اقرأ : تأثير صوت موتور مركب الجر علي السمك المستهدف

أجابات نموذجيه بس خلي بالك ( ده مش مقياس )

هل كل زودياك محتاج ترخيص ؟

• الاجابة

طالما بدون موتور مش محتاج ترخيص فى انواع من الزودياك لها تكنة بالخلف ( مكان تركيب الموتور ) يبقي لازم تصريح ويقولك ركب موتور طيب

عايز انزل من غير تصريح للزودياك؟!!

يبقي تشتري زودياك من غير تكنة في الخلف وهذا النوع بيكون مقدمته مثل خلفيته يعني مدبب ( بوذ) يعني وهذا الزودياك يعمل بالمجاديف وممكن ينزل بيه عادى ومعاه بروسي علي اده يرميه ويثبته للصيد –

وعند اقرب شعبه او مكان كويس يقف ويرمي ويلمه لما يجي يمشي بس ممكن يضطر يستني المد علشان يرجع اسرع للشط

سؤال 1

حجم الزودياك وعدد الافراد اللى كانوا فيه 3

• الاجابة

 حجم الزودياك 270سم و موتور 2 حصان ياماها عدد الافراد 3

سؤال 2

هل كنتم مستريحين فى القعده ولا لا ؟

• الاجابة

مستريحين في القعده بسبب التعاون

سؤال 3

هل كنتم محتاجين fishfinder ولا بتجربوا كل شويه طرحه وتغيروا بسرعه؟

• الاجابة

جربنا الحالتين بس بـ fishfinder كان احسن كتير جدا

سؤال 4

طريقه الصيد على الزودياك بحداف ولا بوصه تسقيط احسن؟

• الاجابة

بوصه صب صغيره 120سم احسن لأن بسبب ضيق المكان خيط الحداف هيتكعبل منك

سؤال 5

الثبات اثناء الصيد مريح ولا لا؟

• الاجابة

بالنسبه للثبات اثناء الصيد حسب الجو يعني لو مفيش موج بيبقي ممتاز و لو فيه موج متوسط بيبقي عادي بس طرطشه ميه خفيفه بتيجي عليك و لو البحر عالي يبقي تلم الهلب بسرعه و علي بره عدل

سؤال 6

سرعه الوصول للمكان المنشود قد ايه يعنى مثلا نص ساعه ساعه

• الاجابة

سرعه الوصول حسب منطقه الصيد بالنسبه لي من منطقه قبل السادات بـ4كيلو من نحيه العين السخنه

ممكن نوصل في 30 الي 45 دقيقه

في منطقه قبل بورتو السخنه ب 10 كيلو ممكن نوصل من الشط في 5 الي 15 دقايق

سؤال 7

هل مرة غامرت ونزلت مسافه كبيرة فى البحر ؟

• الاجابة

حصل مره واحده في عيد الاضحي الي فات كان البحر مغري و صافي جدا

سؤال 8

لو حد يعرف نوع كويس من الزودياك جديد يعنى

• الاجابة

اعتقد ماركه wave كويسه

سؤال 9

الموج عالى يعنى كام عقده مثلا اللى تخلينى اطلع من الميه

• الاجابة

دي حاجه تقديريه و بتختلف حسب حجم الزودياك و قدره الموتور و المسافه الي بينك و بين الشط او اقرب كنه

يعني الموضوع ده مع الممارسه هتبقي عندك الخبره الي تقدر تخليك تحدد امتي تطلع و امتي تستمر في الصيد

سؤال 10

هل اشترى على الزودياك موتور صغير ياماها 5 او 6 حصان ولا صينى 15 حصان بارسون واخبار صيانه الياماها والصينى ايه يعنى سهله ولا لا وحدود التكلفه

• الاجابة

انا بفضل المواتير الصغيره عشان الشيل تبقي خفيفه و افضل الياماها لأن موتور بارسون نفس الياماها بس اكيد خامات التصنيع مختلفه

مثلا لو عندك موتور ياماها و بتعمله صيانه و ركبت قطعه غيار صيني مش اصليه اكيد مش هتبقي متطمن من الموتور و انت في عرض البحر

طيب هتطمن ازاي وانت معاك موتور صيني كل حته فيه تقليد

و بالنسبه لصيانه الياماها سهله في اي حته بس المهم يكون الميكانيكي كويس و التكلفه بتختلف من مكان لمكان

يعني احسن مكان بعمل فيه صيانه بلد اسمها المطريه ناحيه المنزله فيها ناس ممتازه فوق الخيال و اسعار يا بلاش سواء مصنعيات او قطع غيار او مواتير

و في ناس في السويس بس اشتغاله اشتغاله

The post الصيد بالزودياك .. سؤال و جواب appeared first on ملوك الصيد.

Loading...

Taking too long?

Reload document

| Open in new tab

تحميل الكتيب [2.52 MB]

The post كتيب || تعليم صيد الأسماك appeared first on ملوك الصيد.

هتصرف فى حدود 1800 جم .. أولا تتصل بمعهد تدريب الموانئ باب 27 الجمرك فى القبارى الاسكندريه يعنى فى المنطقه الجمركيه تبع الاكاديميه العربيه للعلوم والتكنولوجيا وارقامهم :

• 03/4833144
• 03/4843859

وتعرف ميعاد الدورة وهيه كل شهر مرة 3 ايام .

