مواسم و تواجد سمك الدنيس
بداية الشتاء ( منتصف الموسم ) أخر ديسمبر – يناير – فراير – منتصف مارس :
- تتواجد فى الشواطىء الصخرية و حواجز الموانىء
- و تتواجد فقط فى الشواطىء الرملية عقب النوات مباشرة ( البوستاشى )
- و تكثر بشدة فى التسقيط و المرامى الغرق و يكثر
بداية الربيع ( نهاية الموسم ) أواخر مارس – إبريل – مايو – أوائل يونيه :
تجدها مرة أخرى على :
- الشواطىء
- الحروف
- الجزر
- مارينا بالساحل
- الموانىء
وتكون قد وصلت لحجم كبير يتعدى الكيلو ….
بداية الصيف ( موسم ضعيف ) يونيه – يوليه – أغسطس – سبتمبر :
يتواجد الدنيس على شبه غلطات و ليس بصفة مستمرة … و يندر صيده بالبوصة اليد
و لو ربنا كرمك منه تاخد واحدة أو أتنين بالكتير …..
مسميات سمك الدنيس
- الدنيس الصغير جدا أسمه (بلاميس)
- الدنيس الوسط يسمى (فلّيجس)
- الدنيس الكبير (دنيس)
و يوجد نوع بنسمية (الملك) وده بيكون فيه لطشة صفرا على خيشومه وده بقى ربنا يكرمكم وتشدوا منه وتستمتعوا بيه
اماكن تواجد الدنيس
الدنيس بيحب الوعر و بيعيش حواليه في مجموعات وبيحب برضه الارض الخشنة
يعني لو المكان اللي بترمي فيه مفيش فيه وعر ورملته خشنة (حصى) حتلاقي الدنيس موجود
وزي ما قلنا انه بيعيش في مجموعات ودايما بيتحرك في المنطقة في شكل دواير علشان يدور على الاكل ولو اخدت منه واحده وغاب عليك بعد كده متقلقش حيلف ويجيلك تاني ان شاء الله
طرق صيد الدنيس
1- بالبوصة الماكينة
الشعر الاساسي 40 .. الفروع 35 أو 30 (انا عن نفسي بعمل الشعر الاساسي 40 على فروع 40 برضه)
السلاح
- لو فيه فليجس في الماية يبقى السلاح نمرة 5 او 4 او 3 بالكتير
- ويفضل بكرش ولو بترمي على تقايل يبقى السلاح نمرة 01 او 02 او 03
- بنعمل سلاح واحد بس تحت الرصاصة ويكون متوسط الطول وتوكل على الله وارمي زلم البوش شوية بس متخليش الشعر مشدود
- حيضربك الاولى سيبه ولا كأنك تعرفه
- التانية انتبه له
- التالته مترحمهوش رد فيه بقلب جامد
- ولما ترد وقف ايدك شوية لغاية ما يبتدي يعافر وبعدين لمه
حد يسألني ليه؟؟
اقولك
لان الدنيس من السمك العفي جدا لما بترد فيه بيقف مكانه شوية
ولو ايدك رخت او حس ببوش في الشعر حيديلك ضهره ويجري
وفي الحالة دي يبقى السمكة راحت لو مش بالعة
مع الدنيس التقيل اللي بيعدي الكيلو ونص والاتنين كيلو
لما بنرد فيه وميرضاش يتحرك
بنريح ايدينا بالبوصة سنة صغيرة علشان يحس بالراحة ويبتدي يتحرك
وبعدها نبتدي نتعامل معاه
- خد بالك ساعات الدنيس بياكل بخباثة .. ازاي؟؟؟
تلاقيه الشعر بيبوش لوحده من غير ضرب ولا حاجه
في الحالة دي تلم البوش بحذر
لانه لو حس بالسلاح حيجري العكس ويقطع
وزي ما قلتلكم ان الدنيس سمكة عفية جدا
كفاية اني اقول انه بيكسر الجلاجولة بسنانة
معلش هخرج شوية عن الموضوع واقولكم ايه اللي كان بيحصل معانا مع الدنيس
كنا بنرمي بتكنيات ( كابوريا لونها اسود بنطلعها من بين البلوكات) وفيه ناس بتقول عليها العفاريت
المهم
