هكلمكم عن شوية فنيات في صيد الرملة من الساحل هتساعدك تاخد سمك أكتر ان شاء الله لو ربنا كاتبلك وهجاوب على الاسئلة دي:
1- إمتى اعمل سبحة ديقة او سبحة واسعة ؟
2- إمتى اعمل الفردة طويلة أو قصيرة ؟
3- لو الريح عالي أعمل ايه ؟
4- لو القش كتير اعمل ايه ؟
5- لو السمك منع عليا اعمل ايه ؟
6- لو السمك بيصفي اعمل ايه ؟
7- لو القراض دخل اعمل ايه ؟
8- لو شوفت قرص في المياة اعمل ايه ؟
احنا هنتحاسب على العلم اللي عندنا وهل نفعنا بيه الناس ولا لأ فبعد ما تخلص قراية إعمل شير
اولا وقبل ما ابدأ كلام ، صيد الساحل مش سهل زي ما ناس كتير فاكره وسمك الساحل مش أهبل عشان كده فيه فنيات لازم ناخد بالنا منها ، الفنيات دي هيا اللي بتفرق بين صياد طالع يتسلى وياخد سمكتين وخلاص وصياد طالع يصطاد اجدع من اي صياد بياكل عيش على المياة.
1- إمتى اعمل سبحة ضيقة وسبحة واسعة:
البحر ملوش قاعدة يعني ممكن مرماره تيجي على اخر سلاح فوق وجلانفيشه تيجي على اول سلاح تحت ..
عشان كده ساعات وانت بتصطاد تلاقي السمك بيخبط على الاسلحة اللي فوق والاسلحة اللي تحت مش بتتلمس ، ساعتها اوعى تكسل كده انت سبحتك ديقة لازم تعمل سبحة جديدة تخلي ارتفاعها في المياة عالي
السبحة طولها اكتر من 2 متر عشان السمك في اول اليوم خبط على الاسلحة اللي فوق يعني عايم مع الريح العالي
وبتعمل السبحة دي عن طريق انك تخلي المسافه بين مكان ربط كل سلاح والتاني بعيدة بحيث تديلك ارتفاع في المياة.
2- إمتى اعمل فردة السلاح طويلة او قصيرة:
الفردة الطويلة بتنفع لو حسيت ان فيه سمك كبير بيضرب عليك ضربه جامده لكن مش بيبلع او مبيكررهاش او بيضربك ضربة ويسيبك، ده معناه ان السمك خايف من حاجة او حاسس ان الطعم مشدود او الطعماية كبيرة عليه ..
هنا انت لازم تغير لو عامل كل فردة سلاح ضيقة لازم تبدل السبحة بواحدة تانية اسلحتها واسعة وهنا المقصود بواسعة يعني السلاح مربوط في شعراية من 20 ل 30 سم تقريبا عشان تدي للسمكة راحة في الاكل من غير ما تحس ان الطعم مربوط في حاجة.
الفردة القصيرة بتعملها لو لاقيت نفسك مش حاسس بالسمكة بمعنى ان السمك بيضرب وهو واقف مش بيتحرك فمش بيشد الشعر.
3- لو الريح عالي اعمل ايه:
الاول لو الريح خفيف انت بترمي وتخلي الماكينة على ايدك،
لو لاقيت السمك مش بيضربك بتجرجر الرصاصة بالراحة لحد ما تضرب ..
اما لو الريح عالي وجرجرت الرصاصة هتلاقيها بتمشي منك مع الريح والبوش بيتاخد في الموج ومش هتحس بحاجة خالص ..
- يبقى انت تعمل ايه؟
لما الريح يشد وانت بتصطاد القش بيعوم والسمك بيعوم معاه لان ده بيته ومرعاه الاساسي فمعنى كده ان سبحتك لازم تبقى واسعة مش ضيقة اللي هيا قولناها رقم واحد
ثانيا انت لازم تكبر الرصاصة عشان هترمي وترقد وتستنى مش هتجرجر
وعشان ترقد لازم رصاصتك تبقى على الارض بتمشيش فهتحط رصاص حسب الريح والموج بيبدأ من 80 و 100 و 125 او 150 في الميات الكبيرة
وهترمي تلم بوشك بسرعة قبل ما الريح والموج ياخده وتقوم راجع بالبوصة واحدة لورا عشان تطلع الرصاصة من على الارض عشان الرصاص التقيل بيغرس وتلم بوشك تاني بسرعة وتركن الماكينة ..