تروح فى اول يوم وتدفع 1500 جم بس وتحضر 3 ايام.

بعد 21 يوم بتاخد من عندهم شهاده باتمام الدورة الثلاثه ايام .

وبتحضر الاتى :

1 – فيش وتشبيه باسم الهيئه المصريه لسلامه الملاحه البحريه ( وده للرخصه المهنى فقط ) .

2 – كشف طبى باطنه ونظر مختوم بختم النسر من مستشفى حكومى

3 – صورة شخصيه

4 – صورة شهاده الميلاد

5 – صورة شهاده التجنيد

6 – صورة شهاده الدورة تعليم قياده العائمه

7 – جواب من التامينات( للرخص المهنيه فقط وليست الخاصه)

8 – مبلغ 25 جم

وبعد تجهيز المطلوب تروح على باب 22 تطلع تصريح دخول الميناء فى نص ساعه وبعدين تطلع على باب 1 تدفع الـ25 جم وتطلع الرخصه .

بس المهم تروح بدرى لان التفتيش بيفتح 9 ويقفل تقريبا 12.5 ظهرا

• اقرأ : الصيد بالزودياك .. سؤال و جواب

ثانى خطوة :

1- الزودياك طوله 3.50 متر ومعاة منفاخ قدم واتنين مجداف ووحده تصليح وله ارينا نفخ وارضيه خشب مش الومنيوم بس مدهونه كويس بمواد عازله للماء بالنسبه للسعر تقريبا فى حدود 4200 جم

2- – الموتور ياماها من التوكيل – 9.9 حصان 2 ستروك 2بحوالى 14800 جم أو البارسون 15 حصان 4 ستروك بحوالى بعشرة الاف بس ممكن تعمله زياده فى الترسه بتاعه الزودياك علشان يقلل الطول .

– الموتور لازم يكون معاة افراج جمركى وفاتوره

– الزودياك اذا كان بفاتورة بس مينفعش فى التفتيش البحرى للترخيص لازم شهاده منشا يااما تخلى الشركه المصنعه تعملها يا اما تشتريها

ثالث خطوة (ترخيص الزودياك ) :

1- بتخلص تقريبا فى يومين يوم للتسجيل ويوم للمعاينه بس يكون الورق جاهز وهو

– رخصه القياده الخاصه وصورتها .

– اصل فاتورة الموتور مع الافراج الجمركى .

– الافراج الجمركى للزودياك لو مستورد او شهاده منشا لو محلى او مستعمل .
والمصاريف كالاتى :

• 90 جم مصاريف تسجيل اول مرة
• 30 جم تامين اجبارى لكل فرد على المركبه البحريه
• 50 جم م معاينه
• 50 شهاده طفايه ولو عاوز تشترى الطفايه من عندهم بحوالى 120جم.
• 30 جم عوائد سنويه

وطبعا اعمل حسابك ان فى اكراميه للمهندس بتاع المعاينه وطبعا تضبط معاة علشان يوم المعاينه يعنى

قبل ماتشيل الزودياك والموتور وطبعا لازم يكون فيه لايف جاكت على قد عدد الافراد وارقام تفتيش السويس 062/3191359 , 062/3912275 .

وكمان علشان الزودياك 3.50متر أحيانا المهندس بيتنشن ويخليه 3 افراد بس لانهم بيقولوا فرد لكل متر طول

رابعا خطوة (حرس الحدود)

تجهز صور تسع اوراق فى 3 دوسيهات منفصله :

1- صورة الزودياك فوتوغرافيا وعليه اسم الزودياك اللى انت هاتسميه فى شهاده المنشا .

2- صورة فاتورة الزودياك مع الافراج الجمركى .

3- صورة شهاده منشا الزودياك او الافراج الجمركى بتاعه .

4- صورة رخصه القياده .

5- فيش باسم (مكتب مخابرات حرس الحدود) .

6- صورة البطاقه .

7- 3 اوراق خاصين برخصه الزودياك .

8- عدد اتنين دفتر .

9- استلم الرخصه

10ـ مبروك عليك 🙂

ملحوظه هامه

البوست عمره سنتين يعني الاسعار قد تكون أختلفت بعض الشيئ أو لا .. للعلم فقط

The post خطوات شراء زودياك فى مصر وترخيصه خطوة خطوة appeared first on ملوك الصيد.