كان يضرب علينا ياخد الطعم ويجري
لغاية لما واحد بيصطاد معايا ربنا يمسية بكل خير اسمة عم منير
حط القراص بتاع الكايوريا وقال اهو حاجه تستحمل شوية
ويادوب الرصاصة نزلت من هنا ولقينا زلزال في البوصة
الحق يا عم حاسب يا منير وهو طبعا صياد من الصيادين التقال
حوالي نص ساعة بيعافر مع السمكة لغاية ما وصلت تحتنا
بس طبعا علشان ارتفاع البوكات ميقدرش يرفعها
المهم نزلت لقفتها
بسم الله ما شاء الله
دنيسة ملكة طولها نص طولي
عرفت بعد كده انها 3 كيلو ونص
وبعد كده ابتدينا نرميله يالقراص واخدنا صيده يومها اصغر سمكة كيلو الا ربع
المهم نرجع للموضوع
نيجي دلوقتي للطريقة الثانية
2- البوصة العادية
وفيها طريقتين
الحساس
وهو نفس الصيد بالماكينة بس بالبوصة العادية
الصيد بالفلة
وده لازم يكون على قرار عالي لان الدنيس دايما ماسك الارض
وبتعمل الشعر الاساسي 35
والفروع 30
السلاح لا يقل عن نمرة 6
والفروع بتعمل فرع متر وربع والتاني متر
وطبعا الصيد بالليل
ويفضل والبحر هادي او مريح
لان الدنيس بيسرح والبحر هادي
ركب الفلة الفوسفور وتوكل على الله وارمي
بس لو حسيت ان السمكة تقيلة عليك ومش عارف تتعامل معاها
متعافرش معاها ولو قطعت متزعلش
ملكش نصيب فيها
وفكر دايما ان بوصتك لو اتكسرت مش حتعرف تعوضها
لكن السمكة لو راحت فيه غيرها كتير
طعم سمك الدنيس
- الجرايات (سلطعونات الشاطئ)
- تكني
- جرايات خضرا
- خلخل
مع ان الدنيس دلوقتي مش بياكل غير التكني ومش بيضرب على الجرايات الخضرا الا في الغرب و ابوقير
والخلخل بقى انقرض لان مبقاش فيه رملة على الشط وهو جحرة كان بيبقى حفرة في الرملة … (فين ايام الخلخل كنا بنقول لو رميت بخلخل في بانيو حتاخد بيه دنيس وقاروس)
السردين والسردينيلا
السردينيلا هو السردين الروسي بيبقى مجمد ومش بلاقيه الا عند واحده اسمها ام احمد في سوق باب عمر باشا
الدود
اسمعلاوي – قراص – دود بحر
بس القراص ودود البحر بيلم عليك السمك الرفيع
الجلاجولة والبشبش
واللي مش عارف الجلاجولة هي :
نوع من القواقع البحرية ليها صدفة قوية جدا وبتكون مليانة لحم من جوة احنا بقى بنصطاد باللحم اللي جوة ومتنساش تاخد معاك شاكوش علشان تكسرها
والبشبش هو ذكر الجلاجولة
الجمبري
نطاط – عقر – بلنص – شطنارة – برغوت
البرغوت للبوصة اليد لانه مش بيستحمل الماكينة
دلوقتي اقولكم كل طعم بنستخدمة امتى
الشتاء (موسم الدنيس)
الجرايات – الجلاجولة – السردينيلا
الصيف الدنيس بيكون موجود بس صغير (فليجس)
الدود – الجمبري
بمعنى في الصيف طعم طري وفي الشتاء طعم ناشف
اماكن تواجد الدنيس في الاسكندرية
اشهر اماكن تصطاد منها الدنيس
- ميناء الاسكندرية
- ميناء الدخيلة
- السلسلة (الازريطة امام الملاهي)
- الشاطبي ( بس خلي بالك من الوعر لانة جامد)
- كامب شيزار
- سبورتينج
- كليوباترا
- سيدي جابر
- كوبري ستانلي (فيه فليجس كتير)
- لسان جليم التاني
- سان ستيفانو امام سوميد
- العصافرة
- المنتزة
- ميناء ابو قير