في الحالة دي هتحتاج طعماية خشنة تستحمل التشويح زي السردينيلا والمصارين المملحة والجندوفلي المملح
وهتحتاج بوصة طويلة من 4.5 لـ 5.20 عشان لما تركن الشعر يبقى عالي عن المياة فالموج مياخدوش ويكون كاست ويت البوصة كبير فيستحمل الوزن ده.
4- لو القش كتير اعمل ايه:
انت قبل ما تفتح البوصة لازم تدور على مكان يكون فيه مساحات فاضية بين القش ترمي فيها
او مكان القش فيه متجمع قريب لكن جوه فاضي فترمي بعد القش او قبله او على يمينه او شماله ولو القش مغطي البحر كله هتبقى مضطر ترمي فوقه
ومتقلقش هيضربك سمك لان القشاية في الساحل هي بيت السمكة ومرعاها اللي شايله الدود والكوكرا
فعشان كده دايما السمك ساكنها وبيرعى عليها لكن في الحالة دي متجرجرش الرصاصة خالص واستخدم الطريقة رقم 3 عشان رصاصاتك متتحركش وتلم القش كله.
5- لو السمك كان بياكل عليك ومنع تعمل ايه:
اول حاجة بفكر فيها لما السمك يمنع اني اغيرله الطعم
لان ساعات السمكة تزهق من طعماية بس طعماية تانية تغريها فارمي رميتين بطعم جديد لو فضل ممنع يبقى السمكة اتحركت من قدامك ،
وعشان سمك الساحل سمك جوال يعني بيقعد يلف مش بيثبت في مكان الا لو كان المكان قريب من قشاية
ففي حالة ان المياة فيها تيار والقش بيتحرك يمين او شمال اتحرك معاه انت كمان يمين او شمال
ولو المكان مفيهوش قش خالص والسمك منع اتمشى وارمي لحد ما تلاقيه ويضربك تاني وهكذا.
6- لو السمك بيصفى الطعم اعمل ايه:
هنا تفرق لو كان المكان فيه سمك كبير ولاقيت سمك صغير بيصفي يبقى انت محتاج طعم خشن مش اكتر
وتجرب تغير لو بترمي قريب ترمي جوه والعكس صحيح لحد ما تلاقي مكان فيه السمكة الكبيرة اللي مش هتدي فرصة لسمكة صغيرة تاكل معاها.
اما لو لاقيت السمك بيطلع معاك وانت مش حاسس بيه فده هيكون بسبب حاجة من اتنين:
يا إما بوصتك قصيرة واسلحتك على الأرض والسمكة بالعة ونايمة يبقى انت هتغير البوصة لبوصة أطول وتشتغل بنفس السبحة بتاعتك الفرق الوحيد ان ساعتها هتبقى السبحة واقفة لفوق مع البوصة الطويلة فهتحس بضربة السمكة.
يا إما انت موسع فرد الأسلحة بزيادة والسمك بياكل ويدفن دماغه في الرملة فمتحسش بيه، ساعتها هتحتاج تديق الأسلحة شوية.
7- لو القراض دخل اعمل ايه:
القراض لو دخل عليك انسى موضوع انك تركن الماكينة ده خالص عشان هيدخل يقطع الأسلحة بتاعتك كلها ولو علقت سمكة هياخدها منك،
- البوصة على ايدك وبتطلع بعد اول ضربة عشان حتى لو معاك قراض مبيلعش ويقص.
- القراض بيدخل السمك بيمشي من مكانه فانت مش هتسيب الرصاصة واقفة انت بترمي جوه وبتجرجر وتقف تجرجر وتقف لحد ما تضرب.
- دي اهم نقطة لو لاقيت القراض فاشخ المياة كلها ارمي في القش عشان هتلاقي السمك كله هربان عليه
8- لو لاقيت قرص وسمك بينط في المياة:
قدامك حل من اتنين ..
الحل الأول
ان يبقى معاك lure وتقف تشتغل سبينينج من على الرملة وهنا هتفرق لو القرص على وش المياة هتحط لور فلوتنيج بيعوم ولو الخيالات اللي شوفتها غرقانه هتحط حاجة sinking غرقانه او suspending يعني بين المياتين.
الحل التاني
انك تكون معيش سمكتين صاحيين تشك سمكة منهم بفردة واحدة على سلاح كبير محمل وسلكته مش تخينه عشان ميموتش السمكة وترمي وتسيبها وكل شوية تجرجرها جرجرة خفيفة.
او لو معاكش جردل معيش فيه يبقى هتطلع اخر سمكة طلعتها يعني لسه فيها الروح وتشكها وترميها وتفضل تجرجر فيها (تحركها) لحد ما تتمسك منك.