أماكن صيد التسقيط في الإسكندرية

اولا :  ابوقير

كان (طبعا زى كل حاجه حلوه ) في الماضي من احسن اماكن الصيد و الأكثر حصيله من كل الأماكن وكانت أبو قير في الشتاء هى جنة الدنيس بالنسبة للصياد

اما اللآن و بسبب تلوث المياه و لأسباب أخري كتير اصبحت الحصيله ضعيفة إلا لو كنت مع بحار متمرس فى أوقات معينه فقط من السنه

مثلا في شهر 11 و 12 تجد الدنيس في ارض الخمسين او الحصوة او الوعرة التي يقابلها من خلف جزيرة نيلسون من ناحية البحر المفتوح

وقد يدخل عليك اسراب الشاخورة البلدي الكبيرة والتي تدخل بكميات هائلة

اما الموسم الثاني فهو تقريبا من اواخر شهر 3 الى اواخر 5 بيكون في الغرق موجود خير كتير زى الشراغيش الرشيدي والكحله و و التيوس بأحجام معقوله

• ملاحظة مهمة :

يجب ثم يجب ان تحضر الجمبري العقر الطازج لكي لا تندم وخاصة مع الدنيس فهو دواء العقر الطازج وخاصة في الأعماق

مع العلم ان الدود ليس له اي قيمة في صيد التسقيط وعن تجربة

الجمبري النطاط او البلانس يستطيع ان يخرج الوقار والعضاض من جحره ويحضره اليك على السنارة على طبق من فضة .

ثانيا : بحري

اعتقد ان بحري لا زالت تحتفظ بخيراتها وخاصة في الوعر او صيد الأثر من شهر 7 الى شهر 11

و يكون الصيد على الأثر وبصراحة هو موسم جيد جدا للشراغيش والحلابيش (صغار الوقار)

• ولكن هل تتحمل الحر ؟؟؟

هنا السؤال المهم لأن الجو يكون صعب جدا جدا في شهر 7 و 8 لذلك انا افضل النزول في شهر 9 الى شهر 4 فا من شهر 10 الى شهر 11 في بحري انا اسميه شهر الغلطات او السمك الذي نحلم به .. عضاضة كبيرة وقارة كبيرة فهو فعلا شهر ممتاز للصيد بالطرق غير التقليدية

بالسمكة الحية تأتي بسمكة حية شرغوش او موزة وتضرب السنار في لحمها بدون ان يلامس عمودها الفقري لتظل حية

وتأتي بخيط مقاس 100 او 80 ورصاصة 10 وتربط خيط السلاح بطول 2 او 3 متر حتى يصل السنار قبل الرصاصة بنصف متر

وتلقي بالسمكة الحية بشرط ان تكون جالس على اخر المركب لكي لا يتعقد خيطك مع من بجوارك فالصيد ادب واحترام

وتتوكل على الله وتسمي بأسم الله .

ثالثا : المكس

الصيد هناك على العايم غزيلة و أفضل أوقاته من نصف شهر 11 الى اواخر 5 والعمق هناك لا يقل عن 60 متر

لذلك الرصاصة او الثقل لا يقل عن 150 جرام ولا يوجد ظل والشمس تكون مباشرة على رأسك طوال الوقت

لذلك لابد أنا يكون لديك كاب للحمايه

لكن السمك هناك بأحجام وفيرة ولكني لا أستطيع ان اتكلم عن ما لم اجربه .

اما فيكون الصيد على الغزيلة او المرجان كما شرحت سابقا ولا تنسوا العقر الطازج وسوف اشرح فيما بعد طريقة تحضيره وتخزينه ليظل طازج وخاصة في الغزيلة.

The post تبسيط صيد التسقيط || صيد التسقيط في الإسكندرية || 2 appeared first on ملوك الصيد.

سمك المرمار أو المالبري Lithognathus mormyrus هو سمك متوفر بكثرة في حوض البحر المتوسط وهو من عائلة أسماك sparidés يعيش في شكل أسراب تجوب الشواطئ الرملية بشكل كبير تبقى مبتعدة عن الشاطئ في موسم الشتاء (عندما تصطاد في الشتاء حاول الرمي لمسافات تفوق الـ 100 متر حتى تحصل على سمك المرمار) لكنها تبدأ في الاقتراب بحلول نهاية شهر فيفري و بداية شهر مارس

تتغذى هذه الأسماك عن طريق البحث في القعر و تقليب الرمال Un Poisson Fouisseur من أجل أن تجد الديدان و القشريات التي تعتبر غذاءها الأساسي

لذلك إذا أردنا صيد هذا النوع من السمك فعلينا بالشواطئ الرملية أو الشواطئ التي يتكون قعرها من مناطق رملية تتخللها بعض الصخور المغمورة التي تعتبر موطنا للقشريات

رغم أن سمك المرمار يعتبر عموما سهل الصيد مقارنة بسمك الدوراد مثلا (Daurade Royal) إلا أن صيده يعتمد على مجموعة من المعطيات و التدابير المهمة التي تصنع الفارق بين النجاح و الفشل فيمكن لصياد أن يصطاد 20 سمكة مرمار و بالقرب منه وعلى بعد خطوات يقف صياد آخر دون أن تتحرك قصبته ولو مرة واحدة

– أهم العوامل التي يجب أن تأخذ بعين الاعتبار / أسماك المرمار تحب ديدان الرمل الصغيرة و لحم المحار و القشريات بصورة خاصة

– أسماك المرمار حساسة جدا لنوع الخيوط و الصنانير المستعملة لذلك 

– خيط ربط الصنارة Le Bas de Ligne لا يجب أن يتعدى حجم الـ (0.30) على أقصى تقدير إذا كانت السماء غائمة و الرؤية سيئة أو إذا كان البحر مضطربا مثلا (الخيط المستعمل لربط الصنانير هو الخيط المخفي من نوع Fluorocarbone)

