كيف تصطاد سمكة القاروس باليد و بالماكينة

القاروس ليه طرق كتيرة جدا لصيدها علشان كده انا حتكلم عن اللي انا متمرس فيه واستخدمته

اولا لازم نعرف شوية معلومات عن سمكة القاروس

سمكة القاروس من الاسماك اكلة الاسماك مش معنى كده انها بتاكل سمك بس ولكن بتحب الاسماك
ولازم نعرف معلومة مهمة جدا ان القاروس ممكن يضرب على طعمك حتى لو انت مش بترمي عليه مخصوص وده كتير بيحصل

مواسم القاروس

الاول : من اول يوليو حتى نهاية سبتمبر (بيكون ضعيف واحجامه صغيرة )
الثاني: من اواخر اكتوبر لاواخر يناير

طرق صيد القاروس

البوصة اليد

بصراحة انا شخصيا القاروص ضرب عليا على البوصة اليد وبالبرغوت وكانت قاروسة كيلو نص ومرة تانية نص كيلو وكتير كان بيقطع الشعر لان مفيش مجال تسايس السمكه لو هيا اكبر من الازم وخدتك فى الغرق هتبقى عاصى عليها وهوبا يا معلم تلاقى الشعر بتاعك…😥😥قصه حزينه بتعيشها فى ثوانى 😥😥

ولكن لو عايز تنزل على القاروس بالبوصة اليد يبقى مافيش غير طريقة واحدة وان شاء الله اقل سمكة تضرب عليك مش اقل من كيلو

• الشعر الاساسي نمرة 40
• الصيد من غير فلة
• الرصاصة بلية صغيرة جدا
• شعر الفروع : لا يوجد

محدش يستغرب لانك حتصطاد من غير طعم ولا سنانير
اللي حتصطاد بيه ريشة .. ايوة ريشة
علشان كده الطريقة دي اسمها الترييش
زي ما قلنا الشعر الاساسي 40

وتركب الرصاصة وتحتها الريشة ودي بتكون ريشة فراخ عادية وبنختارها تكون من الريش الداخلي يعني المتغطي

بنجيب الريشة ونربط معاها سلاح نمرة 01 وبعد كده نربط سلاح تاني ونسيب شعر حوالي 2 او 3 سم
ونربطة معاهم ونيجي على مكان ربط الشعر ونلف عليه شعر حرير (دور واحد ) وفوقهم شيكرتون ونلاحظ اننا واحنا بنربط السلاح التاني نخلي حتة شعر طويلة ونعملها خية لان منها حنوصلها في الشعر الاساسي

وكمان يكون اتجاه الريشة مع اتجاه السلاح بمعنى ان الجزء اللي فيه الريش يكون مع دوران السلاح
جهزنا البوصة والسلاح يبقى مش فاضل غير السمك

القاروس سمكة عايمة بتدخل مع الموج .. يبقى كده احنا عايزين موج

نختار مكان يكون فيه موج عالي ونقدر نقف فيه وكل ما عليك انك ترمي في الموجه وتسحب ايدك معاها ولازم وانت بيسحب ايدك توقفها كل شوية علشان تخايل السمكة وتشوف الريشة وهي بتتحرك
بتلاقي (لو ليك نصيب طبعا) عيل صغير بيسحب منك البوصة

بس الطريقة دي مفيش ناس كتير بتستخدمها لانك لازم تنزل تقف في المية في عز الشتا وتخيل بقى شتا ومية ساقعة وموج عالي

بس سمكتها بتنسيك كل ده…انا شخصيا اتعلمتها من والدى الله يرحموا ومحالفنيش الحظ ان امسك سمك بيها

من الاخر كده كنت بتفرج عليه 😂😂

صيد القاروص بالبوصة الماكينة

القاروس بالماكينة ليه طرق اشكال والوان بس برضة ارجع واقول ان القاروس بيضرب على اي طعم طول ما هو موجود في المية

لو انت بتصطاد الصبح يبقى ارمي للقاروس بالرابالات

و فى انواع رابالات كويسه جدا صينى ورخيصه وانواع غاليه زى الدو والاكس راب وغيرها بتستخدم لصيد القاروس .. ومننساش المعلقه البلدى اللى انا بحبها شخصيا جنب الجرينجو
ده طبعا جنب الطعم

يعني لو رميت بالطعم الصبح عادي حيضرب عليك بس مش زي الراباللا
والصيد بالراباللا سهل كل ما عليك انك تركبها في الشعر وترمي وتجر بسرعة متوسطة السمكة حتضرب عليها كأنها سمكة بتجري

لو بتصطاد بالليل يبقى حترمي بالطعم عادي ولو موجود في المية قاروس حيضرب عليك
وحاول تستخدم سلاح كبير يعني نمرة 01 او 02 او 03

وتعمل سلاحين واحد فوق الرصاصة والتاني تحتها ويكون طولة كبير يعني متر الا ربع تقريبا او سلاح واحد لو انتا حاسس ان فى سمك كبير تحتيك او جوز واسع تخت الرصاصه … انتا وراحتك بقى 😂
ولازم تخلي بالك واوعى تسيب البوصة وتستنى السمكة لما تضرب

لازم تفضل ماسكها لان القاروس من السمك اللي بيجر يعني يحط الطعم في بقة ويجري
دي الطرق اللي اعرفها في صيد القاروس بس فيه طرق تانية كتير جدا وكل منطقة في مصر على ساحل البحر المتوسط ليهم طريقة في صيد القاروس ياريت لو حد يوضحهالنا

الطعم المفضل للقاروس

• الجمبري
• نطاط – عقر – شطنارة
• الدود
• قراص – قراص صخر – مشرشر _دود النار _حنش الطين (بيستخدم في الطرح ) – دود بحر -اسمعلاوي
• الجرايات
• جرايات خضراء (كبيرة – بندقة ) – تكنيات – بشبش
• السردين والسردينيلا

و شفت صيادين خلف ميناء بتروجيت بيصطادو القاروس بفتلة حرير لونها احمر وانا كنت بصطاد بفتله لونها ابيض فنصحنى صياد هناك اغير اللون بعد ما سالت عرفت انها بتنزل المية تتحرك زي الدوده والقاروسة ياعيني مش فاهمة بتاكل وخلاص
استخدمت الطريقة دي وكان بيضرب عليا القاروص والغلانفيش

اشهر اماكن صيد القاروس

• ميناء الاسكندرية
• ميناء الدخيلة
• الميناء الشرقي
• السلسلة
• الشاطبي
• سبورتينج
• سيدي جابر قبل ميتقفل 😥😥😋
• سان ستيفانو قبل ميتقفل برضوا 😥😥😥
• المنتزة
• الطرح (مصرف المية السخنة)
• المعدية
• ميناء بتروجيت (للعاملين فقط)
• خلف ميناء بتروجيت (مفتوح)
• ميناء ابو قير

ملحوظة مهمة :

فيه سمك من عيلة القاروس بس مش بيكبر اكبر حجم ليه قد الكف وده اسمه نقط ا

و فوق الكف بشويه وده بنسميه نقط شويحى وهو شبه القاروس بالظبط بس فية نقط على ضهره وده بتصطادة من الطرح والمعدية وبيكون عايم…..