ما هي طريقة الصيد بالحداف في النيل

للصيد بالحداف فى النيل عليك بالاتى :

أولا

طبعا مش هتركب غماز ،،، وأول حاجة تحطها فى الخيط هى رصاصة حجم 4 لو المية هادية أو رصاصة حجم 5 لو المية جارية وعلى فكرة الرصاصة بيبقى مكتوب عليها الرقم وبعدين تحط المدور وبعدين السن ،،،،،

ثانيا

الرصاصه بتكون علي خيط العود مش الرمال يعني بتكون قبل الخيه اللي بيتربط فيها خيط الرمال

ولما حضرتك بتحدف بتبقى الرصاصة راسية على القاع والسنون بتبقى عايمة فوقيها حسب طول الرمال حوالى 10 أو 15 سم ،

ثالثا

لما تيجي ترمي الحداف تكون في مكان إنت عارفه أو حد موجود فيه يقولك ترمي فين لإن في أماكن بتكون تحتها حوشه أو زلفه و الحاجات دي بمعني أدق هي أعشاب بتكون تحت الميه مجرد ما هترمي فيها هتشبك منك و هيكون صعب تخليصها و ساعات تقطع منك الوش أو الخيط الأساسي و هتروح منك الرصاصه

رابعا

دايما بنخلي الخيط علي العود مقاس 40 أو 50 و الوش 35 أو أقل علشان الوش هو اللي يقطع بدل الخيط الأساسي و مش مهم الوش بقي

خامسا

بالنسبة للاحساس بالسمكة بيبقى عن طريق اللبلوب وممكن تحط جرس على طرف اللبلوب وهو هينبهك لما يكون فى سمكة فى السن من غير حتى ما تكون ماسك العود .