– فحجم الخيط الشلغومة يختلف من(0.20مم) حتى (0.30) على حساب حاله الطقس والبحر و Fluorocarbone هو أحسن حل خاصة عندما يكون الجو مشمسا و البحر هادئ و درجة الرؤية عالية بسبب صفاء المياه

– طول خيط الصنارة (الخيط دائما هو من نوع الـ Fluorocarbone) يجب أن لا ينزل عن طول الـ 2.5 متر حتى 3 متر لأن هذا الطول يسمح للطعم بالتحرك بشكل أفضل فيبدو و كأنه حي و طبيعي فلا يفزع السمك الحذر مطلقا بالإضافة إلى أن سمك المرمار يأكل بحذر ولا يبتلع الطعم حتى يطمئن بنسبة 100/100

– حجم الصنارة/ لا تستعمل صنارة من الحجم الكبير (مثل الحجم رقم 04) لأن المرمار سمك حذر جدا و قد يلاحظ وجود الصنارة فليبصق الطعم لذلك عليك باستعمال صنارة من حجم الـ 07 أو 08
– لا تستعمل ثقلا Un Plomb كبيرا فحجم الـ 30 غرام إلا 60 غرام تكفي ما عدا في فصل الشتاء قد تضطر للرمي بعيدا للحصول على المرمار فيمكنك استعمال أقفال أكبر

– المونتاج الملائم  Le Montage adéquat

– يعتبر المونتاج الثابت Montage Fixe أحادي الصنارة Mono-Empile الموضوع بالقرب من الثقل Empile Basse (حوالي 20 سم فوق الثقل) من أحسن التراكيب Les Montages (أنظر الصورة في الأسفل)

– لأن هذا المونتاج ذاتي الجر Auto Ferrant يعني أن السمك يعلق مباشرة دون الحاجة للشد على الخيط بسبب ثقل الرصاص الذي يمارس شدا عكسيا ضد قوة جذب السمكة
– هذا المونتاج يساعد على الرمي لمسافات بعيدة خاصة من الشواطئ الرملية لأنه Aérodynamique ولا يقاوم الهواء بشدة

– نصيحة من ذهب

– عندما تقوم بالرمي لا تشد خيط الصنارة 100/100 و اترك الخيط الرئيسي Le Corps de Ligne مرخيا نوعا ما حتى لا يشعر السمك بمقاومة الخيط له عندما يبتلع الطعم بل يشعر أن الطعم حر وطبيعي ولا يشكل أي خطرعليه😇

The post كــيــف أصــطــاد ســمــك الــمــرمــار Le Marbré ؟ appeared first on ملوك الصيد.

بالنسبة للماكينة المناسبة الفايكنج أنا شغال بيها هناك تمام

العود هيختلف على حسب نوعية السمك اللي رامي عليه

• لو هترمي على دنيس هتحتاج عود طويل 5 متر عشان تطوح بيه جوه
  
• لو هترمي على الشراغيش أو الموزة 3.5 متر هيبقى خفيف ومريح معاك
  
• لو مش هتشتري غير عود واحد بس يبقى هات 5 متر هيشتغل معاك في الناحيتين
  

العود الصب بتاع التسقيط مش هينفع لو عايز توسع جوه بالتالي هتستخدم عود شاطيء وده هيشتغل معاك سواء هتسقط بيه تحتك على طول أو هتوسع
وفقاً لميزانية 400 جنيه

مثلاً:

هتشتري عود صيني ماركة دولفين – مادنس تيلي 4.5 متر وهو ممتاز على فكرة

الماكينة الفايكنج هتعمل معاك حوالي 250 جنيه أو 300 لإني مش عارف الأسعار حالياً عاملة ازاي بعد ارتفاع الدولار بس لازم تتأكد إن الفايكنج كوري مش صيني..

• هتعرف ازاي؟

بص على دراع الماكينة اللي بيركب في العود لو لقيت محفور عليه كلمة كوريا يبقى كوري.. لو كلمة كوريا مطبوعة مش محفورة يبقى صيني ( العود هيعمل معاك 100 جنيه تقريباً )

كده احنا ظبطنا عود كويس وماكينة كويسة في حدود ميزانية متوسطة

الشعر اللي هتحطه 35 وعندك انواع كويسة كتير أنا شخصياً بفضل روكا هو شعر كوري
وبالنسبة للأرمة هتحط شعر 20 وأنا شخصياً مؤخراً بقيت احط شعر 15 بس ده محتاج تدريب عليه شوية فانت ممكن تحط 20 أو 25 عادي

نيجي بقى بالنسبة لأماكن الصيد، وبتكون عادة في البحر المفتوح

عندك الوعر اللي على أول كوبري ستانلي والوعر اللي على آخر كوبري ستانلي لو هتصطاد شراغيش

اللي شغال أحسن الفترة دي الوعر اللي ناحية نادي المهندسين مش اللي ناحية سيدي جابر

وسط الكوبري رملة ودي ممكن تشتغل فيها على المرمار لما بيبقى حاضر

أنواع الاسماك المتواجدة حاليا

الشراغيش:

هتقف على الوعر اللي قلتلك عليه.. الشراغيش الكبيرة الفترة اللي فاتت كانت موسعة مش تحت الكوبري.. وساعات بتبقى موجودة تحت الكوبري عادي بس حالياً اللي تحت الكوبري جناشير وموزة.. بالتالي هتقف على حروف الوعر مش الوعر نفسه لإن الوعر حامي قوي هناك وهتخسر رصاص كتير..

