* الســــــــوأل *
انا كنت عايز اعرف ان كنت هصطاد فى الغردقة بلنسة علشان مش معايا ماكينة جامدة اصطاد بخيط كام واركب واير ولا لاء و السن مقاسةكام وادكك سمكة ولا لاء المهم انى هصطاد اخر الشهر وعايز اصطاد حاجة تقيلة ان شاء الله
* الجـــــــــــواب *
تعالي ناخد الموضوع بالمقلوب … بمعني، انت عايز تصطاد ايه؟؟؟
انت عند 3 شرائح من السمك الكبير اللي ممكن تصادفها في الغردقه:
1- سمك متوسط مثل المحسن و الشعور و الرباجة و الكوشر و الشريفة..
- أوزان من كيلو الي 4
2- سمك مفترس عايم في نص المياه مثل الدراك و الباركودا و البياض ..
- اوزان من 4 كيلوا الي 15
3- سمك كبير قابع في القاع مثل الناجل و التوين ..
- أوزان من 4 كيلو الي 20 و 30 و 40 كيلو !!
كل شريحة من دول لها طريقة صيدها و بالتالي الخيط المقاس المناسب والصنار المناسب و الطعم المناسب و كمان وزن الثقل المناسب..
1- برضه دول ممكن تقسمهم 2 .. الشريفة و الكوشر و دي أسماك قابعة بس مش ضخمة، في اللي بيحصل انك بتجيب لنسة خيط 60 او 70 ، رصاصة 40 جرام او 60 حرة او ثابتة علي بعد 30-40 سم من الصنار، و تسقط الخيط الي القاع و ترفع متر او أقل و تنتظر الخبطة ، و ده لما يكون البحر طالع أي ان التيار متجه لمقدمة المركب…
اما اذا كان التيار متجه لخلف المركب اذن تشتغل علي الأنواع الثانية بأنك تجيب لنسة عليها خيط 70 او 80 و رصاصة خفيفة جدا علي بعد 30-40 سم من الصنار و “توشح” أي انك تترك الطعم يتهادي مع التيار، ينزل شوية و تمسك شوية..
الطريقتين دول بتستعمل معاهم صنار 0/4 الي 0/6 حسب انت شايف ايه الأحجام اللي طالعة، و بما انك في الغردقة فتستعمل طعم سردينة او اتنين مع شريحة سبيط كبيرة .. و لو كنت بتسقط للكوشر و الشريفة ممكن تشبك سردينتين او 3 من عنيهم
2- الطريقة دي تستعملها لما تلاقي السمك بيطلع مقصوص او ان الدور منّع فجأة ، و كمان ممكن تستعملها ليلا في أي وقت… بتجيب خيط 90 او 100 او خيط مكنة الجر و تعمله وش طويل 90 او 100 و في النهاية وش واير 50 سم و صنار من 0/8 و تطعم بنجز حي، او كناية حية، او عنبر حي، او جمبرور حي… او ممكن ماكريلة مقطوع رأسها …
و طبعا لو شايف ان الأحجام اللي طالعة صغيرة نسبيا، ممكن تصغر الصنار الي 0/6 …. و الطريقة دي بتكون بدون صاصة و بتنزل الطعم الي 10 متر (بحد أقصي) تحت السطح.
3- دي ممكن تستخدمها أيو وقت (صبح او ليل) و خصوصا لما فجأة تلاقي الدور منّع … لو الصبح بتنزل بخيط أقصاه 100 و رصاصة ثقيلة شوية 80 جرام و صنار 0/8 الي 0/10 …
اما ليلا فخيط 140 أحسن من خيط 120 و رصاصتين ضخمتين كل واحدة 100 جرام … الصنار يكون علي بعد متر من الرصاصة.. تنزل للقاع و تطلع متر او 2 متر و تخليك منتبه ان الضربة الأولي للسمكة هاتكون قوية و انت لازم ترد بقوة جدا و الا هاتخدك علي الشعب و انسي انك تطلعها او تقطع الخيط ال140!! الطعم مثل ما سبق
كل الطرق السابقة بيكون الترميل منه فيه، و صنار واحد تحت الرصاصة (ما عدا شريحة 2) و بدون أن تربط الرصاصة في الخيط بعقدة.
انما تثبيت الرصاصة بيكون يا اما برصاصة قشرة قبل و بعد الرصاصة الأساسية، او لو بتوشح فممكن الرصاصة القشرة لوحدها او رصاصة بلحة و تفعص طرفيها بالكماشة
