأفضل حنشان في الطعم في الميات الرمليه يعني أرضها رمله زي ميات جمصه وبلطيم والنوباريه وزايد والنصارى
الطعم المستخدم في صيد الحنشان:
دود الارض البلدي الأسمر ولازم تنعكب (يعني تحط اكثر من طعماية كبار)
والطعم البحاري
وبيدخل على المصران (بس يفضل مصران الحمام علشان زفر جدا)
وبيدخل على الرأى والشرايه بردة علشان زى مقلنا من الاسماك المفترسة المصران كويس..
ولازم نخلى بالنا كويس و احنا بنجمعة علشان سمك عفى وشديد عايز حظر فى التعامل معاة وصيدة صعب وعايز صبر جامد وطبعا ربنا الرزاق بس لية ادوار معينة بيكثر فيها ويستحسن الصيد منها و هى كالاتى:
أماكن صيد ثعبان السمك في مصر
- الرياح التوفيقى
- ترعه الاسماعيليه
- بعض الترع فى القنطرة غربا
- بعض ترع وجه بحري خاصة الترعه النوباريه وفروعها وترعه الناصري والصحراوي خلف مطار البريجات
- بورسعيد اماكن شادر عزام
- صرف 17وترعه الرياح.
- رشيد ومصب النيل
- ترعه الماكس وترعه ال21 بالاسكندرية
- جمصه وبلطيم في الفرعيات ومصارف المزارع السمكيه
تعليق واحد