ممكن تسأل الصيادين اللي واقفين هناك حروف الوعر فين لو البحر عالي والوعر مش باين لحد ما تاخد خبرة المكان.. هتوسع على قد ما تقدر عشان ترمي بعد الوعر بحاجة بسيطة عشان الوعر.. كمان وانت بتلم سواء معاك سمكة أو لأ هتلم بسرعة قوي وده هيخليك تتفادى الوعر اللي في السكة وانت بتلم.. وسيب شوية بوش ماتخليش الشعر مشدود على الآخر عشان ماتوعرش منك..

هتحط رصاصة 4 عشان تجيب معاك المسافة دي.. ولو الشراغيش الكفافي حاضرة تحت الكوبري هتسقط تحتك على طول برصاصة 1 لو البحر مريح ورصاصة 2 لو مشخشخ ورصاصة 4 أو اكتر لو البحر عالي.. أرمة الشراغيش هناك هتعمل فرعين طوال فوق الرصاصة على صنار 10 كفتة.. وممكن تعمل سبحة لو بتصطاد الصبح وهتسقط تحت الكوبري

أما لو هتوسع او هتصطاد بالليل يبقى فرعين بس أو فرع واحد.. هتلاقي صيادين يقولوا لك الصنار ده صغير لو الشراغيش الكبيرة حاضرة.. ماتسمعش كلامهم.. 10 كفتة بيجيب أي حجم من الشراغيش الموجودة على كوبري ستانلي وميزته إن السمكة بتبلعه فمش بتعرف تفرغ منك.. أما الصنار الكبير هتشففه مش هتبلعه.. الطعم اللي هتستخدمه البرغوت والعقر لازم يبقى معاك الاتنين

الدنيس:

أحسن مكان له.. هتيجي من ناحية سابا باشا.. هتعدي من تحت البرج وتفضل ماشي لحد أول فانوس.. ده بيبقى فانوس كبير متعلق عشان الاضاءة.. ارمي هناك.. الأرمة المستخدمة شعر أساسي 35 وأرمة 30 عشان فيه دنيس هناك أحجام حلوة.. رصاصة 6 أو 8 عشان تطوح بيها بعيد على حسب حالة الميه.. هتطوح لأبعد حاجة تقدر عليها عشان الدنيس موسع قوي..

هتخلي الرصاصة حرة يعني هتحط الرصاصة في الشعر من غير ما تقفل عليها وتربط تحتها مدور وتحته فرعين 25 و30 سنتي.. وصنار 5 أو 6 كرش.. فيه برضه صنار عند محل آل فهيم في سابا باشا اسمه circle hock ده فوق الممتاز احسن من الكفتة والكرش..

• طب ليه انت بتسيب الرصاصة حرة فوق المدور مش بتربطها؟

عشان الدنيس لما يسحب الطعم مايحسش بالرصاصة لإنه بياكل ويتف ويرجع ياكل تاني.. فكده الشعر بيتسحب من غير ما يشد الرصاصة عشان ماياكلش ويتف ويحس بالرصاصة يقوم هربان منك.. والطعم اللي هتستخدمه دود بحر ده رقم 1 مع الدنيس هناك ويليه الاسماعيلاوي وهتلاقيه موجود في سوق الميدان عند الحمامصي

الموزة:

هتشتغل عليها بصنار رجل دبانة 24..  وده هتلاقيه عند السبخي..

اعمل سبحة 6 فروع عشان الموزة لما بتبقى حاضرة بتدخل اسراب..

وارمي تحتك على طول ماتوسعش جوه.. وخليك واقف في الاماكن اللي قلتلك عليها للشراغيش..

• هتعرف منين ان الموزة حاضرة في الميه؟

لما تلاقي البرغوت يطلع معاك ممصوص.. يعني تلاقي القشرة بس..

وطبعاً من طريقة الضربة بتاعته في الميه مختلفة عن ضربة الشراغيش بس الطريقة الأولى اسهل..

والطعم برغوت.. هتخلي الشعر بتاعك مشدود على الآخر واللبلوب متني شوية هتلاقي رعشة جامدة في اللبلوب اشكم واسحب في الموزة على طول

الكاليماري:

الموسم بتاعه من آخر شهر اكتوبر.. وده هتطلع له بالليل بعد المغرب.. ولازم يكون الميه حصيرة وكاشفة خالص.. ويفضل في الليالي اللي بيبقى القمر مكتمل فيها بس مش شرط.. هتشتري رابلا صيني مقاس 3.5 من النوع اللي بيبقى كله بينور مش ديله بس.. اللي هي رابلا قماش..

وهتلاقيها عند آل فهيم ومحلات الصيد عموماً.. هتشحنها بالضوء قبل ما تستخدمها.. حط فلة شمندورة وتحتها بمتر ونص اربط الرابلا بتاعتك على الشعر الأساسي اللي هو 35..

