موسوعه صيد الكاليمارى و السبيط || كل ما يهمك عن صيد الكاليمارى

هنتكلم النهارده عن كل ما يهمك عن صيد الكاليمارى ولو تسمحولى هتكلم معاكم بصيغة الحوار عشان نفهم بعض.

مبدأيا الكاليمارى مش محتاج صياد ذو خبره لأنه من أسهل طرق الصيد ولكن هناك بعض النقاط التى يجب مراعتها وهنشرحها بالتفصيل بأذن الله.

يبدأ موسم صيد الكاليمارى بداية من شهر 10 وحتى شهر 3 وبيكتر من نهاية شهر 111 وحتى نهاية شهر 2 وده طبعا راجع لأنخفاض درجة حرارة المياه وهو مايفضله الكاليمارى وبيكون متواجد فى الأماكن اللى متوفر فيها كشافات النور بحثا عن طعمه المفضل البساريا والسردين .

الكاليمارى بيحب البحر العدل ولازم تكون المياه كاشفه يعنى صافيه وبيكون متواجد فى الأماكن اللى بيكون فيها فرشة وعر وفرشة وعر يعنى صخور طبيعيه موجودة اسفل القاع زى الصخور اللى بتكون موجوده اسفل كوبرى ستانلى وبنشوفها واحنا واقفين والضوء بتاع الكشافات بيساعدنا على رؤيتها واحسن وقت لصيده من يوم 10 حتى 17 فى الشهر العربى وده الوقت اللى بيكون ضوء القمر كامل وبيساعد على رؤية الكالميارى للباره مع توفر باقى الشروط اللى قولناها ..

• بس فى ملحوظه صغيرة

صور الكاليمارى اللى موجوده فى البوست انا واخدها من بحر مشخشخ ((عالي نسبيا)) وبردوه مع توافر الشروط السابق ذكرها (( فرشة الوعر – المياه كاشفه – وجود اضاءة مناسبه)) يعنى من الآخر مش لازم بحر عدل اوى زى ما بنقول .
طريقة التزفير على الكاليمارى

ممكن نزفر على الكاليمارى عن طريق شراء علبة تونة مفتته او علبه سلمون من أرخص الأنواع ونخرمها من فوق بمسمار من 3 لـ 5 أخرام ونجيب شراب قديم ونحط جواه طوبة وفوقيها علبة التونه او السلمون ونربط الشراب من فوق ونطوحه على اد ما نقدر ولازمة الطوبة عشان نضمن ان علبة الزفر نزلت على على قاعدتها مش وشها .

اماكن صيد الكاليماري

((المنتزه – المحروسه – لسان 266 يوليو – سان استيفانو – جليم – حوض نادى المهندسين – كوبرى ستانلى – لسان سيدى جابر الجديد – كيلوباترا بعد النفق – سبورتنج – القلعه – الساحل الشمالى))

المعدات المطلوبة لصيد الكاليماري

• كشاف رأس
• مدور بمشبك لسهولة تغير اللبارات
• بوصة ماكنه 3.60 متر او 4.200 متر
• ماكنه صغيرة وماتملاش الشعر لحد الآخر عشان وانتا بترمى الشعر مايتكعبلش منك والماكنه صغير عشان تخف الحمل على ايدك.
  

الطعم واسمه لباره كما هو موضح بالصورة.

فى منها قماش ودى لازم نحط على الخط اللى موجود فى أسفلها لزق أمير وعلي الرصاص والعين مع مراعاة عدم وضع اصبعك عليها الا بعد ماتنشف عشان ماتبصمش ولازمة الامير عشان مع الأستخدام ماتتقطعش. وفى منها عضم كما هو ايضا موضح بالصوره.

الألوان اللى علم عليها السنه دى الأحمر والبرتقالى والأخضر والأزرق لكن بردوه مايمنعش انك تنوع فى الألوان.

بالنسبه للمقاس حضرتك هتجيب مقاس 3 و 3.5 و 4 و 4.55 واختيارك للمقاس اثناء الصيد راجع لحالة البحر يعنى لو البحر عدل ومافيش ريح يبقى حضرتك هترمى باللباره الـ 3 او 3.5 اما لو البحر عالى نسبيا والريح شادد شوية يبقى الـ 3 او 3.5 مش هتعرف تحدف بيهم لأبعد مسافه وفى الحاله ديه بنركب اللبارة الـ 4 او 4.5.

طريقة صيد الكاليماري

حضرتك هتركب اللباره فى مشبك المدور وهتنورها عن طريق انك تحطها على كشاف الرأس لمده 10 ثوانى ومهم جداااااااا انك تكون ظابط الدراج بتاع الماكنه يعنى تفتح النجمه شوية عشان لما يضرب عليك كاليمارى كبير ماتشلحش منك

وهتبدأ وتقول بسم الله وهترمى اللباره هتسيبها 3 او 4 ثوانى وبعدين تبدأ باللم وتكون سرعتك بطيئة جدا وتحرك البوصه مره يمين ومره شمال وترفع البوصه لفوق يعنى تنطط اللباره ومره تثبت ايدك وتلم عادى كل ده عشان لازم انك تحسس الكاليمارى ان اللباره سمكه حقيقيه وليس كمين او فخ هيقع فيه .

اول ما تضرب عليك ارفع وش البوصه لفوق عشان تعومها وماتديهاش فرصه انها تبخ الحبر فى الميه وطبعا لو حصل هيخلي باقى السرب يمشى لأن الكاليمارى بيمشى فى أسراب واكبرهم حجما هو اللى بيكون قائد السرب .

طيب فى حالة انها ضربة عليك وسابتك ماتلمش سيب اللباره ثوانى فى الميه وابدأ بعد كده فى اللم وبراحه جدا وانتا بتلم وان شاء الله هتمسكك تانى ولما تضرب عليك ومعاك زميل بجوارك قوله يرمى جنبك وان شاء الله هو كمان هيتمسك لأن زى ماقولتلك ان الكاليمارى بيمشى فى اسراب .

• واخيرا وده جزء مكتسب من خبرتى
  

لو وعرت منك اللباره وقف لم عالطول وماتكملش لم عشان الوعر مايتملكش من السلاح كله وارفع البوصه لفوق مع شدها حاجه بسيطه فى اتجاهك وان شاء الله هتطلع معاك بكل سهوله .