ارمي واسحب ببطء وماتغيرش من سرعة السحب بتاعك او انك تسحب وتوقف.. طبعا هترمي الرابلا موسعة جوه خالص على قد ما تقدر وتسحبها ببطء زي ماقلتلك بنفس السرعة من غير توقف وتخلي اللبلوب بتاع العود بتاعك نازل تحت ناحية الميه مش مرفوع لفوق عشان حركة الرابلا تبقى مظبوطة شبه حركة السمك في الميه..

هتلاقي فجأة وانت بتسحب فيه تقل جامد معاك.. ساعتها استنى ثواني عشان الكاليماري يمسك الرابلا كويس وبعدين اشكم جامد واسحب الكاليماري بتاعك.. وخلي بالك هو مش بيضرب زي السمك انت بس وانت بتلم بتحس بتقل جامد فجأة..

أما المكان اللي هتقف فيه فأحسن مكان للكاليماري هناك على حروف الوعر اللي موجود ناحية سيدي جابر..

بس خلي بالك عشان المكان ده بيبقى زحمة قوي لما الكاليماري بيبقى حاضر وممكن تشبك مع الشعر بتاع اللي بيصطادوا جنبك كتير لو مش مخلي بالك ومحدد اتجاه رميك كويس .

The post اساسيات الصيد علي كوبري أستانلي appeared first on ملوك الصيد.

1_القلعه و ما حولها

من اشهر مناطق الصيد بالاسكندريه لما تتمتع به من مخابئ و صخور تمتد تحت الماء لمسافه لا تقل عن مئتى متر امام القلعه مما يعد مكان مناسب لمعيشه الاسماك .

2- جزيره الارمجان

و هى فى منتصف الميناء الشرقى و هى صناعيه و يمكن الصيد امام الجزيره بالقوارب فقط دون الصعود على الجزيرة لان هذا ممنوع حاليا و الميناء الشرقى بوجه عام مستعمره البطاطا .

3- ميناء الدخيله:

من افضل المناطق و اغزرها فى كميات و احجام الاسماك و لكن تحتاج الى تصريح دخول ..

لو هتنزل بلليل الدود المشرشر سيد الموقف وبأذن الله ربنا يرزقك والعده المستخدمه بوصه 5 متر شعر القرمه 25 او 20 وفله وسط وشعر الجوز 8 او 10 تكون شعرايه نضيفه وتعمل جوز واسع وسلاح 10 او 11 موستاد

واتوكل على الله وترمي فى بطن إي رصيف وطول ما انت قاعد غير عياراتك لحد ما السمك يعلم عليك وان شاء الله ربنا يرزقك

4- السلسله:

فى الميناء الشرقيه ايضا.

5- كوبرى استانلى:

الصيد هناك ليلا يعطى نتائج جيده .

5- خليج نادى المهندسين:

يوجد به مجموعه لا باس بها من الاسماك مثل البورى و البطاطا و الترس و الموزه و المكرونه .

6- كوبرى المنتزه:

يجب قطع تذكره دخول المنتزه و المشى لمده ثلث ساعه للوصول اليه و لكن المشى فى المنتزه متعه فى حد ذاتها و يوجد هناك اسماك بيضاء جيدة .

7- خليج ابوقير:

يوجد به اسماك خشنه مثل البطاطا و المكرونه و الموزه و اسماك بيضاء مثل الميرمار و الشراغيش فهو بحق مستعمره قديمه .

8- جزيره نلسن:

فى وسط البحر على بعد نصف ساعه من ابوقير و يتم الوصول اليها بالقوارب ذات المحركات الديزل .

9- الساحل الشمالى:

يوجد به اسماك جيده جدا لصيد المكنه و لكن يجب انتقاء المكان بعنايه فكما قلت قد تذهب و تجد ان الاسماك قد ذهبت فى مشوار و تركت المنطقه .

10- مارينا:

يوجد بها كبارى ذات جوده عاليه اذا حالفك الحظ قد تعود بما لا يقل عن عشره كيلو جرامات من الاسماك .

11- لسان المندرة

تحت فندق شيراتون بوري دنيس خاصا في الليل رزقها واسع .

12- لسان العصافرة مثله .

13- اللسان في نادي القوات المسلحه 6 اكتوبر خلف حلقه السمك .

14- جزر ميامي .

15- أمام المحروسه شراغيش وزنجاريا وبوري وبطاطا .

16_ وأخيراً ماننساش المكس طبعاً .

اما الطعوم المعتادة :

الصيد فى البحر المتوسط اصعب صيد لان السمك خبير فى اساليب الصيد و الهرب من الصياد و لا ياكل اى طعم ترميه فى اى وقت من العام بمعنى ان السمك ليه مزاج … ايوه مزاج و عالى كمان ، ايام تلاقيه نفسه مفتوحه و بياكل كل حاجه و ايام تلاقيه ملهوش نفس كده غير لطعم معين مع انه نفس النوع

و نفس المكان بس اللى تغير هو المزاج ، ثم ان السمك فى الاسكندريه قليل و كثير الترحال بمعنى انه لا يستوطن مكان معين لفترات طويله و بكده ممكن تصطاد من مكان و بعدين تلاقى المكان مفيش فيه غير الرمله فى اقل من شهر .

• اساسيات الصيد علي كوبري أستانلي
• عدة التسقيط في الإسكندريه
• تفسير المعاني .. عن السبحة الأسكندراني

The post أشهر أماكن صيد الأسماك بالأسكندريه و أفضل الطعوم المستخدمة appeared first on ملوك الصيد.

السلام عليكم ورحمة الله وبركاته …

أحبابى معشر الصيادين .على حد فهمى المتواضع فى إختلاف كمية الطعم وده بيكون حسب الأتي :_

1- المكان

بحر أحمر /شمال غير جنوب أو بحر متوسط

2- الزمان

صيف غير شتاء وحالات القمر المختلفة – فمثلا هناك آراء معتبرة بأن أفضل أوقات للصيد من يوم 5وحتى 10 ومن يوم 20 وحتى 25 فى كل شهر عربى

3- السمك المستهدف والفرشة أو الطرحة

فالمرجان والدنيس غير الكوشر والشعور أو المحاسن أو البياض والبلاط أو الحريت…إلخ

4- طريقة الصيد

التسقيط غير الجر على سبيل المثال

أرى من وجهة نظرى المتواضعة ومن باب خير الأمور الوسط ( بين من يرى أن الطعم مبيخسرش وزيادته مفيهاش مشكلة/ وبين/ من يرى الإقتصاد وعدم التبذير والإهدار وانه ممكن أن نتبع طريقة منه فيه- وكلها أراء محترمة)

مبدئياً قبل الدخول في التفاصيل ..أرى أن تكون الكمية لتكون فى الأمان صيد الأسماك للمحترفين لكل مكان وزمان وسمك مستهدف وطريقة صيد ما يلى لكل 24 ساعة للفرد:

• نصف كيلو جمبرى أحسن نوع طازة وحجمه مناسب
• كيلو كاليمارى
• نصف كيلو سبيط
• كيلو ماكريل
• نصف كيلو باغة أو سردين
• نصف كيلو بلاميطة

وبجملة المصاريف و دوس يا ريس وش أو تصبية تسقيط أو جر إستخار واختار مقلى او مشوى أو مسلوق او صينية او طاجن

ولكن في جميع الحالات يجب أستشارة الريس في نوعية الطعم وكميته قبل القيام بالرحلة.

سمعونا الصلاة على النبى وأحنا نازلين للجد 🙂

بالنسبه للبحر الاحمر تسقيط شمال الزعفرانه حتي السويس

معظم السمك صغير الا لو سمكة كبيره معدية ماسكه وش شعبه
للـ ٢٤ ساعه كيلو جمبري للفرد و ربع كليماري و نص ماكريل ويتم ضربه في اجمالي العدد عشان في ناس مش هاتستهلك طعم و طالع يتبسط و يغير جو

الزعفرانه و جنوبا حتي القصير

للفرد في ٢٤ في الموسم صيفا ٢ كليماري ٢ ماكريل و سردين مملح قديم او جديد مش هاتفرق و ده عشان يضبط الدور و يمسمر السمكه ف مكانها .. و ممكن اتنين جمبري للرحله .. و شتاء نص الكميه

راس العش

بالنسبة ل رأس العش 36 ساعة بنعمل حسابنا في ان يكون كل واحد من 2 ماكريل وتقريبا 1/2 جمبري وكيلو الاربع كاليماري كبير او 1 كيلو سبيط احمر من العبور وده احلي بالنسبة لرأس العش او باغة بس الافضل ماكريل.

القصير ولحد الحدود مع السودان

و ديه مافيش حد طالع يهرج فيها والكميه ضعف المذكور واهم حاجه السردين المملح

ملحوظة هامة

كلما اتجهنا جنوبا يتم زياده مقاس العلب و بالتالي زياده استهلاك الطعم و زياده التنقير من السمك الصغير .. وبالنسبه للطرحات فوق ال٢٥متر التزفير لا يمكن يبقي برمي الزفاره من المركب فلازم يبقي كل هلب عليه حته من السردين و دي اول ما تنزل السمك الصغير بيهربدها تحت و يزفر الدور مضبوط و لو اتزفر صح كل شويه ممكن ما تحتاجش تتنقل كتير

انا من مدرسه اتقل علي الرز يعني زفر الدور كويس و استني رزقك ربنا يبعتهولك و مش بنقل غير لما يكون السمك حلف ميت يمين ماهو طالع

على العموم الطعم ميخسرش . يكون معايا بزياده احسن فرق التكلفه مش حيبقي كتير
يعني تحسب الطعم بتاعك مره وربع .

حنفسر شويه …… في 24 ساعه

انا عن نفسي

1- باسقط ببوصه ( طعمها كله تقطيع … مكريل .. سبيط .. سردين .. بلاميطه ) يبقي بالوزن عاوز كيلو من كل حاجه . وده لصيد البوصه

2- لشغل العوامات ( سردين كامل – باغه كامله – سبيطه كامله – ) وده غالبا بيكون بالنهار ) يبقي حوالي نص كيلو من كله

3- لشغل اللنس ( كامل وتقطيع حسب السمك )

4- للمرجان والكتارين ( نص جنبري )

5- اما الوش انا باوش بسمكه كامله او بسمكه حيه

الخلاصه كل 24 ساعه ( كيلو ونص مكريل – كيلو سبيط – نص سردين – نص جنبري – كيلو بلا ميطه لو موجود احجام صغيره )

.. و الله اعلي و اعلم

The post كيف يتم تحديد كمية و انواع الطعم قبل الرحلة appeared first on ملوك الصيد.

بسم الله الرحمن الرحيم

قال تعالى: ﴿وَإِنْ تَعُدُّوا نِعْمَةَ اللَّهِ لَا تُحْصُوهَا إِنَّ اللَّهَ لَغَفُورٌ رَحِيمٌ (18) _ النحل

هذا البوست محاولة متواضعه للتعريف بأنواع الأسماك المتوفره في الخليج العربي والبحرين الاحمر والابيض ونهر النيل خلال شهر نوفمبر بإذن الله

🐠  الأسماك المتوفره بالبحرين الأبيض والأحمر 🐠

• الوقار
• القاروس
• البربون
• الفرّاخ
• المكرونة
• الكابوريا
• الجمبري
• الكوشر
• الدريني
• الفارس
• الخرمان
• الجمبرور
• الكاليماري
• الشراغيش
• الدنيس
• الأستكامتشا
• جرم البياض
• التونه
• البلاميطه
• الكبريت
• الناجل
• الأنش ابو شراع
• الشعور
• الجلانفيش
• الميرا
• البياض
• الدريني
• البنقز
• العنبره
• القمره
• الحارد
• الحبري
• الجمبري القرش
• الكاليماري
• السيبيا
• النفاره

🐠 الأسماك المتوفره بالخليج العربي خلال هذا الشهر 🐠

موسم الشتاء يبدأ بالنجارة (المرجان) والنفاره والحفار والقاص والعربي والبياض

وينتهى بالشعور ولكن صد الشرايف (البواصي) والناجل والهامور مانتسغني عنه

واذا تهورت ورحت للغزير يمكن فارس او صرع او نفاره او مسلبة او قمر

يعني المشتى يجمع كل الاسماك تقريبا للي ياكل زلط اما الي بالي بالك يروح يشتريله اربع خمس كيلو ويتغدى عليهن ولامانع من التصوير بعد مافيه مشكلة

ومن الأسماك المتواجده أيضاً .. الهامور والسبيطي والشعم والقرقفان والمجوه والبالول والجرجوروالكنعد والحمام واللمبوقه والشعري والسلطان ابراهيم والقبقب والروبيان والفارس والحاقول والكالامار والشعم والقباب والقابط والحلوايوه

ملحوظه هامه

شهر سبتمبر واكتوبر ونوفمبر يحضر فيه أغلب السمك إلى الشاطيء للتزاوج والتبييض ولمناسبة الأكسجين للاسماك في البحر خلال هذه الفتره

ومن بعد ذلك يستمر صيد الكنعد والسبيطي والشعم بكثرة من خلال السيف من بد باقي الاسماك إلى ان يشتد البرد وغالباً ما يكون خلال شهر فبراير فيقل الصيد نوعاً ما ويكون داخل البحر أوفر

ولكن على السيف يظهر موسم الصافي والشعم حيث يكثر خلال هذه الفترة حتى آخر الشتاء ومن ثم عند تعدل الجو في الخريف يرجع الكنعد على السيف ومن ثم باقي السمك وعند اشتداد الحر يعود الوضع كما هو عليه قبل الشتاء حيث تختفي اسماك الشتاء وتظهر اسماك الصيف

🐠 الأسماك المتوفره بالنيل هذا الشهر 🐠

• البلطي
• الأنومه
• المبروكه
• السيلفر
• القرموط
• قشر البياض
• الراي
• النمر

ملحوظه ..

أفضل مواعيد صيد الاسماك فى نهر النيل
يجب ان نعلم ان درجة حرارة الماء من العوامل المؤثرة فى مواعيد صيد الاسماك فى نهر النيل ففى حالة اعتدال درجة المياة يكون الصيد افضل .

و لكن يوجد لدينا فترتين لافضل وقت للصيد في النيل و هما

• 1 – من شهر ابريل الى شهر اغسطس.
• 2 – من شهر سبتمبر الى نوفمبر .

هذا و اغلب المناطق بطول النيل يمكن الصيد منها ليلا فى اى من اوقات السنة و المناطق الموجودة فى وجة قبلى تبداء من شهر نوفمبر الى شهر فبراير

هذا ويمكنك أن تصيد بإذن الله أنواع أخرى خلاف ماذكر لأن الرازق هو الله عز وجل ونعمه لاتعد ولا تحصى …..

• أرجوا ممن لديه تعديل أو إضافه لهذا البوست فليتفضل وله وافر الشكر
• وختاما .. إن أصبت ففضل من الله عز وجل.. وان اخطئت فمن نفسي والشيطان

The post الاسماك المتوفره البحر الآحمر البحر الآبيض الخليج العربي نهر النيل || شهر نوفمبر appeared first on ملوك الصيد.

Loading...

Taking too long?

Reload document

| Open in new tab

تحميل الكتيب [3.92 MB]

The post كتاب || الموسوعة العلمية فى صيد الأسماك والأحياء المائية المصرية appeared first on ملوك الصيد.